Tokambe la lɔsɛnɔ laso dia ntombola Jehowa!

Lɔsɛnɔ ekɔ woshasha wa nɛmɔ. Woho wakambaso la woshasha ɔnɛ lushi tshɛ mɛnyaka dia sho mbɔngɛnangɛnaka efula. Oko weso Ɛmɛnyi wa Jehowa, sho salaka la wolo dia nkamba la diewo ndo akoka aso dia ntombola Jehowa lele Ombishi wa lɔsɛnɔ. (Os 36:9; Ɛny 4:11) Koko, ekiyanu wendana la lɔsɛnɔ la lushi la lushi lo andja ɔnɛ wa kɔlɔ koka esadi eto nkaloya eyango wa lo nyuma ɛkɔngɔ ɛkɔngɔ. (Mak 4:18, 19) Ayonga dimɛna di’onto tshɛ la l’atei aso ndjambola ɔnɛ: ‘Onde dimi mbishaka Jehowa kɛnɛ koleki dimɛna kele la mi? (Hɔs 14:2) Lo woho akɔna wele olimu ami wekɔ la shɛngiya l’olimu wakambɛmi Jehowa? Naa eyango ami wa lo nyuma? Ngande wakokami nyomofudia olimu ami w’esambishelo?’ Naka wɛ ekɔ lo mɛna dihole dimɔtshi diakokayɛ mpama, kete lɔmba Jehowa dia kosha ekimanyielo ndo sala etshikitanu wahombama. Aha la taamu, tombola Jehowa lushi la lushi konyaka lo lɔsɛnɔ l’oshika ndo lele l’ɔngɛnɔngɛnɔ!​—Os 61:8.

NYENDE VIDƐO YELE L’ƆTƐ A DUI ƆNƐ: KAMBA LA AKOKA AYƐ DIKAMBO DIA JEHOWA, NDO OMA LAASƆ NYOKADIMOLE LO AMBOLA WAYELA ANƐ:

• Lande na kele bu dui dia lomba dia nambola akoka ayɛ lo andja waki Satana? (1Jn 2:17)

• Ɛtshɔkɔ akɔna wakondja wanɛ washa Jehowa kɛnɛ koleki dimɛna kele la wɔ?

• Lo awui akɔna wa lo olimu w’ekila wakokayɛ nkimɔ diewo ndo akokayɛ la lolango?