Onga l’ɔngɛnɔngɛnɔ w’efula waya lo mbisha

1-2. Wahɔ akɔna wakondjaso lo woho wakatatongama la dikoka dia ndeka monga l’ɔngɛnɔngɛnɔ lo kahɛka anto akina oleki lo nongolaka?

ETENA kakatonge Jehowa anto, nde akaatonge la dikoka dia ndeka monga l’ɔngɛnɔngɛnɔ lo kahaka oleki ɔngɛnɔngɛnɔ waya lo nongola. (Ets. 20:35) Ko onde kɛsɔ nangaka mɛnya dia hatoyala l’ɔngɛnɔngɛnɔ etena katokahɛwɔ ɛngɔ? Aha ngasɔ. Sho tshɛ mbeyaka dia sho mongaka l’ɔngɛnɔngɛnɔ etena katosha onto ɛngɔ. Koko, sho ndekaka monga l’ɔngɛnɔngɛnɔ etena kakahaso. Ndo lo mɛtɛ, ekɔ di’ɔlɔlɔ aso mbakatotonge Jehowa ngasɔ. Lande na?

² Lo totonga woho wakandatotonge, Jehowa tshikaka dia shoamɛ mfudia ɔngɛnɔngɛnɔ aso. Sho koka mfudia ɔngɛnɔngɛnɔ aso lo nyanga waaso wa monga la lokaho. Shi ekɔ dui dia dimɛna efula lo woho wakatotonge Jehowa ngasɔ?—Os. 139:14.

3. Lande na kakoka Jehowa mbelamɛ “Nzambi k’ɔngɛnɔngɛnɔ”?

³ Afundelo toshikikɛka dia nkaha mbishaka ɔngɛnɔngɛnɔ, diakɔ diele mbokɛmaka hwe woho wata Bible dia Jehowa ekɔ “Nzambi k’ɔngɛnɔngɛnɔ.” (1 Tim. 1:11) Nde mbele kiɔkɔ ya lokaho ndo Onto loleki tshɛ nkaha. Ɔpɔstɔlɔ Pɔɔlɔ akate dia “oma le nde mbeso la lɔsɛnɔ, mbakɛndakɛndaso ndo mbeso lo andja ɔnɛ.” (Ets. 17:28) Lo mɛtɛ, oma le Jehowa mbaya “losha tshɛ l’ɔlɔlɔ ndo woshasha tshɛ wa kokele.”—Jak. 1:17.

4. Kakɔna kayotokimanyiya dia ndeka monga l’ɔngɛnɔngɛnɔ?

⁴ Ondo sho tshɛ nangaka ndeka monga l’ɔngɛnɔngɛnɔ waya lo nkaha. Sho koka nsala dui sɔ lo mbokoya lokaho la Jehowa. (Ɛf. 5:1) Etena kasɛdingolaso dui sɔ, tende kɛnɛ kakokaso nsala naka anto akina hawotosha losaka etena kakahɛso. Waohwelo asɔ wayotokimanyiya dia nama ndo kaanga mfudia ɔngɛnɔngɛnɔ aso lo monga la lokaho.

TOKOYA LOKAHO LA JEHOWA

5. Diangɔ diakɔna dia l’emunyi diatosha Jehowa?

⁵ Toho takɔna tɔmɔtshi tɛnya Jehowa lokaho? Tɔsɛdingole bɛnyɛlɔ dimɔtshi. Jehowa toshaka diangɔ dia l’emunyi. Koka monga ko hatɔkɛ lo dɛngɔ, koko diɛsɛ la Jehowa, efula ka l’atei aso tekɔ la kɛnɛ kele la so ohomba. Ɛnyɛlɔ, nde salaka dia sho monga la mbo ya ndɛ, ahɔndɔ ndo dihole dia ndala. (Os. 4:8; Mat. 6:​31-33; 1 Tim. 6:​6-8) Onde la wolo mbatosha Jehowa diangɔ dia l’emunyi? Ndooko! Lande na katosha Jehowa diangɔ sɔ?

6. Wetshelo akɔna wakondjaso oma lo Mateo 6:​25, 26?

⁶ Jehowa toshaka diangɔ dia l’emunyi nɛ dia nde tokaka ngandji. Tende ɛtɛkɛta wa Yeso wele lo Mateo 6:​25, 26. (Adia.) Yeso akakambe l’ɛnyɛlɔ k’oma lo diangɔ diakatongama. Lo ntɛkɛta dikambo dia tofudu, Yeso akate ate: “Tɔ hatoonɛ, hatone ndo hatoombe diangɔ l’odiko.” Koko, tende kɛnɛ kakandakotsha ate: “Shɛnyu lele l’olongo tileshaka.” Oma laasɔ, Yeso akambola ate: “Onde nyu hanyoleki tofudu nɛmɔ?” Akandalange tetsha? Wetshelo ele Jehowa mbɔsaka di’ekambi ande wekɔ la nɛmɔ ndeka waa nyama. Lam’ele Jehowa kotshɛka waa nyama ehomba ayɔ, sho koka monga l’eshikikelo dia nde ayotokotshɛ ehomba aso! L’ɛnyɛlɔ k’ombutshi wa pami, ngandji mbatshutshuya Jehowa dia kotshɛ ase nkumbo kande ehomba awɔ.—Os. 145:16; Mat. 6:32.

7. Naa yoho mɔtshi yakokaso mbokoya lokaho la Jehowa? (Enda ndo osato.)

⁷ L’ɛnyɛlɔ ka Jehowa, ngandji koka totshutshuya dia mbisha anto akina diangɔ dia l’emunyi diewɔ la diɔ ohomba. Ɛnyɛlɔ, onde wɛ mbeyaka ɔnangɛso kana kadiyɛso kɛmɔtshi kele l’ohomba wa yangɔ ya ndɛ kana dihɔndɔ? Jehowa koka nkamba la yɛ dia mbokimanyiya. Ekambi wa Jehowa mbeyamaka dimɛna lo woho wongawɔ la lokaho etena kasalema mpokoso. Ɛnyɛlɔ, lo nshi ya hemɔ ka COVID-19, anangɛso l’akadiyɛso wakasha wanɛ waki lo dihombo mbo ya ndɛ, ahɔndɔ ndo diangɔ dikina. Efula wakakimɔ la lokaho tshɛ falanga dia nsukɛ olimu w’esambishelo wa l’andja w’otondo. Falanga shɔ yakakambema dia nkimanyiya anangɛso l’akadiyɛso wa l’andja w’otondo waki lo dihombo. Anangɛso l’akadiyɛso wakɛnya lokaho lawɔ asɔ wakakambe l’ɛtɛkɛta wele lo Hɛbɛru 13:16 wata ɔnɛ: “Tanyohɛke nsala ɔlɔlɔ ndo nkimanyiya anto akina la diangɔ diele la nyu, nɛ dia Nzambi ngɛnangɛnaka woho w’elambo wa ngasɔ.”

8. Lo toho takɔna takondjaso wahɔ oma lo wolo wele la Jehowa? (Filipɛ 2:13)

⁸ Jehowa mbishaka wolo. Jehowa ekɔ la wolo waha l’elelo ndo nde ngɛnangɛnaka mbisha atɛmɔdi ande wa kɔlamelo wolo. (Adia Filipɛ 2:13.) Onde wɛ atalɔmbaka dia nkondja wolo wa nshika ntanga la ntondo k’ehemba kana dia mbikikɛ okakatanu ɔmɔtshi? Ondo wɛ ambɔlɔmbaka nto dia nkondja wolo wa nsala awui wahombayɛ nsala lo lushi. Etena kakakadimɔma dɔmbɛlɔ diayɛ dia nkondja wolo, wɛ akakoke mbetawɔ ɛtɛkɛta w’ɔpɔstɔlɔ Pɔɔlɔ lakafunde ate: “Lo akambo tshɛ, dimi lekɔ la wolo oma le ɔnɛ lambisha lokalo.”—Flpɛ. 4:13.

9. Ngande wakokaso mbokoya woho wakamba Jehowa la wolo ande la lokaho tshɛ? (Enda ndo osato.)

⁹ Kaanga mbeso bu kokele, sho koka mbokoya woho wakamba Jehowa la wolo ande la lokaho tshɛ. Hatokoke mbisha anto wolo lo yoho ya mɛtɛ mɛtɛ. Koko sho koka nkamba la wolo aso lo wahɔ awɔ. Ɛnyɛlɔ, sho koka nɔngɔsɔlɛ anangɛso kana akadiyɛso waya esombe kana wele la hemɔ mvudu yawɔ kana mbakimanyiya la tolimulimu tokina. Naka kokaka, sho koka ndjakimɔ la lolango dia nɔngɔsɔlaka ndo kokɛka Mbalasa ka Diolelo. Etena kakambaso la wolo aso lo yoho shɔ, sho salɛka anangɛso l’akadiyɛso efula ɔlɔlɔ.

10. Ngande wakokaso nkeketsha anto akina oma l’ɛtɛkɛta aso?

¹⁰ Tatohɛke nto dia sho koka nkamba l’ɛtɛkɛta dia nkeketsha anto akina. Onde wɛ koka mbohɔ onto ɔmɔtshi lakoka keketshama lo mboka ɛtɛkɛta wa lowando oma le yɛ l’ɔtɛ wa kɛnɛ kasalande? Onde wɛ mbeyaka onto ɔmɔtshi lele l’ohomba w’esambelo? Naka ngasɔ, lande na kahayɔshi yɛdikɔ ya mbotɛ dia wɛ ndjakiyanyaka lo dikambo diande? Wɛ koka ntshɔ towenda, mbelɛ lo telefɔnɛ, mbotomɛ mukanda kana mesajɛ lo telefɔnɛ. Toyakiyanyake otamanya dia kɛnɛ kayoyota. Tɔtɛkɛta tongana t’oma k’ɛse otema mbeyaka monga kɛnɛ kewɔ la tɔ ohomba dia ntetemala monga la kɔlamelo kana mɛna akambo la sso di’ɔlɔlɔ.—Tok. 12:25; Ɛf. 4:29.

11. Ngande washa Jehowa anto akina lomba?

¹¹ Jehowa mbishaka lomba. Ombeki Jakɔba akafunde ate: “Ɔnkɔnɛ naka onto ɔmɔtshi l’atei anyu ekɔ l’ohomba wa lomba, nde atetemale nɔmba Nzambi, ko nde ayowoshalɔ, nɛ dia la lokaho tshɛ nde mbishaka anto tshɛ aha la minda ɛkɔmɔ.” (Jak. 1:5; nɔtɛ.) Oko wadiɛnya ɛtɛkɛta ɛnɛ, Jehowa hadime anto lomba. La lokaho tshɛ, nde lishaka anto akina. Jakɔba mbutaka di’etena kasha Jehowa lomba, nde salaka dui sɔ ‘aha la mpangwɛ’ kana “aha la minda ɛkɔmɔ.” Nde halange dia sho mboka kɔlɔ etena kayangaso ɛlɔmbwɛlɔ kande. Nde ndamɛ mbatotɛ dia kiyanga.—Tok. 2:​1-6.

12. Waaso akɔna wele la so wa sambiyɛ anto akina lomba?

¹² Kayotota dikambo diaso? Onde sho koka mbokoya Jehowa lo kahana l’anto akina lomba? (Os. 32:8) Ɛmɛnyi wa Jehowa wekɔ la waaso efula wa mbewoya anto akina kɛnɛ kekawɔ. Ɛnyɛlɔ, sho ndowanyaka eyoyo l’esambishelo. Dikumanyi kimanyiyaka la solo dia lotutsha tshɛ ekambi wakimanyiya ndo anangɛso wambobatizama dia vɔ kotshaka ɛkɛndɛ awɔ l’etshumanelo. Ndo wanɛ wele la diewo lo wokelo ndo l’ɔlɔngɔswɛlɔ wa mvudu kimanyiyaka dia ndowanya wanɛ wele bu la diɔ dia mbika mvudu ya teokrasi.

13. Etena kalowanyaso anto akina, ngande wakokaso mbokoya woho washa Jehowa anto lomba?

¹³ Wanɛ walowanya anto akina pombaka mbokoya Jehowa. Tohɔ dia Jehowa mbishaka lomba la lokaho tshɛ. Woho akɔ waamɛ mbele, sho sambiyaka anto akina la lokaho tshɛ kɛnɛ keyaso. Hatoshɛ awui amɔtshi la wɔma w’ɔnɛ onto letshami ayoyɔmpɛna. Kana monga l’ekanelo k’ɔnɛ: ‘Dimi ndooko onto lakandowanya! Ndamɛ ayalowanya.’ Ndooko okambi wa Jehowa wahomba monga l’ekanelo ka ngasɔ. Koko, sho mbetawɔka dia kahana aha tsho diewo diaso “koko ndo dia nkimɔ etondo aso” le wanɛ walowanyaso. (1 Tɛs. 2:8) Sho nongamɛka dia “vɔ lawɔ wayonga l’akoka tshɛ wahombama dia mbetsha anto akina.” (2 Tim. 2:​1, 2) Naka sho tshɛ kahanaka l’anto akina lomba laso la lokaho tshɛ, kete ndo vɔ ndo sho tayonga akanga wa tomba ndo tayonga l’ɔngɛnɔngɛnɔ w’efula.

ETENA KELE ANTO BU LA LOWANDO

14. Ngande wasala anto efula etena kawashaso ɛngɔ kɛmɔtshi?

¹⁴ Etena keso la lokaho djekoleko otsha le anangɛso l’akadiyɛso, vɔ mɛnyaka lowando lawɔ lo tooka losaka. Vɔ koka tofundɛ dia tooka losaka kana nkamba la yoho kina. (Kɔl. 3:15) Etena kalongolaso losaka la ngasɔ, sho ndekaka monga l’ɔngɛnɔngɛnɔ.

15. Kakɔna kahombaso mbohɔka etena kahɛɛnya anto amɔtshi lowando?

¹⁵ Koko kɛnɛ kele mɛtɛ ele, anto amɔtshi howooke losaka lo kɛnɛ kaasalɛso. Tena dimɔtshi, sho koka nkamba la wenya aso, la wolo aso ndo la diangɔ diaso, koko mbeyaka mɛnama di’anto wosaleso ɔlɔlɔ bu la lowando. L’etena kɛsɔ, ngande wakokaso mbewɔ dia nshisha ɔngɛnɔngɛnɔ aso kana nkoma lo momala? Tohɔ ɛtɛkɛta wa lo divɛsa diɔsami sawo nɛ, mbuta ate Etsha 20:35. Ɔngɛnɔngɛnɔ aso waya lo mbisha halemanɛ la kɛnɛ kayosala onto loshaso. Sho koka monga la lokaho oyadi anto bu la lowando. Kakɔna kakoka tokimanyiya? Tende bɛnyɛlɔ dimɔtshi.

16. Kakɔna kakoka tokimanyiya dia ntetemala nkaha l’ɔngɛnɔngɛnɔ?

¹⁶ Toyasha tshɛ dia mbokoya Jehowa. Nde mbishaka anto diangɔ di’ɛlɔlɔ oyadi vɔ monga la lowando kana bu. (Mat. 5:​43-48) Jehowa tolakaka di’etena kakahaso ‘aha la nongamɛ dia onto tokaloya, difuto diaso diayoyala woke.’ (Luka 6:35) ‘Onto tokaloya’ koka monga lo tshimbo ya eokelo ka losaka. Oyadi onto tooka losaka kana bu, Jehowa ayotofuta lo kɛnɛ kasalaso dia nkimanyiya anto akina lo woho wakahaso “l’ɔngɛnɔngɛnɔ.”—Tok. 19:17; 2 Kɔr. 9:7.

17. Naa ɔkɔkɔ woleki wakahɛso anto akina? (Luka 14:​12-14)

¹⁷ Dui dikina diakokaso nsala dia mbokoya Jehowa etena kakahɛso anto ele, lo nkamba la kɛnɛ kakate Yeso lo Luka 14:​12-14. (Adia.) Bu kɔlɔ nongola kana kahɛ anto akina wakoka vɔ lawɔ tolongola kana tokahɛ. Ko kayotota naka tambɛna dia tekɔ lo kahɛ anto lo yɛdikɔ mɔtshi l’elongamelo ka nongola yangɔ oma le wɔ? Ayonga dimɛna sho nkamba la dako dia Yeso. Sho koka monga la lokaho otsha le onto leyaso dia nde bu l’akoka wa tosalɛ woho akɔ waamɛ. Ko tayonga l’ɔngɛnɔngɛnɔ nɛ dia tekɔ lo mbokoya Jehowa. Naka hatolongamɛ ndooko ɛngɔ oma le wanɛ wakahɛso, kete tayonga l’ɔngɛnɔngɛnɔ oyadi kaanga hawotooke losaka.

18. Kakɔna kahatahombe nsala ndo lande na?

¹⁸ Tewɔ dia kanɛ anto akina kɔlɔ. (1 Kɔr. 13:7) Naka anto akina bu la lowando, sho koka ndjambola ɔnɛ: ‘Onde mɛtɛ vɔ bu la lowando ko kana mbohɛ mbohɛwɔ?’ Ondo ekɔ ɛkɔkɔ ekina wakaakonyisha diaha vɔ mɛnya lowando oko walongamɛso. Amɔtshi koka monga la lowando efula l’otema, koko mbokaka onyɔ wotsho dia ntɛkɛta. Vɔ koka mboka nsɔnyi di’onto mbakimanyiya, djekoleko naka vɔ mbakakimanyiyaka anto akina. Oyadi ɔkɔkɔ akɔna, naka sho mbokaka anangɛso l’akadiyɛso ngandji, kete hatotowakanɛ kɔlɔ ndo tayotetemala mbakahɛ l’ɔngɛnɔngɛnɔ.—Ɛf. 4:2.

19-20. Lande na kele solo dia lotutsha diekɔ ohomba etena kakahɛso anto akina? (Enda ndo osato.)

¹⁹ Tonge la solo dia lotutsha. Lo kɛnɛ kendana la monga la lokaho, nkumekanga ka lomba Sɔlɔmɔna akafunde ate: “Okɛ mapa ayɛ lo ashi, nɛ dia l’ɔkɔngɔ wa nshi efula wɛ ayowotana nto.” (Ond. 11:1) Oko wɛnya ɛtɛkɛta ɛnɛ, amɔtshi mbeyaka ndjɛnya lowando edja efula l’ɔkɔngɔ wa mbasalɛ ɔlɔlɔ, mbuta ate “l’ɔkɔngɔ wa nshi efula.” Tende ɛnyɛlɔ kɛmɔtshi kashikikɛ dui sɔ.

²⁰ Ambeta ɛnɔnyi efula, wadi aki omendji w’otshimbedi ɔmɔtshi akatomɛ kadiyɛso kɛmɔtshi kaki eke ka batizama yɛtshi ya mukanda dia mbokeketsha dia ntshikala la kɔlamelo le Jehowa. Ɛnɔnyi oko enanɛi l’ɔkɔngɔ, kadiyɛso kɛsɔ akookadimola lo mbofundɛ ɔnɛ: “Lambokofundɛ dia kewoya ekimanyielo kakayambisha l’edja k’ɛnɔnyi efula aha la wɛ mbeya.” Nde akatetemala ɔnɛ: “[Ɛtɛkɛta ayɛ] waki mɛtɛ wa wangasanu ndo hambohɛki pondjo divɛsa diakayatomɛ.”a L’ɔkɔngɔ wa ntɛkɛkɛta di’ekakatanu ɛmɔtshi wakahomana la nde, kadiyɛso kɛsɔ akate ate: “L’etena kɛmɔtshi lakoke dia layanga ntshika kambɛ Jehowa nɛ dia lambohekɔ. Ko lakohɔ divɛsa diakayafundɛ ndo diɔ diakakimanyiya diaha mpekɔ.” Nde akakotsha ate: “Mukanda ayɛ mbamboleka tshɛ kimanyiyami l’edja k’ɛnɔnyi enanɛi ɛnɛ.” Ohokanyiya ɔngɛnɔngɛnɔ waki la wadi aki omendji w’otshimbedi lo nongola mukanda wa ngasɔ “l’ɔkɔngɔ wa nshi efula”! Sho lawɔ koka ndjolongola losaka edja efula l’ɔkɔngɔ wa sho salɛ onto ɔmɔtshi ɔlɔlɔ.

21. Lande na kambotoyashikikɛ dia mbokoya lokaho la Jehowa?

²¹ Oko wakatatshi, Jehowa akatotonge la dikoka dia laande. Kaanga mbangɛnangɛnaso nongola, sho ndekaka monga l’ɔngɛnɔngɛnɔ lo mbisha anto akina. Sho mbokaka dimɛna etena keso l’akoka wa nkimanyiya asekaso ambetawudi. Ndo sho mongaka l’ɔngɛnɔngɛnɔ etena kɛnyawɔ lowando. Koko, oyadi onto lokaheso mboka losaka kana bu, sho koka monga l’ɔngɛnɔngɛnɔ nɛ dia takasadi dui di’ɔlɔlɔ. Tohɛke pondjo dia oyadi kɛnɛ kakahayɛ, “Jehowa ekɔ la akoka wa kosha nyɛ yoleki shɔ.” (2 Ɛk. 25:9) Hatokoke pondjo kahɛ anto oleki kɛnɛ katosha Jehowa! Ndo ndooko ɔngɛnɔngɛnɔ woleki futama oma le Jehowa ndo difuto diande mboleki tshɛ. Nyɛsɔ toyashikikɛ dia ntetemala mbokoya Shɛso ka lokaho kele l’olongo.