Olimu w’esambishelo nɔmbaka dia sho monga l’ekikelo
1 Ɔpɔstɔlɔ Paulo akakambe olimu w’ɔngɛnɔngɛnɔ efula w’osambisha ɛnɔnyi ndekana 30. Oko wele olimu tshɛ w’ohomba mongaka l’ekakatanu, nde lawɔ akahomana l’ekakatanu l’olimu ande w’esambishelo. (2 Kor. 11:23-29) Koko, nde kompekɔ. (2 Kor. 4:1) Nde akashihodia dia wolo wakandakondja wa mbikikɛ etena kakandakambaka olimu ande wakaye oma le Jehowa. (Fil. 4:13) Lo menda ekikelo ka la kɔlamelo kaki lande, Paulo akakoke mbuta ate: “Nyumbukuyaki, uku wukuyami Kristu.”—1 Kor. 11:1.
2 Woho wa mbikikɛ ehemba ɛlɔ kɛnɛ: Lushi tshɛ, anangɛso ndo akadiyɛso efula mpomanaka la lɔsɔkɔ, ɔlɔshamelo ndo la wendjodi oma le ase nkumbo, asekawɔ wa l’olimu kana wa la kalasa. (Mat. 10:35; Joa. 15:20) Ondo ndo sho mbahomana l’awui asɔ. Lo wedi okina, mbeyaka monga ko tekɔ lo ndɔshana la hemɔ, kana tekɔ lo sala la wolo lushi la lushi dia mbewɔ awui wekola yimba ndo wakoka mbidja mbetawɔ ndo ekikelo kaso l’ohemba. Sho kokaka kondja wolo wa mbikikɛ lo sɛdingolaka bɛnyɛlɔ di’ekambi wa kɔlamelo wa lo nshi y’edjedja ndo di’asekaso Akristo wa nshi nyɛ wakahomana ndo wakatondoya ekakatanu.—1 Pet. 5:9.
3 Sho kokaka kondja wolo wa tetemala l’olimu aso lo ndjashikikɛ dia ‘tambɔlɔta ɛlɔtɔ tshɛ wa ta wa Nzambi.’ (Ef. 6:10-13, 15) Dɔmbɛlɔ diekɔ nto ohomba dia sho monga la ekikelo. Nzambi toshaka nyuma kande k’ekila dia sho mbikikɛ ehemba. (2 Kor. 6:4-7) Dia sho tondoya lo ta diaso dia lo nyuma dialɔso, sho pombaka kitanyiya waohwelo waki Nzambi watɔlɔmba dia mpiloya timba taso. (Osam. 119:24, 85-88) Oko wakoka ɔna mbadia mukanda w’oma le she ka ngandji mbala ko mbala, mbele wadielo wa Bible wa lushi la lushi keketshaka diɔtɔnganelo diasaso la Jehowa. Sho kondjaka lomba dia ndɔshana l’ehemba l’ekimanyielo ka wekelo w’onto ndamɛ ndo lo mbetawɔ dia tokanyi taki Nzambi monga la shɛngiya lo tɛdikɔ taso ndo keketsha olowanyi aso otsha le Jehowa.—Tuk. 2:10, 11.
4 Ekikelo mbelaka ɛtshɔkɔ: Lo ɛnyɛlɔ ka Paulo, ekikelo kaso ka la kɔlamelo etena kakambaso olimu aso ngɛnyangɛnyaka otema wa Jehowa ndo têlaka sho l’anto akina ɛtshɔkɔ. (Tuk. 27:11) Toyashikikɛ dia tetemala sambisha, lo mɛnya dia mbetawɔ kaso kekɔ nge ndo ɔnɛ tɔ ‘ndeka paonyi katoshishɔka kânga mbele tɔ kakahembama la dja oshinga wolo.’—1 Pet. 1:6, 7.