Onde tamboyalɔngɔsɔla dia nsambisha lo tshakitudi?
1. Ɛnyɛlɔ kakɔna kɛnya dia esambishelo ka lo tshakitudi kokaka monga l’etombelo w’ɛlɔlɔ?
1 Esambishelo ka lo tshakitudi kokaka monga l’etombelo w’ɛlɔlɔ. Bible ndola tɔɔ la bɛnyɛlɔ di’anto wakakondja etombelo w’ɛlɔlɔ lo nsambisha lo tshakitudi. (Joa. 4:7-15) Kakɔna kakokaso nsala dia ndjâlɔngɔsɔla dia woho w’esambishelo kɛsɔ?
2. Ngande wakoka ɛnamelo kaso tokimanyiya dia nsambisha?
2 Ɔlɔtɔ ndo ɔlɔngɔswɛlɔ wa divo: Mbidjaka yimba dimɛna mbala tshɛ lo ɔlɔtɔ ndo lo ɔlɔngɔswɛlɔ aso wa divo ayotokimanyiya dia sho nsambisha anto akina awui wendana la dietawɔ diaso. (1 Tim. 2:9, 10) Naka tambɛna dia ɛnamelo kaso hasha Jehowa kɛnɛmɔ, kete ondo sho kokaka mengenga dia nsambisha. Koko, monga kɔmba ndo pudipudi kokaka ntshutshuya anto akina dia vɔ mimbola lande na kɔlɔtshiso dimɛna. Ɛnyɛlɔ, etena kakawatandaka lɔkɛndɔ, atshukanyi amɔtshi w’Ɛmɛnyi wa Jehowa wakalɔtɛ dimɛna ndo wakadjasɛ suke la pami kakɔ kɛmɔtshi k’ose Mizilima. Lo mɛna ɛnamelo kawɔ, pami kakɔ akawambola dia kana vɔ wekɔ Akristo. Dui sɔ diakakonya lo vɔ nkɛtshanya awui wa lo Bible wenya esato w’etondo wa tango.
3. Lo ndjela ɛnyɛlɔ ka Yeso, ngande wakayatatshiya sawo dimɔtshi?
3 Woho wa ntatshiya asawo: Etena kakatane womoto ɔmɔtshi l’ose Samariya Yeso l’ɛtɛkɔ k’ashi ka Jakɔbɔ, Yeso akatatshiya sawo lo mbɔlɔmba tsho ashi wa nnɔ. Woho akɔ wâmɛ mbele, sho kokaka ntatshiya sawo lo mbutɛ onto vuiwui mɔtshi kana lo mbôka dimbola dimɔtshi dia wɔdu. Kânga mbakokaso mengenga tena dimɔtshi, naka sho ndjaɛkɛ lo ekimanyielo ka Jehowa, kete sho kokaka ‘nkondja dihonga’ dia ntatshiya sawo.—1 Tes. 2:2.
4. Ngande wakokaso ndjalɔngɔsɔla dia nsambisha lo tshakitudi?
4 Toyange waaso wa nsambisha lo tshakitudi: Apandjudi efula wakatane toho ta nsambisha lo tshakitudi. Tonyomɔsɛdingola akambo wele la so ndo tokane yimba lo kɛnɛ kendana l’anto wahomana la so lushi la lushi. Totshɔke l’ekanda wasungana ndo la Bible ka tshitshɛ. Toshishimake kɛnɛ keta ndo toyashake le anto wotodingi. Naka sho takanyi yimba lo waaso wakokaso nkondja lo lushi, kete ondo sho mbeyaka ndjalɔngɔsɔla dia nsambisha dimɛna.—Fil. 1:12-14; 1 Pet. 3:15.
5. Lande na kahatahombe nsambisha lo tshakitudi paka naka tambotana etena?
5 Tekɔ la ɛkɔkɔ ehende w’eshika watotshutshuya dia nsambisha lo tshakitudi, ɛkɔkɔ akɔ ko: ngandji kokaso Nzambi ndo kokaso anyaso anto. (Mat. 22:37-39) Lam’ele olimu w’esambishelo pombaka nkambema la shamanya, hatohombe nsambisha lo tshakitudi paka naka tambotana etena. Sho pombaka ndjalɔngɔsɔla dia nkamba la waaso w’eshika tshɛ dia nsambisha anto akina lokumu l’ɔlɔlɔ la Diolelo kam’ekende suke.—Romo 10:13, 14; 2 Tim. 4:2.