Tekɔ la diangɔ dia nɛmɔ efula dia kahana l’anto
1 Ɔtɛkɛta wa Nzambi ndola la wetshelo w’ohomba efula wa lo nyuma wangɛnangɛnaso. (Osam. 12:6; 119:11, 14) Lo diaaso dimɔtshi dia lânde, Yeso akakambe la bɛnyɛlɔ efula diakatɛkɛtaka dikambo dia Diolelo ndo oma lâsɔ, nde akambola ambeki ande ate: “Undi, nyambulimbitela akambu aso tshe?” L’ɔkɔngɔ wa vɔ mbokadimola ɔnɛ eelo, nde akawatɛ ate: “Okone ufundji tshe lakawetsha dia ndjala umbeki a diulelu dia l’ulungu, eko uku kanga luudu, latutundjaka diango di’eyuyu la diango di’edjedja uma lu eumbelu kandi.”—Mat. 13:1-52.
2 Akambo wa mɛtɛ wa lo Bible wakateke mbala ka ntondo kakatatatɛ mbeka mbeyaka mbɔsama oko diangɔ di’edjedja. Lo tetemala kotsha ewo k’akambo woshami etale wa lo Ɔtɛkɛta wa Nzambi oma lo wekelo aso w’onto ndamɛ, sho mbisholaka akambo wa mɛtɛ akina wele lo Bible wele oko diangɔ dia nɛmɔ efula di’eyoyo le so. (1 Kor. 2:7) Ndo nto, lo tshimbo ya ‘ɔhɔmbɔ wa kɔlamelo ndo wa kɛsɔ’ sho shihodiaka akambo akina w’eyoyo.—Mat. 24:45.
3 Sho mbɔsaka la nɛmɔ efula akambo wa mɛtɛ w’edjedja ndo w’eyoyo asɔ. Kɛsɔ totshutshuyaka dia sho mbeka ndo koma tomanamana oko weso embetsha w’Ɔtɛkɛta wa Nzambi wakahana la anto akina akambo wa mɛtɛ wa nɛmɔ efula wakateke.
4 Tokondja wetshelo oma lo ɛnyɛlɔ ka Yeso: Lo mɛnya woho wakandayaoke lo kɛnɛ kendana la awui wa nɛmɔ efula asɔ, Yeso akasale la wolo dia mbewoya anto akina awui akɔ. Kânga etena kakandalɛmbaka, nde kotshika mbisha anto kɛnɛ kaki lo “dipenge” diande.—Joa. 4:6-14.
5 Ngandji kakokaka Yeso wanɛ waki koshihodiaka awui wendana la Nzambi ndo la sangwelo diande akotshutshuya dia nde mbaewoya akambo wa mɛtɛ waki Nzambi wele oko diangɔ dia nɛmɔ efula. (Osam. 72:13) Nde akokaka wanɛ waki la mposa ka mbeka akambo wendana la Nzambi ndo la sangwelo diande kɛtshi ndo akatshutshuyama dia “mbaetsha akambu efula.”—Mako 6:34.
6 Tokoya Yeso: Naka sho mbɔsa la nɛmɔ di’efula akambo wa mɛtɛ wele laso, kete lo ɛnyɛlɔ ka Yeso tayolomɔlomɔ dia sambisha anto akambo wa mɛtɛ wa lo Bible. (Tuk. 2:1-5) Kânga mbakokaso nɛmba lo etena kɛmɔtshi, tayosambisha akambo wa mɛtɛ wa lo Afundelo la otema ɔtɔi ndo la waasaso. (Mako 6:34) Lowando l’efula lele laso lo diangɔ dia nɛmɔ diele laso ayototshutshuya dia sho sala kɛnɛ tshɛ kakokaso sala l’esambishelo, lo nyangaka mbala tshɛ dia ndeka ndjasha efula.