Onde wɛ ayotatɛ mbeka l’onto ɔmɔtshi Bible
lo Ngɔndɔ ka dikumi?
1. Kakɔna kayotosha anto lo Ngɔndɔ ka dikumi?
1 Ngɔndɔ ka dikumi tayosha anto Tshoto y’Etangelo la Réveillez-vous ! Dia sho mbesa nsaki kɛnyisha onto, sho keketshamaka dia mbosha traktɛ kele l’ɔtɛ a dui ɔnɛ: Onde wɛ nangaka mbeya akambo wa mɛtɛ? ndo nsala la wolo dia ntatɛ mbeka la nde Bible. Ngande wakokaso nsala dikambo sɔ lo wendelo w’oyoyo?
2. Ngande wakokaso nkamba la traktɛ Mbeya akambo wa mɛtɛ dia ntatɛ wekelo wa Bible etena kasalaso wendelo w’oyoyo le onto ɔmɔtshi laketawɔ periodikɛ yaso?
2 Woho wa nkamba la traktɛ: Wɛ kokaka mbuta ɔnɛ: “Periodikɛ kakamakotshikɛ mbala ketshi keketshaka weho w’anto tshɛ ndo wa l’ɛtɛmwɛlɔ tshɛ dia vɔ mbeka Bible. [Tshuma ompokami ayɛ traktɛ Mbeya akambo wa mɛtɛ ndo ɛnyande ambola wele lâdiko.] Lanɛ sho tanaka ambola amɔtshi w’ohomba wele Bible mbishaka ekadimwelo w’amɛna. Onde wɛ atayambolaka kânga dimbola ɔtɔi lo ambola wele lanɛ?” L’ɔkɔngɔ w’ompokami ayɛ nkadimola, nyɔsɛdingole kâmɛ lo traktɛ okadimwelo woshami wa dimbola diande dimɔtshi, ndo nyadia divɛsa dimɔtshi dioshilami. Oma lâsɔ, tɛnde wate ɔnɛ ekɔ tsho dikambo ɔtɔi l’atei w’akambo wetsha Bible, ndo shande dibuku Bible etshatɔ. Oma lâsɔ, wɛ kokaka nkɛtshanya la nde edingɔ wele l’etatelo ka tshapita yɔsɔnyinde oma lo ɛtɛ w’awui. Kana wɛ kokaka mbifola lɛnɛ atanema awui efula wendana la dikambo diakanyakɛtshanya lo traktɛ. Rɛferasɛ ɛmɔtshi wakokaso nkamba la wɔ vɔɛnɛ:
● Onde Nzambi tokanɛka mɛtɛ? (lɛkɛ 9-11, od. 6-10)
● Onde ata la asui wayoshila lushi lɔmɔtshi? (lɛkɛ 12, od. 12-13)
● Ngande wayalaso lam’avɔso? (lɛkɛ 59-60, od. 7-8)
● Onde elongamelo kɛmɔ kekɔ lo dikambo dia wavɔ? (lɛkɛ 71, od. 13-15)
● Ngande wakokami nɔmba dia Nzambi mbokami? (lɛkɛ 166-167, od. 5-8)
● Ngande wakokami monga la ɔngɛnɔngɛnɔ lo lɔsɛnɔ? (lɛkɛ 9, od. 4-5)
3. Ngande wakokaso nkamba la toho totshikitanyi dia nsambisha lo ndjela awui wele la onto?
3 Lo mɛtɛ, naka awui wele l’onto hatosha diaaso dia sho ntatshiya ndo mbɛnya woho wekaso l’anto Bible lo tshimbo ya dibuku Bible etshatɔ lo wendelo w’oyoyo wa ntondo, kete sho kokaka mbokana la nde dia ndjokalola ndo ndjotetemala ɔkɛtshanyelo la nde. Lo ndjela nsaki kɛnyisha onto, sho kokaka nkɛtshanya la nde ambola efula wele lo traktɛ lo nsala wendelo wotshikitanyi la ntondo ka sho ndjotatɛ mbeka la nde dibuku. Nyɛsɔ tokambe dimɛna la traktɛ kɛnɛ lo Ngɔndɔ ka dikumi dia ntatshiya wekelo wa Bible ndo dia nkimanyiya anto wele l’etema w’ɛlɔlɔ dia vɔ ‘mbeya akambo wa mɛtɛ.’—Joa. 8:31, 32.