Onde wɛ “ambeya sheke” ya ngɛnangɛna la kɛnɛ kele layɛ?

1. Kakɔna kalembetshiya ngɛnangɛna la kɛnɛ kele la so ndo kakɔna kahalembetshiya dui sɔ?

ONDE wɛ ekɔ onto langɛnangɛna la kɛnɛ kele la yɛ? Onto langɛnangɛna la kɛnɛ kele la nde mongaka l’ɔngɛnɔngɛnɔ ndo la wɔladi lo mbika washo l’ɛtshɔkɔ wele la nde. Nde hayakiyanya kana mboka kɛlɛ l’ɔtɛ wa kɛnɛ kele nde bu la tɔ. Koko ngɛnangɛna la kɛnɛ kele la so halange nembetshiya dia sho bu l’ohomba w’ɛngɔ kekina. Ɛnyɛlɔ, Okristo koka nkondja waaso wa mpamia olimu ande. (Rɔmɔ 12:1; 1 Tim. 3:1) Koko, etena kangɛnangɛnaso la kɛnɛ kele la so, sho hatoshisha ɔngɛnɔngɛnɔ aso kaanga etena kahatalongola waɛsɛ wakombolaso.

2. Lande na kele ekɔ waale etena kahatangɛnangɛna la kɛnɛ kele laso?

² Etena kahatangɛnangɛna la kɛnɛ kele la so, dui sɔ koka tokonya l’etombelo wa kɔlɔ efula. Wanɛ wahangɛnangɛna la kɛnɛ kele la wɔ koka nkamba wenya wa laadiko efula dia nkondja diangɔ dia l’emunyi diewɔ mɛtɛ bu l’ohomba adiɔ. Lonyangu ko, ndo Akristo amɔtshi wakakome polo ndo lo mbiva falanga ndo diangɔ dikina diakawakombolaka. Ondo vɔ wakate ɔnɛ ‘dimi sunganaka ndjiɔsa,’ ‘lambokonga edja efula dia dimi ndjikondja,’ kana ‘layɔsɔmbɔla falanga yakɔ l’ɔkɔngɔ.’ Koko, toho tshɛ ta wovi hatɔngɛnyangɛnya ndo hatotombola Jehowa. (Tok. 30:9) Amɔtshi wakakɔmɔ etena kakiwɔ konongola waɛsɛ w’olimu ndo wakatshike kambɛ Jehowa. (Ngal. 6:9) Ngande wakakoke okambi wa Jehowa wakayakimɔ le nde ndjokoma lo nsala ngasɔ? Ondo nde akayotshika ngɛnangɛna la kɛnɛ kele la nde.

3. Wetshelo akɔna wekeketshelo wakokaso nkondja oma lo Filipɛ 4:​11, 12?

³ Sho tshɛ koka ngɛnangɛna la kɛnɛ kele la so. Ɔpɔstɔlɔ Pɔɔlɔ akafunde dia nde ‘akeke dia ngɛnangɛna la kɛnɛ kele la nde oyadi l’etena kakɔna tshɛ.’ (Adia Filipɛ 4:​11, 12.) Nde akafunde ɛtɛkɛta ɛsɔ etena kakinde lo lokanu. Kaanga mbakinde lo lokanu, nde koshisha ɔngɛnɔngɛnɔ ande. Nde ‘akeye sheke ya ngɛnangɛna’ la kɛnɛ kaki la nde. Naka tekɔ l’okakatanu wa ngɛnangɛna la kɛnɛ kele la so, kete ɛtɛkɛta ndo kɛnɛ kakakomɛ Pɔɔlɔ koka toshikikɛ dia sho koka ngɛnangɛna la kɛnɛ kele la so. Sho hatohombe nongamɛ dia ayonga wɔdu le so dia ngɛnangɛna la kɛnɛ kele la so l’etena tshɛ ka lɔsɛnɔ laso. Lo dihole dia nsala ngasɔ, sho pombaka mbeka dia ngɛnangɛna la kɛnɛ kele la so. Lo ngande? Nyɛsɔ tɔsɛdingole waonga amɔtshi wayotokimanyiya dia mbeya woho wa ngɛnangɛna la kɛnɛ kele la so.

ONGA LA LOWANDO

4. Ngande wele monga la lowando tokimanyiyaka dia ngɛnangɛna la kɛnɛ kele la so? (1 Tɛsalɔnika 5:18)

⁴ Monga la lowando tokimanyiyaka dia ngɛnangɛna la kɛnɛ kele la so. (Adia 1 Tɛsalɔnika 5:18.) Ɛnyɛlɔ, etena kongaso la lowando lo diangɔ diele la so, sho hatotoyakiyanya otamanya l’ɔtɛ wa diangɔ diakombolaso diele sho bu la diɔ. Naka sho monga la lowando lo waɛsɛ w’olimu wele la so l’etena kɛnɛ, kete tayodja yimba dia mbakotsha lo yoho yoleki dimɛna lo dihole dia nkombola dia nkondja ɛkɛndɛ ekina w’eyoyo. Afundelo tokeketshaka dia mbishaka Jehowa losaka lo alɔmbɛlɔ aso! Etena kongaso la lowando, dui sɔ tokimanyiyaka dia monga la “wɔladi wa Nzambi woleki tokanyi tshɛ.”—Flpɛ. 4:​6, 7.

5. L’ɔtɛ w’ɛkɔkɔ akɔna wakahombe ase Isariyɛlɛ monga la lowando? (Enda ndo osato.)

⁵ Tɔsɛdingole kɛnɛ kakakomɛ ase Isariyɛlɛ. Lo waaso efula, vɔ wakalelɛ Jehowa dia waki l’ohomba wa diangɔ diakawalɛka l’Edjibito. (Wal. 11:​4-6) Ekɔ mɛtɛ dia lɔsɛnɔ la l’oswe wa shɛnga komonga wɔdu. Kakɔna kakakoke mbakimanyiya dia vɔ ngɛnangɛna la kɛnɛ kaki la wɔ? Vɔ wakahombe monga la lowando lo kɛnɛ kakawasha Jehowa. Vɔ wakahombe mbohɔ dia etena kakiwɔ ɛhɔmbɔ ndo kakawaasalɛka akambo l’epetenge l’Edjibito, Jehowa akatomɛ ase Edjibito asui dikumi dia mbatshungola. L’ɔkɔngɔ w’ase Isariyɛlɛ ntshungɔ, vɔ wakatshu la “ɛngɔnyi w’ase Edjibito,” mfɛsa, paonyi ndo ahɔndɔ. (Eto. 12:​35, 36) Etena kakatatshanyaka alembe wa Farawɔ ase Isariyɛlɛ otsha lo Ndjale ka beela, Jehowa akasale dihindo ko akaatola Ndjale l’ahende. Ndo etena kakawatandaka lɔkɛndɔ l’oswe wa shɛnga, Jehowa akaaleshaka lushi tshɛ la Mana. Ko, lende aki dikambo? Ase Isariyɛlɛ kɔngɛnangɛnaka la kɛnɛ kaki la wɔ, aha l’ɔtɛ wakawahombaka mbo ya ndɛ yakiwɔ l’ohomba, koko nɛ dia vɔ komonga la lowando lo kɛnɛ kaki la wɔ.

6. Lo toho takɔna takokaso mɛnya lowando laso?

⁶ Ngande wakokayɛ mɛnya lowando? Ntondotondo, ɔsaka etena dia kanaka yimba lo diangɔ di’amɛna diele la yɛ. Wɛ koka mfunda awui ahende kana asato weyɛ la lowando lɔkɔ. (Del. 3:​22, 23) Dui dia hende, ɛnya lowando layɛ. Ɔsa yɛdikɔ ya mbokaka anto akina losaka l’ɔtɛ wa kɛnɛ kakosalɛwɔ. Kɛnɛ koleki tshɛ ele, okaka Jehowa losaka mbala la mbala. (Os. 75:1) Dui dia sato, nsɔna angɛnyi w’eshika wele la mbekelo ka mbokanaka losaka. Naka sho monga l’angɛnyi wɛnya lowando, kete sho lawɔ koka monga la mbekelo ka mɛnyaka lowando. Koko naka sho monga l’angɛnyi wahɛnya lowando, kete sho koka ndjookoya mbekelo kawɔ kɛsɔ. (Eoh. 1:​26-28; 2 Tim. 3:​1, 2, 5) Naka sho ndjasha lo mbishaka losaka, kete tayewɔ waale waya lo ntona dia ngɛnangɛna la kɛnɛ kele la so.

7. Ngande wakɛnya Aci lowando ndo etombelo akɔna waki la dui sɔ?

⁷ Tɔsɛdingole kɛnɛ kakakomɛ Aci, ladjasɛ la Indonésie. Nde mbutaka ate: “L’etena ka hemɔ ka COVID-19, lakatatɛ mbɛdika akambo waki la mi la waki l’asekami ambetawodi. Etombelo waki la dui sɔ ele dimi kondjɔngɛnangɛnaka la ‘kɛnɛ kaki la mi.’ (Ngal. 6:4) Kakɔna kakookimanyiya dia nde ntshikitanya ekanelo kande ka yimba? Aci mbutaka ate: “Lakayotatɛka mbadia ɛtshɔkɔ wakamakondjaka lushi la lushi ndo lakayolekaka nkana yimba l’awui w’amɛna wakamakondjaka lo monga ɔmɔtshi la l’okongamelo wa Nzambi. Laasɔ, lakayotatɛ monga la lowando l’efula le Jehowa l’ɔtɛ w’awui asɔ tshɛ. Etombelo waki la dui sɔ ele, lakayotatɛka mɛtɛ ngɛnangɛna la kɛnɛ kaki la mi.” Naka wɛ ekɔ la tokanyi takotshindja wɔɔngɔ, lande na kahayasale kɛnɛ kakasale Aci?

YASHA LO KƐNƐ KOLEKI OHOMBA NDO ONGA L’OKITSHAKITSHA

8. Lo djonga yakɔna yakakɔ Baruka?

⁸ Baruka laki sekeletɛlɛ k’omvutshi Jɛrɛmiya, akakɔ lo djonga l’etena kɛmɔtshi. Baruka aki l’ɔkɛndɛ wa wolo wa nsukɛ Jɛrɛmiya etena kakandewoyaka losango le wodja waki komonga la lowando. L’etena kɛmɔtshi, Baruka akayotshikaka ndjasha lo kɛnɛ koleki ohomba. Lo dihole dia ndjasha lo kɛnɛ kakalangaka Jehowa dia nde nsala, akayɛnamaka dia nde akatatɛ nkanyiya lo yɛdikɔ y’efula lo dikambo diande ndaamɛ ndo lo kɛnɛ kakandalangaka nsala. Lo tshimbo ya Jɛrɛmiya, Jehowa akatɛ Baruka ate: “Wɛ ekɔ lo ndjayangɛ diangɔ dia weke. Tshika nyanga diangɔ sɔ.” (Jɛr. 45:​3-5) L’ɛtɛkɛta ekina, nde akawotɛka ate: “Ngɛnangɛna la kɛnɛ kele layɛ l’etena kɛnɛ.” Baruka aketawɔ engwelo ndo akatetemala mbetawɔma le Jehowa.

9. Ngande watokimanyiya 1 Kɔrɛtɔ 4:​6, 7, dia monga la kanyi y’ɔlɔlɔ lo dikambo di’ɛkɛndɛ? (Enda ndo esato.)

⁹ Lo tena dimɔtshi, Okristo koka mfɔnya dia nde sunganaka nongola ɔkɛndɛ ɔmɔtshi shikaa. Nde koka mfɔnya ngasɔ l’ɔtɛ w’akoka wele la nde, lo woho wakambande olimu wolo kana woho wambondokambɛ Jehowa l’edja k’ɛnɔnyi efula. Koko, anto akina mbeyaka nkondja ɛkɛndɛ wa laande wakombolande. Ko, kakɔna kakoka mbokimanyiya naka nde ekɔ lo nyanga? Nde koka nkana yimba lo kɛnɛ kakafunde ɔpɔstɔlɔ Pɔɔlɔ katanema lo 1 Kɔrɛtɔ 4:​6, 7. (Adia.) Ɔkɛndɛ tshɛ wakondjaso ndo akoka wele la so ndja oma le Jehowa. Jehowa toshaka diangɔ sɔ tshɛ aha l’ɔtɛ weso anto wa laande kana l’ɔtɛ wolekiso anto akina. Awui tshɛ wekɔ l’ɔtɛ w’ɔlɔlɔ waheyama mbɛdika wa Jehowa.—Rɔmɔ 12:​3, 6; Ɛf. 2:​8, 9.

10. Ngande wakokaso nkɛnɛmɔla okitshakitsha?

¹⁰ Sho koka monga l’okitshakitsha lo kanaka yimba lo yɛdikɔ y’efula lo ɛnyɛlɔ kakatotshikɛ Yeso. Tɔsɛdingole kɛnɛ kakatombe l’otsho wakasole Yeso ekolo w’apɔstɔlɔ ande. Ɔpɔstɔlɔ Joani akafunde ate: “Yeso akeyaka dia She akakimɔ diangɔ tshɛ l’anya ande ndo ɔnɛ nde akaye oma le Nzambi ndo aki suke la nkalola otsha le Nzambi, . . . akatatɛ nsola ekolo w’ambeki ande.” (Jni. 13:​3-5) Yeso akakoke mbuta dia nde mbakasungana dia vɔ mbosola ekolo. Koko nde kɔfɔnya ɔnɛ lam’ele nde mbele Ɔnaki Nzambi, nde mbakahombe monga l’ɔngɔnyi ndo la lɔsɛnɔ la dimɛna efula. (Luka 9:58) Yeso aki l’okitshakitsha ndo akangɛnangɛnaka la kɛnɛ kaki la nde. Nde akatotshikɛ ɛnyɛlɔ ka kokele.—Jni. 13:15.

11. Ngande wakakimanyiya okitshakitsha Dennis dia ngɛnangɛna la kɛnɛ kaki la nde?

¹¹ Dennis, ladjasɛ lo Pays-Bas, akahembe ndjela ɛnyɛlɔ ka Yeso k’okitshakitsha koko dui sɔ komonga wɔdu. Nde mbutaka ate: “L’etena kɛmɔtshi, lakayotatɛka monga l’otako ndo dimi kondjɔngɛnangɛka la kɛnɛ kaki la mi, ɛnyɛlɔ etena kakalongolaka onto okina ɔkɛndɛ ɔmɔtshi w’olimu. Etena kakandjɛka tokanyi ta ngasɔ, lakadiaka asawo wendana l’okitshakitsha. Lo aplikasiɔ wa JW Library, lakadjaka djembetelo l’avɛsa amɔtshi watɛkɛta di’okitshakitsha l’oyango wa mbasholaka esadi ndo nyomoyowawadia nto. Lakatelesharjɛ nto lo telefɔnɛ kami asawo amɔtshi wakatɛkɛtaka dikambo di’okitshakitsha ndo lakawahokamɛka mbala la mbala.a Lakeke dia elimu tshɛ wakambaso ekɔ l’oyango wa ntombola Jehowa koko aha di’anto totombola. Ɔmɔmɔ la l’atei aso ekɔ lo mbisha lonya lo kɛnɛ kasala Jehowa.” Naka wɛ ambotatɛ mboka dia wɛ hayɔngɛnangɛna la kɛnɛ kele layɛ, kete takola wanya wahombama dia wɛ monga l’okitshakitsha. Kɛsɔ ayokeketsha lɔngɛnyi lasayɛ la Jehowa ndo ayokokimanyiya dia ngɛnangɛna la kɛnɛ kele la yɛ.—Jak. 4:​6, 8.

KANA YIMBA LO ELONGAMELO KAYƐ

12. Elongamelo kakɔna kendana la nshi yayaye katokimanyiya dia ngɛnangɛna? (Isaya 65:​21-25)

¹² Sho ndekaka ngɛnangɛna etena kakanaso yimba lo elongamelo ka dimɛna katokongɛ la ntondo. Lo dibuku d’Isaya, Jehowa totɛka dia nde shihodiaka dia tekɔ l’ekakatanu efula ndo tolakaka dia nde ayotonyɛwɔ tshɛ. (Adia Isaya 65:​21-25.) Tayodjasɛ lo mvudu y’amɛna efula. Tayonga l’olimu wa dimɛna efula wa nkamba ndo tayɔlɛka mbo ya ndɛ y’amɛna efula. Hatotoyakiyanya nto lo kɛnɛ kendana la waale wakoka tokomɛ kana nkomɛ anaso. (Isa. 32:​17, 18; Ɛzk. 34:25) Nshi yaso yayaye yayonga amɛna efula ndo l’ekokelo.

13. Etena kakɔna kahombaso ndjasha l’elongamelo kaso?

¹³ L’etena kɛnɛ kambotoleka monga l’ohomba wa mbika washo l’elongamelo kaso oleki nshi ya ntondo. Lande na? Nɛ dia tekɔ lo nsɛna lo “nshi y’ekomelo” ndo sho tshɛ tekɔ l’ekakatanu wa “wolo mbikikɛ.” (2 Tim. 3:1) Lushi tshɛ, Jehowa tokimanyiyaka dia mbikikɛ lo tosha ɛlɔmbwɛlɔ, wolo ndo osukɔ wele laso ohomba. (Os. 145:14) Ndo nto, elongamelo kaso k’Okristo koka tosukɛ lo ntena dia wolo. Ondo wɛ ekɔ l’okakatanu wa nkotsha ehomba wa lo demba w’ase nkumno kayɛ. Onde kɛsɔ nembetshiyaka dia wɛ ayotetemalaka monga woola? Ndooko, aha ngasɔ! Jehowa akalake dia kosha kɛnɛ keyɛ l’ohomba ndo lo yoho ya laande lo paradiso. (Os. 9:18; 72:​12-14) Ondo wɛ mbeyaka monga ko ekɔ la hemɔ kaha nkɔnɔ, l’ɔkɔmwɛlɔ kana la weho ɛmɔtshi wa hemɔ ya wolo. Onde awui asɔ mbayohomanaka la yɛ lo lɔsɛnɔ ndo ndooko elongamelo? Ndooko. Hemɔ ndo nyɔi ayoshila l’andja w’oyoyo waki Nzambi. (Ɛny. 21:​3, 4) Elongamelo kɛsɔ kayotokimanyiya dia ngɛnangɛna la kɛnɛ kele la so, kayotonyɛ kɛlɛ ndo ekiyanu oma ko kakianɛ. Sho koka monga l’ɔngɛnɔngɛnɔ etena kahomanaso l’awui waha la losembwe, etena kavushaso lakiso la ngandji, kakikɛso hemɔ kɛmɔtshi kana ohemba akɔna tshɛ. Lande na? Nɛ dia oyadi ekakatanu wa wolo wahomana laso l’etena kɛnɛ, sho mbeyaka dia vɔ wekɔ “lo tshanda mɔtshi tsho” ndo l’andja w’oyoyo, hatototosowa nto pondjo.—2 Kɔr. 4:​17, 18.

14. Ngande wakokaso nkeketsha mbetawɔ kaso?

¹⁴ Lam’ele elongamelo kaso ka nshi yayaye tokimanyiyaka dia ngɛnangɛna la kɛnɛ kele la so, kakɔna kakoka tokimanyiya dia monga l’eshikikelo dia Jehowa ayokotsha alaka ande? Paka oko wakoka onto monga l’ohomba w’akalashi dia mɛna ɛngɔ kɛmɔtshi oma l’etale, sho lawɔ tekɔ l’ohomba wa ntakola wanya amɔtshi dia nkeketsha mbetawɔ kaso l’oyango wa mɛna dimɛna paradiso kaso ka lo nshi yayaye. Naka tambɔmɛnama l’ekiyanu lo kɛnɛ kendana l’ekondjelo kaso, sho koka nkanyiya woho wayonga lɔsɛnɔ laso etena kahatonga falanga, abasa ndo woola. Naka tekɔ lo ndjakiyanya lo dikambo dia waɛsɛ w’olimu weso tatakondja, sho koka nkana yimba l’etena kahatonga ekiyanu ɛsɔ la nɛmɔ l’ɔkɔngɔ wa sho nkoma kokele ndo wayotokambɛ Jehowa l’edja k’ɛnɔnyi nunu. (1 Tim. 6:19) Lam’ele tekɔ lo ndjakiyanya lo dikambo di’awui watɛnya paa ɛlɔ kɛnɛ, koka monga wolo le so dia nkanyiya lo dikambo dia nshi yayaye yatokongɛ la ntondo. Koko l’edjedja ka wonya, koka ndjoonga wɔdu le so dia nkanyiya nshi yayaye y’amɛna yatolaka Jehowa.

15. Kakɔna kamboyeka oma lo kɔmatɛrɛ yaki Christa?

¹⁵ Tɔsɛdingole woho wakakimanyiya elongamelo Christa, lakatshukana la Dennis lakatatɛkɛtshi la diko. Nde kɔndɔlaka ate: “Lekɔ la hemɔ ka l’eshisha kakakonya dia kɛndakɛndaka lo kɔsa k’etshimbi ndo mbetshaka etenyi ka lushi paka lo mbeto. Dimi mongaka la paa lushi tshɛ. Atete edja, dɔkɔtɛlɛ diami akambutɛ dia hatɔkɔnɔ. Koko mbala kakɔ ɔtɔi dimi lakakanyiya te ‘ndekɔ lo mɛna nshi yayaye lo yoho kina.’ Laya la wɔladi wa lo yimba l’ɔtɛ wakami washo lo elongamelo kami. Ɛlɔ kɛnɛ, dimi koka mbikikɛ lɔsɛnɔ la l’andja ɔnɛ koko l’andja w’oyoyo, layoyɔngɛnangɛna la lɔsɛnɔ!”

“WANƐ WAWOKA WƆMA HAWOHOMBE NDOOKO ƐNGƆ”

16. Lande na kakafunde nkumekanga Davidɛ ɔnɛ wanɛ woka Jehowa wɔma ‘hawohombe ndooko ɛngɔ?’

¹⁶ Okambi wa Jehowa wangɛnangɛna la kɛnɛ kele la nde ayohomana l’ekakatanu. Nkumekanga Davidɛ akavusha anande asato. Wakofunge, wakomamatanya akambo wa kashi ndo wakatawotshanyaka oko ose dawo l’edja k’ɛnɔnyi. L’atei w’ekakatanu ɛsɔ tshɛ, nde akate lo dikambo dia Jehowa ate: “Wanɛ wawoka wɔma hawohombe ndooko ɛngɔ.” (Os. 34:​9, 10) Lande na kakandakoke mbuta ngasɔ? Nɛ dia kaanga mbeso ekambi wa Jehowa ndo mbahatalongamɛ dia monga la lɔsɛnɔ l’aha l’ekakatanu l’andja ɔnɛ, tekɔ l’eshikikelo dia lo mɛtɛ hatotohomba ɛngɔ kele la so ohomba. (Os. 145:16) Ndo sho koka mendɛ le Jehowa dia tosukɛ l’ehemba aso tshɛ. Sho koka mɛtɛ monga l’ɔngɛnɔngɛnɔ.

17. Lande na kamboyoyashikikɛ dia mbeya sheke ya ngɛnangɛna la kɛnɛ kele la yɛ?

¹⁷ Jehowa nangaka dia wɛ monga l’ɔngɛnɔngɛnɔ. (Os. 131:​1, 2) Laasɔ, sala la wolo dia mbeya sheke ya ngɛnangɛna la kɛnɛ kele layɛ. Naka wɛ nsala tshɛ dia monga la lowando, dia mbidja yimba l’awui woleki ohomba, monga l’okitshakitsha ndo nkeketsha elongamelo kayɛ, kete wɛ ayonga l’akoka wa mbuta ɔnɛ: “Mɛtɛ, dimi ngɛnangɛnaka.”—Os. 16:​5, 6.