Tokambe la Bible dimɛna
1. Lande na kele Bible ohomba efula?
1 Kamba dimɛna l’Ɔtɛkɛta waki Nzambi wakasambiyama tokimanyiyaka dia sambisha ndo mbetsha akambo wa mɛtɛ lo yoho yokɛma hwe ndo tondja wetshelo wa kashi la mbekelo y’anto sɛkɛ.—2 Tim. 2:15; 1 Pet. 3:15.
2. Kakɔna kayotokimanyiya dia mbisholaka avɛsa esadi eto?
2 Toleke ndjaekesanyiya la Bible: Lo kɛnɛ kendana la dihomɔ, onto mongaka la diewo dia kamba la ehomɔ kɛmɔtshi lo ndeka ndjaekesanyiya la tɔ. Mbadia Bible oma l’etatelo polo l’ekomelo ayokosha lokanyi la lo tshena pe lendana la ɔtɛ a dui wa Bible. Dui sɔ diayokokimanyiya nto dia mbohɔka avɛsa ndo mbasholaka esadi eto. Naka wɛ ndeka ndjaekesanyiya l’Afundelo, kete wɛ ayɔtɛkɛtaka la wangasanu ndo la dietawɔ di’efula etena kayoyosambishaka anto akina lo tshakitudi ndo lo toho tokina.—1 Tes. 1:5.
3, 4. a) Naa toho tɔmɔtshi takokaso ndeka ndjaekesanyiya la Bible? b) Onde tambokambaka la toho tokina dia sho ndeka ndjaekesanyiya l’Afundelo?
3 Tonge la mbekelo ka mbifolaka Bible ndo ndjelaka wadielo atɔ lo nsanganya ya l’etshumanelo. Etena kasalaso wekelo w’onto ndamɛ ndo kalɔngɔsɔlaso nsanganya ya l’etshumanelo, toyangake avɛsa woshilami ndo tokanake yimba lo yoho yakokaso kamba la wɔ olimu. Anto efula wambɛna dia mbadiaka avɛsa oma lo Bible lo dihole dia mbadiaka oma lo ɔrdinatɛrɛ kana oma lo dikatshi mbakimanyiyaka dia vɔ ndjowashola etena kayowoyonga l’ohomba awɔ l’esambishelo.—Joa. 14:26.
4 Nkumbo mɔtshi yakasɔnɛ etena kɛmɔtshi ka vɔ kimɛka avɛsa wa lo Bible. Vɔ wakasalaka ngasɔ lo kambaka la tokatshikatshi tele la avɛsa lo wedi ɔmɔtshi ko lo wedi okina vɔ funda awui wa lo avɛsa akɔ. Vɔ wakatɔngɔnaka tokatshikatshi takɔ l’ɔnɔngɔ dia menda kana vɔ kokaka shila avɛsa akɔ kana mbohɔ ahole watanemawɔ. Mvusola mbɔtwɛlɔ yakamba la so l’esambishelo ndo mbekola wekamu kana kadimola dimbola lo kamba la Bible fudiaka nto diewo diaso.
5. Lande na kahombaso fudia diewo diaso dia kamba la Bible?
5 Ndoko dibuku ɔtɔi diakoka mbɛdikama la Bible. Efundelo wa lɔkɔ eto mbakoka mbetɛ anto ‘akanga a tomba dikambo dia panda.’ (2 Tim. 3:15) Lam’ele anto efula wa lo ɛtshi kaso ka nkɛtɛ hawoleke mbeya awui w’ohomba efula wele lo Bible, tekɔ l’ɔkɔkɔ w’oshika wa ndeka fudia diewo diaso dia mbaewoya losango lele lɔkɔ.—Tuk. 2:1-5.