Toyasha Tshɛ dia ‘Sambisha Dimɛna Dimɛna’
1, 2. Kakɔna kakambia lo menda woho wakɔsaka Paulo esambishelo ka lokumu l’ɔlɔlɔ, ndo ngande wakokaso mbokoya ɛnyɛlɔ kande ka ‘sambisha dimɛna dimɛna’?
1 L’ɛnyɛlɔ kaki Yeso nde l’ekambi ekina wa kɔlamelo wa lo nshi y’edjedja, ɔpɔstɔlɔ Paulo aki osambisha wa lokumu l’ɔlɔlɔ waki l’ohetoheto, ‘wakasambishaka dimɛna dimɛna’ lo dihole tshɛ diakinde. Kânga lam’akinde lo lokanu, nde “akalungula antu tshe wakayakaka le ndi. Ndi akâsambisha dia diulelu dia [Nzambi]; akawaetshaka akambu wa khumadiondjo Jesu Kristu la dihunga tshe.”—Etsha 28:16-31.
2 Sho lawɔ kokaka ndjasha tshɛ dia ‘sambisha dimɛna dimɛna’ lo tena tshɛ. Dui sɔ mɛnyaka dia sho pombaka sambisha anto wahomana la so lam’atatatshu ndo lam’ayatakalola oma lo Losanganya la Distrikɛ lele l’ɔtɛ a dui ɔnɛ: “Tosha Nzambi Lotombo” ndo l’edja tshɛ keso l’osomba wasalema losanganya.—Etsha 28:23; Osam. 145:10-13.
3. Ngande wakokaso mbewɔ di’aha esambishelo kaso ka lo tshakitudi ndjonga oko ka shashimuya?
3 Esambishelo ka la Shashimuya Kana ka lo Tshakitudi? Onde otshikitanu wekɔ lam’asa weho ɛsɔ ehende w’esambishelo? Eelo. Dui dia shashimuya ekɔ dui diasalema lo shansɛ kana aha l’onto sangoya disala. Diɔ diekɔ oko dui diahawatakonge la ntondo kana diele bu ohomba efula. Olimu aso w’esambishelo bu ngasɔ. Oko wakidiɔ lo dikambo dia Paulo, mbisha Nzambi lotombo oma l’esambishelo kaso ekɔ ohomba le so, ndo sho la dia kanyiyaka dia sambishaka dihole tshɛ diasungana lam’eso lo lɔkɛndɔ. Koko, yoho yasambishaso anto koka mbutama ɔnɛ ekɔ lo tshakitudi, mbut’ate sho salaka dui sɔ la wangasanu ndo la lɔngɛnyi tshɛ. Yoho ya sambisha shɔ koka monga l’etombelo w’amɛna.
4. Kakɔna kakakimanyiya Paulo dia sambisha lɛnɛ akandadjasɛka?
4 Totayalɔngɔsɔdi dia Tosambisha: Paulo akahombaka nyanga waaso wa sambisha kânga lam’akinde lo lokanu la Rɔma. Nde akɔshi yɛdikɔ ya mbelɛ ewandji w’ase Juda lakande. (Etsha 28:17) Kânga mbaki etshumanelo kɛmɔtshi k’Akristo la Rɔma, Paulo akeyaka dia tshunda di’ase Juda diaki l’osomba ɔsɔ kombeyaka awui efula lo dikambo dia mbetawɔ k’Okristo. (Etsha 28:22; Romo 1:7) Nde kopekɔ dia ‘sambisha dimɛna dimɛna’ awui wendana la Yeso Kristo ndo la Diolelo dia Nzambi.
5, 6. Waaso akɔna wakokaso kondja dia sambisha lo tshakitudi, ndo ngande wakokɛ ndjalɔngɔsɔla dia sala dikambo sɔ dimɛna?
5 Kanyiya dikambo di’anto tshɛ wayohomana la yɛ l’anto watayeteteta wele vɔ haweye Ɛmɛnyi wa Jehowa dimɛna. Mbala mɔtshi ko haweye dia sho mbekaka l’anto Bible ofele. Yanga waaso wa sambisha wanɛ wahomana la yɛ lam’eyɛ lo lɔkɛndɔ, lam’omuyayɛ, lam’adjɛ esasɛ lo mutuka, lam’ahangayɛ l’ɔtɛlɛ, lam’alɛyɛ lo rɛstora, lam’eyɛ lo mutuka wɛmba anto tshɛ, ndo lo waaso akina. Tayashikike kɛnɛ kayoyota dia tatɛ sawo ndo dia sambisha onto lo tshena pe. Ondo lo nshi yayaye, wɛ koka pemba lo sambisha osukanyi ayɛ, ewotɔ ayɛ, asekayɛ wa l’olimu, kana angɛnyi ayɛ akina lo tshakitudi.
6 Wɛ la dia monga l’ekanda ɛmɔtshi dia kamba la wɔ etena katayasambisha lo tshakitudi. Ko oko ekanda akɔna? Wɛ koka kamba la traktɛ tshɛ katanema. Naka traktɛ Aimeriez–vous en savoir plus sur la Bible? kekɔ, kete ka epole ɔsɛkɛ lo edingɔ etanu wa ntondo, lɛnɛ oshawɔ toshadiya totshikitanyi tɛnya ohomba wa mbadia Bible. Ɛnyande dihole diahombande funda lokombo ndo adrɛsɛ ande dia nɔmba wekelo wa Bible. Naka wɛ ambohomana l’onto ɔmɔtshi ambetawɔ, ko wɛ mbosha biukubuku Katɔlɔmba. Dia wɛ ndjalɔngɔsɔla dikambo di’anto watɛkɛta ɔtɛkɛta okina wayohomana la yɛ, tɔshi traktɛ, tobukubuku kana periodikɛ ya l’ɛtɛkɛta watɛkɛtama l’ahole akina. Naka lo mutuka mbatayande lɔkɛndɔ, kete wɛ kokaka mɛmba yema y’ekanda ekina dikambo dia wanɛ wɛnya wahɔ wa mɛtɛ lo losango la Diolelo.
7, 8. Dako diakɔna diendana la ɛnamelo ndo lɔkɛwɔ laso diahombaso kitanyiya etena keso lo lɔkɛndɔ ndo keso lo tɔkɛnyɔ?
7 Sɛdingola Ɛnamelo ndo Lɔkɛwɔ Layɛ: Sho la dia ndjashikikɛ dia lɔkɛwɔ, ɔlɔtɔ ndo wonyelo aso wa divo hatosha anto akina kanyi ya kɔlɔ kana mbakonya dia tɛkɛta kɔlɔ lo lokombo l’etshumanelo ka Jehowa. (Etsha 28:22) Sho la dia mbidja yimba lo dui sɔ aha tsho lam’ɔtɔso lo losanganya la woke koko Kânga lam’atatande lɔkɛndɔ kana lo wenya wa tɔkɛnyɔ. Tshoto y’Etangelo ya Ngɔndɔ k’Enanɛi 1, 2002, lɛkɛ 30, odingɔ 14, tolakaka ɔnɛ: “Sho pombaka ndjâlɔtshiyaka ‘la ndjakitshakitsha ndo la yimba y’ɔlɔlɔ.’ Dui sɔ nembetshiyaka dia hatohombe ndɔta lo yoho y’epakapaka, lo yoho y’emula nsaki ya dieyanelo, lo yoho ya tshika tenyi dimɔtshi dia demba diahomba kombama l’andja kana lo yoho ya kawotake. Ndo nto, sho pombaka ndɔta lo yoho yɛnya dia sho ‘mbokaka Nzambi wɔma.’ Kema ɔsɔ ekɔ dikambo dia kana yimba? Dikambo diele lanɛ ele aha otsha lo nsanganya ya l’etshumanelo tsho mbahombaso ndɔtaka yoho ya dimɛna ko minya yimba lo dikambo sɔ lo tena dikina. Ɛnamelo kaso pombaka mɛnyaka wonya tshɛ dia tekɔ anto woka Nzambi wɔma ndo wayasha nɛmɔ nɛ dia tekɔ ekambi waki Nzambi wenya akɔ 24 tshɛ wa lo lushi.”—1Tim. 2:9, 10.
8 Sho la dia ndɔta la kiɔmba ndo la kiɔmi. Naka ɛnamelo ndo lɔkɛwɔ laso mɛnyaka nshi tshɛ mbetawɔ kele laso le Nzambi, kete hatohekɔki dia sambisha lo tshakitudi l’ɔtɛ w’ɔnɛ ɛnamelo kaso bu dimɛna.—1 Pet. 3:15
9. Naa etombelo w’ɔlɔlɔ wendana l’esambishelo wakakondja Paulo la Rɔma?
9 Esambishelo ka lo Tshakitudi Kekɔ l’Etombelo w’Ɔlɔlɔ: L’ɛnɔnyi ehende waki Paulo lo lokanu la Rɔma, nde akɛnyi etombelo w’ɔlɔlɔ w’oma lo welo wakandadje dia sambisha. Luka akate dia ‘amɔtshi wakatatɛ mbetawɔ akambo wakandate.’ (Etsha 28:24) Paulo ndamɛ akɛnya etombelo w’oma lo woho ‘wakandasambisha dimɛna dimɛna’ lam’akandafunde ate: “[Akambo ami wakayala dia fudia lokumu l’ɔlɔlɔ]. Okone kanu yami yambenama le alami tshe wa lu luudu l’elumbwelu la le akina tshe ati: Yo yeko dikambu dia Kristu. Anyasu wuleki efula le Khumadiondjo, wambukikitshama ne dia kanu yami, wambuleka mvuta diui dia [Nzambi] la dihunga, aha la woma.”—Fil. 1:12-14.
10. Naa etombelo w’ɔlɔlɔ wendana l’esambishelo wakakondja atshukanyi amɔtshi ɔnɔnyi wetshi?
10 Ɔnɔnyi wetshi, oma l’ɔkɔngɔ wa vɔ mbetsha lushi l’otondo lo losanganya la distrikɛ, atshukanyi amɔtshi wakasambisha dimɛna womoto ɔmɔtshi lakakambaka l’ɔtɛlɛ lakawaoke wombola wendana la totshapa ta losanganya takawalɔtɛ. Vɔ wakasawola la nde dikambo dia losanganya ndo dikambo di’elongamelo kasha Bible lo kɛnɛ kendana la nshi yayaye. Vɔ wakawosha traktɛ Aimeriez–vous en savoir plus sur la Bible? ndo wakolembetshiya woho wekawɔ l’anto Bible ofele. Womoto ɔsɔ akate dia nde nangaka onto ɔmɔtshi ndja ndjowenda lakande, ndo womoto akɔ akafunde lokombo ndo adrɛsɛ ande lo lɛkɛ l’ekomelo la traktɛ kɛsɔ ndo akalɔmbɛ di’atshukanyi asɔ mbɔsa tɛdikɔ tɔmɔtshi lo kɛnɛ kendana la dikambo sɔ. Ɔnɔnyi ɔnɛ, wɛ ayokondja etombelo w’ɔlɔlɔ efula lo monga l’etete dia ‘sambisha dimɛna dimɛna’?
11. Naa waonga wahomba monga laso dia tɔla lokumu l’ɔlɔlɔ otsha la ntondo l’ɔwɔ ɔnɛ lo ‘sambisha dimɛna dimɛna’ na?
11 Tosale Tshɛ dia Tɔla Lokumu l’Ɔlɔlɔ Otsha la Ntondo: Ohokanyiya ɔngɛnɔngɛnɔ waki la Paulo lam’akandoke di’Akristo wakohokamɛka wamboyela ɛnyɛlɔ kande k’ohetoheto! Nyɛsɔ tosale tshɛ dia tɔla lokumu l’ɔlɔlɔ otsha la ntondo lo sambisha lo tshakitudi awui wendana la mbetawɔ kaso k’oma lo Bible oko wayotokondja wahɔ oma lo losanganya la distrikɛ l’ɔnɔnyi ɔnɛ.
[Kiombo ya lo lɛkɛ 3]
Ekanda Wele Ohomba Dikambo di’Esambishelo ka lo Tshakitudi
■ Aimeriez–vous en savoir plus sur la Bible? (traktɛ)
■ Kakɔna Katɔlɔmba Nzambi? (biukubuku)
■ Traktɛ l’ɛtɛkɛta ekina
■ Ekanda ekina
[Kiombo ya lo lɛkɛ 4]
Tatowaohɛke!
Waa na? Wanɛ tshɛ wayasha l’akambo wa mɛtɛ wakɔtɔ lo Eohwelo ka nyɔi ka Kristo kana lo sawo dia lânde. Onde tambowaelɛ dia vɔ ndjɔtɔ lo losanganya la distrikɛ l’ɔnɔnyi ɔnɛ? Ondo efula l’atei wayoya naka sho mbakeketsha la ngandji tshɛ. Vɔ wayoyasukanya efula otsha le Jehowa ndo l’ɔlɔngɔswamelo ande oma lo lɔngɛnyi lakeketsha layonga lawɔ ndo oma l’ekeketshelo ka lo nyuma kayowolongola lo losanganya lɔsɔ. Ko lande na kahayete anto amɔtshi ko wɛ menda kana vɔ wayetawɔ ndja na? Ewoyawɔ kɛnɛ tshɛ kahombama, mbidja ndo datɛ la dihole diayosalema losanganya, wenya watatɛ ndo wakomɛ tenyi dia losanganya, ndo mbɛnya ɛtɛ ɛmɔtshi w’asawo wele lo lɛkɛ la komelo la Réveillez-vous! wa Ngɔndɔ ka Samalo 8, 2003.