Ɛlɔngɔlɔngɔ le​—Nyonge la “ohetoheto lo etsha w’ɛlɔlɔ”

Lo mukanda wakandafundɛ Tito, ɔpɔstɔlɔ Pɔɔlɔ akafunde di’ɛlɔngɔlɔngɔ mbidja ndo Tito nsala la wolo dia monga ‘ɛnyɛlɔ k’onto lele l’etsha w’ɛlɔlɔ l’akambo tshɛ.’ (Tit 2:6, 7) Lo tshapita yakɔ yaamɛ, nde akayɛnya dia Yeso akahombe mbɛdia ekambi wa Jehowa dia vɔ monga “la ohetoheto lo etsha w’ɛlɔlɔ.” (Tit 2:14) Olimu ɔmɔtshi l’atei w’elimu w’ɛlɔlɔ ɛsɔ ele, nsambisha ndo mbetsha anto awui wendana la Diolelo dia Nzambi. Naka wɛ ekɔ ɔlɔngɔlɔngɔ, onde wɛ hakoke nkamba la wolo ayɛ w’ɔlɔngɔlɔngɔ dia monga ombatshi mboka wa tshanda kana wa pondjo?—Tok 20:29.

Naka wɛ nangaka monga ombatshi mboka, kete wɛ pombaka ndjakongɛ ntondo ka wɛ nkamba olimu ɔsɔ. (Luk 14:28-30) Ɛnyɛlɔ, ngande wayoyokondjaka falanga yakoka kokimanyiya dia nkotsha ehombayɛ, etena kakambayɛ olimu wa lo tena tshɛ? Ngande wayoyokotshaka wenya walɔmbama? Lɔmba Jehowa dia kokimanyiya. (Os 37:5) Kɛtshanya l’ambutshi ayɛ ndo wanɛ wambotondoyaka l’olimu ɔsɔ dikambo di’ekongelo kayɛ. Oma laasɔ, ko wɛ nsala awui wahombama dia nkotsha oyango ayɛ. Jehowa ayɔtshɔkɔla welo wadjayɛ l’ohetoheto tshɛ l’olimu ande!

NYENDE VIDƐO YELE L’ƆTƐ A DUI ƆNƐ: ƐLƆNGƆLƆNGƆ WATOMBOLA JEHOWA NDO OMA LAASƆ, NYOKADIMOLE LO AMBOLA WAYELA ANƐ:

• Ekakatanu akɔna wakatondoya anangɛso l’akadiyɛso dia monga ambatshi mboka ndo ngande wakawasale dikambo sɔ?

• Ngande wakoka ambutshi nkimanyiya anawɔ dia monga ambatshi mboka wa pondjo?

• Lande na kele monga l’ekongelo kendana l’esambishelo ekɔ ohomba?

• Ngande wakoka ase etshumanelo akina nkeketsha ndo nkimanyiya ambatshi mboka?

• Ɛtshɔkɔ akɔna wakondja ambatshi mboka?