Ngandji ka Nzambi tshikalaka pondjo

1-2. Okakatanu akɔna wahomana l’Akristo efula?

OHOKANYIYA dia masuwa wele lo asuku wa wolo wa lo ndjale. Asuku wa wolo efula wekɔ lo tasutshasutsha masuwa akɔ. Masuwa ɔsɔ wayotshɔ dihole tshɛ diayowopusa asuku, naka onto ɔmɔtshi hawoshikimadisha la longo. Longo layokimanyiya masuwa akɔ dia vɔ nshikimala diaha vɔ nkɛla etena kele asuku wa wolo.

² Etena katenyanyayɛ tena dia wolo, wɛ koka djaoka oko masuwa ɔsɔ. Nsaki yayɛ koka ntshikitana esadi eto. Lushi lɔmɔtshi wɛ mbeyaka monga l’eshikikelo dia Jehowa kookaka ngandji ndo kosukɛka; ko lushi lokina wɛ koka ntatɛ ndjambola dia kana nde ekɔ lo mɛna ekakatanu wahomana la yɛ. (Os. 10:1; 13:1) Ondo ɔngɛnyi ayɛ koka kotɛ ɛtɛkɛta ɛmɔtshi w’esambelo ndo wɛ koka ndjaoka dimɛna l’etena kɛmɔtshi. (Tok. 17:17; 25:11) Koko wɛ koka nyomoyonga nto la taamu dia kana Jehowa ekɔ lo kokimanyiya. Wɛ mbeyaka ndjaoka diele oko Jehowa ambokokalɛ. Ngande wakokayɛ nshikimala etena katenyanyayɛ tena dia wolo? Lo ɛtɛkɛta ekina, ngande wakokayɛ ndjashikikɛ ndo ntetemala monga l’eshikikelo ɔnɛ Jehowa kolangaka ndo kosukɛka?

3. Kakɔna kalembetshiya “ngandji . . . ka kɔlamelo,” oko wofundamidiɔ lo Osambo 31:7 ndo 136:​1, ndo lande na kakokaso mbuta dia Jehowa ekɔ ɛnyɛlɔ koleki woke ka ngandji ka kɔlamelo? (Enda ndo osato.)

³ Yoho mɔtshi yakokayɛ nshikimala etena katenyanyayɛ tena dia wolo ele lo mbohɔ ngandji ka kɔlamelo ka Jehowa. (Adia Osambo 31:7; 136:1.) Tshɛkɛta “ngandji . . . ka kɔlamelo” mbelaka kanyi ya diɔtɔnganelo dia ma ma ndo dia wolo diele lam’asa onto ɔmɔtshi la onto okina. Jehowa ekɔ ɛnyɛlɔ koleki woke ka ngandji ka kɔlamelo. Lo mɛtɛ, Bible mbutaka lo dikambo diande ɔnɛ nde ekɔ Nzambi “koludi tɔɔ la ngandji ka kɔlamelo.” (Eto. 34:​6, 7) Bible mbutaka nto lo dikambo dia Jehowa ɔnɛ: “Wɛ ndola tɔɔ la ngandji ka kɔlamelo le wanɛ tshɛ wakelɛ.” (Os. 86:5) Tokanyiya kɛnɛ kalanga avɛsa asɔ mbuta: Jehowa hakalɛki ekambi ande wa kɔlamelo pondjo! Mbohɔ dia Jehowa ekɔ la kɔlamelo koka koshikimadia etena katenyanyayɛ tena dia wolo.—Os. 23:4.

TOHƆ DIA NGANDJI KA KƆLAMELO KA JEHOWA KEKƆ WETSHELO W’ETATELO W’OMA LO BIBLE

4. Sha bɛnyɛlɔ dia wetshelo w’etatelo w’oma lo Bible ndo lembetshiya lande na kawaetawɔso l’eshikikelo tshɛ.

⁴ Yoho kina yakokayɛ nshikimala etena katenyanyayɛ tena dia wolo ele lo nkana yimba la ngandji ka Jehowa oko wetshelo w’etatelo w’oma lo Bible. Kakɔna kalembetshiya “wetshelo w’etatelo w’oma lo Bible” le yɛ? Ondo wɛ ekɔ lo nkanyiya awui wa mɛtɛ wakayeke oma l’Ɔtɛkɛta wa Nzambi. Ɛnyɛlɔ, wɛ akeke dia lokombo laki Nzambi ekɔ Jehowa, dia Yeso mbele Ɔna ɛtɔi laki Nzambi, dia wanɛ wavɔ haweye ndooko dikambo ndo ɔnɛ nkɛtɛ kayokadimɔ paradiso lɛnɛ ayotɔsɛnaka anto pondjo pondjo. (Os. 83:18; Ond. 9:5; Jni. 3:16; Ɛny. 21:​3, 4) L’ɔkɔngɔ wa wɛ mbetawɔ wetshelo ɛsɔ, wɛ kotshika dia kaanga onto ɔtɔi kokonya diaha wɛ mbetawɔ wetshelo akɔ. Lande na? Nɛ dia wɛ akashihodia dia wetshelo ɛsɔ mpikama lo tolembetelo. Nyɛsɔ tende woho wele mbɔsa ngandji ka Jehowa oko wetshelo w’etatelo w’oma lo Bible koka tokimanyiya dia minya kanyi y’ɔnɛ Jehowa hatodje yimba kana hayakiyanya lo dikambo di’awui tshɛ wahomana la so.

5. Lembetshiya woho wakoka onto ntona wetshelo wa kashi.

⁵ Etena kakayatatɛ mbeka Bible, kakɔna kakakokimanyiya dia ntona wetshelo wa kashi? Ondo wɛ akakimanyiyama etena kakayɛdika wetshelo wakayeke oma l’ɔtɛmwɛlɔ ayɛ la kɛnɛ ketsha Bible. Tɔshi ɛnyɛlɔ: Ohɔsa dia wɛ aketawɔka dia Yeso mbele Nzambi Kanga-Wolo-Tshɛ. Koko etena kakayayekaka Bible, ondo wɛ akayambola ɔnɛ: ‘Onde ɔsɔ mɛtɛ ekɔ wetshelo wa mɛtɛ?’ L’ɔkɔngɔ wa wɛ nsɛdingola tolembetelo t’oma lo Bible, wɛ akayongaka l’akoka wa nkadimola ɔnɛ: Keema. Oma laasɔ, wɛ akayɔhɛnyaka wetshelo wa kashi ɔsɔ la wetshelo wa mɛtɛ w’oma lo Bible w’ɔnɛ: Yeso ekɔ “enondo wa diangɔ tshɛ diakatongama,” “Ɔna ɛtɔi laki Nzambi.” (Kɔl. 1:15; Jni. 3:18) Aha la taamu, wetshelo wa kashi koka ‘mbikama wolo’ ndo mongaka wolo dia mbikola. (2 Kɔr. 10:​4, 5) Koko l’ɔkɔngɔ wa mbeka Bible, wɛ kokalola lo wetshelo wakayatshike l’ɔkɔngɔ ɛsɔ.—Flpɛ. 3:13.

6. Lande na kakokayɛ monga l’eshikikelo dia “ngandji [ka Jehowa] ka kɔlamelo tshikalaka pondjo”?

⁶ Wɛ koka nsala woho akɔ waamɛ lo kɛnɛ kendana la kɛnɛ ketsha Bible lo dikambo dia ngandji ka Jehowa. Etena katenyanyayɛ tena dia wolo, ko naka wɛ ambotatɛ monga la taamu lo ngandji ka Jehowa, wɛ koka ndjambola wate: ‘Onde ekanelo kami kekɔ dimɛna?’ Ɛdika taamu tele la yɛ lo dikambo dia ngandji ka Jehowa la ɛtɛkɛta wa lo Osambo 136:1 wɔsami ɔtɛ a dui wa sawo nɛ. Lande na kata Jehowa dia ngandji kande kekɔ “kɔlamelo”? Lande na kele ɛtɛkɛta w’ɔnɛ “ngandji kande ka kɔlamelo tshikalaka pondjo” fundama mbala 26 lo osambo akɔ? Oko wakatɛnyi, ngandji ka Jehowa ka kɔlamelo le ekambi ande ekɔ wetshelo w’etatelo w’oma lo Bible paka oko wele wetshelo ekina w’etatelo wakayetawɔ oma lo Bible. Kanyi y’ɔnɛ Jehowa kɔsaka oko onto l’anyanya kana ɔnɛ nde hakooke ngandji, yekɔ kashi. Tetawɔke lokanyi lɔsɔ paka oko wahayakoke mbetawɔ wetshelo okina tshɛ wa kashi!

7. Sha bɛnyɛlɔ di’avɛsa amɔtshi watoshikikɛ dia Jehowa tolangaka.

⁷ Bible kekɔ la bɛnyɛlɔ dikina efula diatoshikikɛ dia Jehowa tolangaka. Ɛnyɛlɔ, Yeso akatɛ ambeki ande ate: “Nyu ndeka leemba la sɔlɛ nɛmɔ.” (Mat. 10:31) Jehowa ndamɛ akatɛ ekambi ande ate: ‘Dimi layonyokeketsha, eelo, dimi layonyokimanyiya, lo mɛtɛ dimi layonyokimɛ la lonya lami l’omi la losembwe.’ (Isa. 41:10) Tende mɛtɛ k’ɛtɛkɛta ɛsɔ. Yeso hate ate ‘nyu koka monga la nɛmɔ di’efula’ ndo Jehowa hate ate ‘dimi koka nyokimanyiya.’ Koko, vɔ mbutaka ɔnɛ: ‘Nyu nyekɔ la nɛmɔ’ ndo “dimi layonyokimanyiya.” Naka wɛ mongaka la taamu lo ngandji ka Jehowa etena katenyanyayɛ tena dia wolo, kete avɛsa wele oko wanɛ koka kokimanyiya efula oleki tsho kokimanyiya dia wɛ ndjaoka dimɛna; vɔ koka kokimanyiya dia wɛ mbeya dia Jehowa kolangaka. Vɔ pikama lo tolembetelo. Naka wɛ nkana yimba l’ekimanyielo ka dɔmbɛlɔ lo awui asɔ, kete vɔ wayokotshutshuya dia wɛ mbuta ɛtɛkɛta wa lo 1 Joani 4:16 wata ɔnɛ: “Sho tambeya ndo tambetawɔ ngandji kele la Nzambi oya le so.”a

8. Kakɔna kakokayɛ nsala naka lo tena dimɔtshi wɛ amboyala la taamu dia kana Jehowa kolangaka?

⁸ Ko, kakɔna kakokayɛ nsala naka lo tena dimɔtshi wɛ ekɔ lo ntetemala monga la taamu lo ngandji ka Jehowa? Ɛdika kɛnɛ kafɔnyayɛ la kɛnɛ keyayɛ. Otshikitanyi la tolembetelo tele hatotshikitana, nsaki yaso tshikitanaka koko takeke oma l’Afundelo dia ngandji ka Jehowa kekɔ djembetelo. Naka hatetawɔ ɔnɛ Jehowa tolangaka, kete tekɔ lo mɔnyɔla dionga diande dioleki woke, mbuta ate ngandji kande.—1 Jni. 4:8.

KANA YIMBA LO ‘NGANDJI KAKOOKA’ JEHOWA

9-10. Dia dui diakɔna diakatɛkɛtaka Yeso etena kakandate ɛtɛkɛta wa lo Joani 16:​26, 27 wata ɔnɛ: “Papa ndamɛ nyokaka ngandji”? (Enda ndo osato.)

⁹ Sho koka mbeka akambo efula lo dikambo dia ngandji ka Jehowa lo nsɛdingola ɛtɛkɛta waki Yeso wakandatɛ ambeki ande ɔnɛ: “Papa ndamɛ nyokaka ngandji.” (Adia Joani 16:​26, 27.) Yeso kombuta ɛtɛkɛta ɛsɔ paka dia nkonya ambeki ande dia vɔ ndjaoka dimɛna. Lo mɛtɛ, lo ndjela etena kakatɛkɛta Yeso ɛtɛkɛta ɛsɔ, nde kɔtɛkɛtaka dia nsaki y’ambeki ande. Koko, nde akatɛkɛta dia dikambo dimɔtshi diotshikitanyi, mbuta ate dɔmbɛlɔ.

¹⁰ Yeso akatɛ tsho ambeki ande dia vɔ nɔmbaka lo lokombo lande koko aha nde mbakawahombe nɔmba. (Jni. 16:​23, 24) Aki ohomba efula le wɔ dia mbeya dui sɔ. L’ɔkɔngɔ wa eolwelo kande, ambeki wakakoke nkombola dia nɔmba Yeso. Kɛnɛ koleki tshɛ ele, vɔ wakayɔsaka Yeso oko ɔngɛnyi awɔ. Vɔ wakakoke mfɔnya ɔnɛ lam’ele Yeso mbaokaka ngandji, ngandji kɛsɔ kakakoke mbotshutshuya dia nde mpokamɛ ɛsɛngɔsɛngɔ awɔ ndo oma laasɔ nde towatɛkɛtɛ le She dia nde mbakimanyiya. Koko, Yeso akate dia vɔ takawahombe nkanyiya woho ɔsɔ. Lande na? Nɛ dia nde akawatɛ ate: “Papa ndamɛ nyokaka ngandji.” Djembetelo shɔ ekɔ etenyi kɛmɔtshi ka wetshelo w’etatelo w’oma lo Bible lo dikambo dia dɔmbɛlɔ. Sɛdingola kɛnɛ kalembetshiya dikambo sɔ le yɛ: Oma lo wekelo ayɛ wa Bible, wɛ amboyokoma lo mbeya Yeso ndo lo mbooka ngandji. (Jni. 14:21) Koko oko ambeki wa lo ntambe ka ntondo, nyu koka nɔmba Nzambi l’eshikikelo tshɛ nyeya dia nde “ndamɛ nyokaka ngandji.” Nyu kɛnɛmɔlaka mbetawɔ kanyu lo ɛtɛkɛta ɛsɔ etena tshɛ kalɔmbanyu Jehowa.—1 Jni. 5:14.

SHIHODIA KƐNƐ KAKOKONYA DIA MONGA LA TAAMU

11. Lande na kangɛnangɛna Satana naka tambonga la taamu lo ngandji ka Jehowa?

¹¹ Oma lende aya taamu lo kɛnɛ kendana la ngandji ka Jehowa? Wɛ koka nkadimola ɔnɛ tɔ ndjaaka oma le Satana, ndo ɛtɛkɛta ɛsɔ wekɔ la yema ya mɛtɛ. Diabolo ekɔ lo ‘nyanga dia tɔlɛ,’ ndo nde ngɛnangɛnaka etena kongaso la taamu lo ngandji ka Jehowa. (1 Pet. 5:8) Kɛnɛ koleki tshɛ ele, ngandji ka Jehowa kakootshutshuya dia Nde mfuta oshinga w’etshungwelo; dui dialanga Satana tokonya dia sho mfɔnya ɔnɛ sho hatosungana la diɔ. (Hɛb. 2:9) Ko onto akɔna akondja wahɔ etena kongaso la taamu lo ngandji ka Jehowa? Ekɔ Satana. Ndo onto akɔna ayokotsha oyango ande naka sho mpekɔ dia kambɛ Jehowa etena keso l’ekakatanu? Ekɔ Satana. Tende woho wahemba Satana la mayɛlɛ tshɛ dia tokonya lo monga la taamu lo ngandji ka Jehowa. Satana mbele mɛtɛ ɔnɛ lakashisha ngandji ka Jehowa. Koko, lo tshelo yande mɔtshi l’atei wa “totshelo ta mayɛlɛ,” nde salaka la wolo dia tokonya dia sho ndjaɔsa oko anto wahalangema ndo wahetawɔma le Jehowa. (Ɛf. 6:11) Etena kashihodiaso kɛnɛ kalanga otunyi aso nsala, sho keketshaka yɛdikɔ yaso ya ‘ndɔshana la Diabolo.’—Jak. 4:7.

12-13. Ngande wakoka eongelo kaso k’anto wele keema kokele tokonya dia monga la taamu lo ngandji ka Jehowa?

¹² Ekɔ dui dikina diakoka tokonya dia sho monga la taamu lo ngandji ka Jehowa. Naa dui diakɔ? Eongelo kaso k’anto wele keema kokele. (Os. 51:5; Rɔmɔ 5:12) Pɛkato mbakakakitola onto la Otungi ande. Tɔ mbakalanya nto tokanyi taso, otema aso ndo demba diaso.

¹³ Pɛkato akatokonya dia sho monga la nsaki ya kɔlɔ yele oko: Ndjaɛndja onongo, ndjakiyanya, nsɛna aha l’ekokelo ndo monga la nsɔnyi. Sho koka ndjaoka ngasɔ etena kasalaso pɛkato. Koko sho koka nto ndjaoka ngasɔ l’ɔtɛ wa eongelo kaso k’anto wele keema kokele; mbuta ate eongelo kahɔtɔnɛ kaanga yema la woho wakatatongama. (Rɔmɔ 8:​20, 21) Paka oko wahakoke mutuka wele la okato wambolɛ mbidɛ lo dikona aha l’okakatanu, mbele ndo sho lawɔ hatokoke nsala akambo l’akoka aso tshɛ oko wakatatongama nɛ dia tekɔ anto wele keema kokele. Diakɔ diele hatokoke mamba dia lo tena dimɔtshi sho koka monga la taamu lo ngandji ka Jehowa. Naka dikambo dia ngasɔ diambotokomɛ, kete sho pombaka mbohɔ dia Jehowa ekɔ ‘Nzambi ka woke ndo ka diambo efula . . . katɛnyaka ngandji kande ka kɔlamelo le wanɛ wawooka ngandji ndo wakitanyiya ɛlɛmbɛ ande.’—Nɛh. 1:5.

14. Ngande wele nkana yimba l’oshinga w’etshungwelo koka minya kanyi y’ɔnɛ Jehowa hakokaki pondjo tooka ngandji? (Rɔmɔ 5:8) (Enda ndo kiombo yele l’ɔtɛ a dui ɔnɛ: “Shika ntanga la ntondo ka ‘nkudu ka lokeso kele la pɛkato.’”)

¹⁴ Lo mɛtɛ, sho mbeyaka ndjaoka lo tena dimɔtshi dia hatosungana nangema oma le Jehowa. Ndo lo mbuta mɛtɛ, sho hatosungana la ngandji kakɔ, ndo dui sɔ mbakietɛ ɛngɔ ka laande le so. Aha la wolo aso hita mbatooka Jehowa ngandji. Koko, oshinga w’etshungwelo kombaka pɛkato yaso ndo Jehowa akatofutɛwɔ nɛ dia nde tookaka ngandji. (1 Jni. 4:10) Ndo nto, tatohɛke dia Yeso akaye dia ndjotshungola atshi wa pɛkato koko aha anto wa kokele. (Adia Rɔmɔ 5:8.) Ndooko onto l’atei aso lakoka nsala akambo lo yoho ya kokele, ndo Jehowa halongamɛ dia sho nsala dui sɔ. Etena kashihodiaso dia eongelo kaso k’anto wele keema kokele koka tokonya dia monga la taamu lo ngandji ka Jehowa, sho koka ndeka ndjashikikɛ dia ndɔshana la tokanyi taso tɔsɔ.—Rɔmɔ 7:​24, 25.

SƆNA DIA NTSHIKALA LA KƆLAMELO

15-16. Naka sho ntshikala la kɔlamelo le Jehowa, eshikikelo kakɔna kakokaso monga la tɔ, ndo lande na? (2 Samuɛlɛ 22:26)

¹⁵ Jehowa nangaka dia sho nsala ɔsɔnwɛlɔ wa dimɛna lo “mbomamema.” (Eoh. 30:​19, 20) Naka sho nsala ngasɔ, kete sho koka monga l’eshikikelo dia nde ayotshikalaka la kɔlamelo le so. (Adia 2 Samuɛlɛ 22:26.) Edja tshɛ kayototshikalaka la kɔlamelo le Jehowa, sho koka mendɛ le nde dia tokimanyiya lo dui tshɛ diatokomɛ lo lɔsɛnɔ laso.

¹⁶ Oko wakatadiɛnyi, tekɔ l’ɛkɔkɔ tshɛ wa nshikimala etena katenyanyaso tena dia wolo. Sho mbeyaka dia Jehowa tolangaka ndo nde ayotosukɛ. Kɛsɔ mbetsha Bible. Naka tambonga la taamu lo ngandji kande, kete sho koka nkanyiya lo kɛnɛ keyaso dia kekɔ mɛtɛ lo dihole dia nkanyiya lo kɛnɛ kafɔnyaso dia kekɔ mɛtɛ. Nyɛsɔ toyaɛkɛ lo mɛtɛ ka lo Bible kata dia ngandji ka Jehowa tshikalaka pondjo.