ƐLƆNGƆLƆNGƆ WEKƆ LO NDJAMBOLA
Diembwanelo—Etenyi 1: Onde lekɔ suke dia membwana?
Lo sawo nɛ:
Diembwanelo kɛdikɛdi na?
Anto amɔtshi hawɔshi diembwanelo la nɛmɔ. Lo sawo nɛ, “diembwanelo” nembetshiyaka etena ketsha pami la womoto kaamɛ dia mbeya kana vɔ ahende koka monga kaamɛ dia ntshukana. Ɔnkɔnɛ, diembwanelo ekɔ oyango wayadjɛ anto. Ɔsɔ keema etena ka ngɛnangɛna eongelo ka kaamɛ ka la onto la demba dikina.
Lo ntena dimɔtshi, diembwanelo mbeyaka nkonya dia mbɔsa yɛdikɔ ya ntshukana kana aha ntshukama. Etena katatɛnyu membwana, nyolamake lo yimba etombelo wakoka ndjoonga l’ɔkɔngɔ, mbuta ate tshukana kana bu.
Dui dia mbohɔka: Naka wɛ ambɛna dia wɛ aya suke membwana, kete yashikikɛ dia kana wɛ aya suke dia ntshuka.
Membwana aha la kanyi ya tshukana, ekɔ oko nyanga olimu wa nkamba, aha la nsaki ka mbokamba
Onde wɛ ekɔ suke dia membwana?
Dembwanelo mbeyaka nkonya lo diwala, diakɔ diele, wɛ pombaka nkanyiya lo waonga wele layɛ nɛ dia vɔ koka ndaanya kana nkeketsha diɔtɔnganelo dianyu. Ɛnyɛlɔ, ohokanyiya awui wayela anɛ:
Diɔtɔnganelo diayɛ l’ase nkumbo. Yoho yasalɛyɛ ambutshi ndo ewotɔ ayɛ akambo, djekoleko etena keyɛ la nkɛlɛ, koka mɛnya woho wayoyosalɛka wadɛyɛ akambo.
Tɔndɔ dia lo Bible: “Nyonya weho tshɛ wa lotunu la wolo, nkɛlɛ, odudu, ehangohango, ntɛngɔ ndo awui tshɛ wa kɔlɔ.”—Ɛfɛsɔ 4:31.
Yambola wate: ‘Onde ambutshi ami la ewotɔ ami koka mbuta dia lekɔ lo mbasalɛ akambo la dilɛmiyɛlɔ? Etena katomba okakatanu, onde dimi kandolaka akambo lo yoho ya dimɛna kana dimi mongaka la nkɛlɛ?’
Naka wɛ bu l’akoka wa nkandola ekakatanu wa wɛ l’ambutshi ayɛ, onde wɛ fɔnyaka dia wɛ ayoyonga l’akoka wa nkandola wɛnɛ wayoyonga la wadɛyɛ?
Yimba ya ndjahondja. Etena kayotshukama kana kayoyotshuka, mbala la mbala, wɛ ayohombaka mbidja ehomba w’olonganyi ayɛ lo dihole dia ntondo.
Tɔndɔ dia lo Bible: “Onto l’onto atetemale nyanga wahɔ w’onto okina, koko aha wahɔ ande hita.”—1 Kɔrɛtɔ 10:24.
Yambola wate: ‘Onde dimi mbidjaka welo di’awui salema paka lo yoho yalangami ? Onde anto akina mɛnakami oko onto lele l’ekanelo ka yimba ka dimɛna? Lo toho takɔna takamɛnya dia lakadje ehomba w’anto akina lo dihole dia ntondo?’
Okitshakitsha. Olonganyi wa dimɛna mbetawɔka munga yande ndo mongaka suke dia nɔmba edimanyelo.
Tɔndɔ dia lo Bible: “Sho tshɛ salaka munga mbala efula.”—Jakɔba 3:2, nɔtɛ.
Yambola wate: ‘Onde dimi mbetawɔka kɔlɔ yami ndo dimi nɔmbaka edimanyelo? Onde dimi momalaka etena kambisha anto akina alako waminanda efula?’
Falanga. Mbala efula, falanga mbelaka ekakatanu lo diwala. Naka wɛ nkamba dimɛna la falanga etena kɛnɛ, kete nyayoyewɔ awui efula lo diwala.
Tɔndɔ dia lo Bible: “Onto akɔna l’atei anyu lalanga mbika luudu lotangakadi ko nde hatadjashi ntondo dia nkamba akumi ndo menda kana nde ayonga l’akoka wa lishidiya?”—Luka 14:28.
Yambola wate: ‘Onde dimi kambaka dimɛna la falanga yami kana mbala efula dimi mbɔtɔka abasa? Ngande wakamɛnya dia dimi koka nɔmbɔla falanga lo yoho ya dimɛna?’
Ekongelo ka lo nyuma. Naka wɛ ekɔ Ɔmɛnyi wa Jehowa, kete wɛ pombaka monga l’ekongelo ka dimɛna ka wekelo wa Bible ndo ka wɔtwɛlɔ wa nsanganya.
Tɔndɔ dia lo Bible: “Ɔngɛnɔngɛnɔ le wanɛ weya ehomba awɔ wa lo nyuma.”—Mateo 5:3.
Yambola wate: ‘Onde lekɔ la mbekelo ka nɛmiya ekongelo kami ka lo nyuma? Onde dimi mbɔsaka ekongelo kami oko dui dioleki ohomba kana dimi tshikaka di’awui akina ndjokitshikitanya?’
Dui diambohɔka: Ndooko onto lalanga tshukana la onto lele hasale awui lo yoho ya dimɛna. Naka wɛ mbidja welo dia monga yoho y’onto ya ngasɔ, kete wɛ koka ntana onto lele l’eyango akɔ waamɛ.