Diembwanelo—Etenyi 3: Onde sho pombaka nkomiya?

Wɛ ekɔ lo membwana l’onto ɔmɔtshi, koko kakianɛ wɛ aya la taamu. Onde wɛ koka ntetemala kana nkomiya? Sawo nɛ diayokokimanyiya lo dikambo sɔ.

Lo sawo nɛ:

• Ndɔshana la taamu

• Mbɔsa yɛdikɔ

• Naka wɛ ambɔsa yɛdikɔ ya mpembola

Ndɔshana la taamu

L’ɔkɔngɔ wa membwana l’onto ɔmɔtshi l’etena kɛmɔtshi, ɔlɔngɔlɔngɔ wa pami kana wa womoto mbeyaka ndjɛna dia vɔ ahende ntshikitana. Ɛnyɛlɔ:

• Ɔmɔtshi nangaka mbetsha wenya suke l’ashi koko okina nangaka nkɛnya l’ashi.

• Ɔmɔtshi tɛkɛtaka efula koko okina haleke ntɛkɛta.

• Ɔmɔtshi mbutaka kashi koko okina mbutaka mɛtɛ.

Awui anɛ asato ntshikitana. Dia ntondo mbikaka epole ɔsɛkɛ lo nsaki y’onto l’onto; dia hende lo eongelo k’onto l’onto ndo dia sato mbikaka epole ɔsɛkɛ lo waonga wele lawɔ wotshikitanyi.

Ohokanyiya: Dui diakɔna l’awui anɛ asato, diayonga wolo leyɛ l’ɔkɔngɔ wa diwala dianyu? Lo dui diakɔna diakokanyu nsala etshikitanu nyu akɔ ahende?

Wadi l’omi koka ntshikitana nsaki kana eongelo kawɔ, koko ntetemala monga la diwala di’ɔngɛnɔngɛnɔ. Lo mɛtɛ, mbɔtɔnɛ l’awui amɔtshi halembetshiya monga kaamɛ. Lo waaso amɔtshi, omi ndo wadi koka mbeka dia mbetsha nsaki y’olonganyi okina la ntondo kana nkondja wahɔ efula oma lo eongelo k’olonganyi ande.a

Lo wedi okina, ekɔ dimɛna dia onto layotshukana layɛ mbɔtɔnɛ layɛ lo waonga, lo nyuma ndo ntshikitanya ɔlɔlɔ la kɔlɔ oko wɛ. Naka hanyɔtɔnɛ l’awui anɛ, kete nyu mbeyaka ndjɛna dia ndeka dimɛna nyu mpembola lɔngɛnyi.

Ɛnyɛlɔ, ohokanyiya dia naka nyu ahende ntshikitana waetawɔ. Dibuku diele l’ɔtɛ a dui ɔnɛ Fighting for Your Marriage mbutaka ɔnɛ: “Otshikitanelo wa dietawɔ kana w’ɔtɛmwɛlɔ, ekɔ ɔkɔkɔ ɔmɔtshi wakonya wadi l’omi dia mpembola diwala.”

Tɔndɔ dia lo Bible: “Tanyongake la diɔtɔnganelo dia ma ma la wanɛ wele bu ambetawudi.”​—2 Kɔrɛtɔ 6:14.

Mbɔsa yɛdikɔ

Bible mbutaka dia “wanɛ watshukana wayonga la asui.” (1 Kɔrɛtɔ 7:28) Diakɔ diele, l’etena ka diembwanelo dianyu, tanyambake dia monga la asui amɔtshi.

Woongelo w’ekakatanu wa totshitshɛ, halembetshiya dia diokanelo dianyu diayokomɛ. Onde nyu koka mbaakandola lo wɔladi? Nyu akɔ ahende nyayonga l’ohomba wa dikoka sɔ l’ɔkɔngɔ wa nyu ntshukana.

Tɔndɔ dia lo Bible: “Nyoyale la ɔlɔlɔ w’otema lam’asanyu, nyokanake kɛtshi k’efula, nyodimanyiyanake l’otema ɔtɔi.”​—Ɛfɛsɔ 4:32.

Lo wedi okina, naka awui wahanyokana ndo wa weke wekɔ efula, kete kɛsɔ koka ondo mɛnya dia nyu ahende hanyokokɛ monga kaamɛ. Naka ngasɔ mbediɔ, kete ayonga dimɛna nyu mbeya kɛnɛ ka nsala kakianɛ lo dihole dia ndjokisala l’ɔkɔngɔ!

Lo tshena pe: Naka wɛ ekɔ la taamu lo dikambo di’onto lembwana layɛ kana lo dikambo di’ɔlɔngɔswamelo wa diwala dianyu, kete tonyake yimba l’akambo asɔ!

Tɔndɔ dia lo Bible: “Kanga yewo atɛnaka waale, ko nde atoyashɛka, koko onto lahatahokɔ akambo atotshɔka tsho, ko atodiɛnɛka la etombelo wa kɔlɔ.”​—Tokedi 22:3.

Naka wɛ ambɔsa yɛdikɔ ya mpembola

Ohembwelo wa diembwanelo koka nyosha paa efula. Koko, naka ɔmɔtshi l’ateyi anyu kana nyu akɔ ahende nyekɔ l’awui amɔtshi wa welo lo dikambo dia wembwanelo anyu, kete ayoleka dimɛna nyu nkomiya wembwanelo akɔ.

Ko ngande wakokanyu nkomiya dimɛna wembwanelo anyu? Naka aha l’ɔtɛ w’ɛkɔkɔ ɛmɔtshi wa shikaa, kete hatonga dimɛna nyu nkomiya oma lo tshimbo ya mɛsajɛ. Diakɔ diele, ayoleka dimɛna nyu nyanga etena ndo dihole dia dimɛna diakokanyu nsawola dui sɔ lo yoho ya dimɛna.

Tɔndɔ dia lo Bible: “Nyotanɛke mɛtɛ onto l’onto.”​—Zɛkariya 8:16.

Onde ohembwelo wa diembwanelo dianyu nembetshiyaka dia wɛ ambɔtɔ ashi l’etole? Ndooko. Ohɔ dia, oyango wa diembwanelo ekɔ dia kokimanyiya dia mbeya kana wɛ ayotshukana l’onto ɔnɛ kana bu. Kaanga mbakokanyu nkomiya diembwanelo, eya dia wɛ koka nkondja wetshelo w’amɛna oma lo kɛnɛ kokokome.

Yambola wate: ‘Wetshelo akɔna wamomokondja oma lo diembwanelo nɛ? Onde wetshelo wokondjishami mɛnyaka dia lekɔ l’ahole amɔtshi wa ndjaalowanya? Kakɔna kayomosala naka lolanga membwana l’onto okina?’