Kakɔna kata Bible lo dikambo di’anto ahende wodjashi kaamɛ aha la ntshukana?
Okadimwelo washa Bible
Bible mbutaka dia lolango la Nzambi ele di’anto “ntona awui wa mindo wa dieyanelo.” (1 Tɛsalɔnika 4:3) Lo Bible, etelo “awui wa mindo wa dieyanelo” nembetshiyaka nto loseka, dieyanelo dia lam’asa pami la pami kana womoto la womoto ndo dieyanelo dia lam’asa wanɛ wele watatshukana.
Lande na kele ekɔ ohomba lo washo wa Nzambi dia pami la womoto ntshukaka kana bu?
Diwala ekɔ yɛdikɔ yoye oma le Nzambi. Nde akasale dui sɔ etena kakandatshukanya ambutshi aso wa ntondo. (Etatelo 2:22-24) Nde kokongɛ dia pami la womoto mbidjasɛ kaamɛ aha la ntshukana.
Nzambi mbeyaka kɛnɛ koleki dimɛna le anto. Nde akasale dia diwala monga dimama dia pondjo dia lam’asa pami la womoto dikambo dia wahɔ ndo dia ekokelo k’ase nkumbo tshɛ. Tɔsɛdingole ɛnyɛlɔ kɛmɔtshi ka wɔdu. Oko wakoka wetshelo wotosha otshudi tokimanyiya dia dia ɛnyɛlɔ mbolola dikalo, woho akɔ wamɛ mbele wadjango wa Nzambi tɛnyaka woho wakokaso nkeketsha diɔtɔnganelo dia lo nkumbo. Atɔndɔ waki Nzambi mongaka nshi tshɛ la wahɔ le wanɛ tshɛ wayela.—Isaya 48:17, 18.
Oko wakoka wetshelo wotosha otshudi tokimanyiya dia dia ɛnyɛlɔ mbolola dikalo, woho akɔ wamɛ mbele wadjango wa Nzambi tɛnyaka woho wakokaso nkeketsha diɔtɔnganelo dia lo nkumbo
Sala awui wa mindo wa dieyanelo la ntondo ka ntshukana koka monga la etombelo wa kɔlɔ efula. Ɛnyɛlɔ, koka onto ndjɔsa diemi diaha la lolango, hemɔ yasambemɛ oma l’awui wa mindo wa dieyanelo ndo ndjonga l’ekakanu wa lo yimba.a
Nzambi akasha pami la womoto dikoka dia mbeyana ndo dia mbota ana. Lɔsɛnɔ lekɔ ekila lo washo wa Nzambi ndo dikoka dia mbota ana ekɔ woshasha w’ohomba efula. Nzambi nangaka dia sho mbɔsa woshasha ɔsɔ la nɛmɔ di’efula lo nɛmiya tɛdikɔ tande tendana la diwala.—Hɛbɛru 13:4.
Ko kakɔna kayotota dia pami la womoto wambodjasɛ kaamɛ dia menda kana vɔ mbɔtɔnɛka la ntondo ka vɔ ntshukana?
Sheke dia monga la diwala di’ɔngɛnɔngɛnɔ bu ɔnɛ “totokotahembi mbidjasɛ” ndo sho ndjotshikana l’etena kalanga onto l’onto. Koko, diɔtɔnganelo diele lam’asa atshukanyi keketalaka etena kɛkanɛwɔ etema ndo kakambawɔ kaamɛ dia ntondoya ekakatanu.b Alɔkɔlɔkɔ wa diwala keketshaka diwala.—Mateo 19:6.
Ngande wakoka atshukanyi nkeketsha diwala diawɔ?
Ndooko diwala diele kokele. Koko, atshukanyi koka nkeketsha diwala diawɔ naka vɔ nkamba l’alako w’oma lo Bible. Tende ɛnyɛlɔ k’alako amɔtshi:
Etsha ehomba w’olonganyi ayɛ la ntondo ka wayɛ hita.—1 Kɔrɛtɔ 7:3-5; Filipɛ 2:3, 4.
Kɛnɛmɔla ngandji ndo dilɛmiɛlɔ diele lam’asa onto l’ɔnango.—Ɛfɛsɔ 5:25, 33.
Sɛdingolaka ɛtɛkɛta ayɛ.—Tokedi 12:18.
Ongaka la solo dia lotutsha ndo ongaka suke dia dimanyiya.—Kɔlɔsayi 3:13, 14.
a Enda sawo diele l’ɔtɛ a dui ɔnɛ: “Ɛlɔngɔlɔngɔ wekɔ lo ndjambola . . . Ayomosala naka wotshutshuya la wolo l’awui wa dieyanelo?”
b Enda sawo diele l’ɔtɛ ɔnɛ: “Pour les couples — Engagement.”