Okandelo w’ekoma la kalasa​—Kakɔna kata Bible lo dikambo sɔ?

Lo Ngɔndɔ ka tanu 24, 2022, mpokoso ka wolo kakasalema l’osomba wa tshitshɛ wa Uvalde, la Texas, l’États-Unis. Lo ndjela jurnalɛ yelɛwɔ The New York Times, “pami kɛmɔtshi akadiake ambeki 19 ndo embetsha ehende . . . la kalasa k’ana w’akɛnda kelɛwɔ Robb.”

Lonyangu ko, awui wa kandji wa ngasɔ salemaka mbala efula. Jurnalɛ yelɛwɔ USA Today yakate dia l’États-Unis oto, “okandelo 249 wakasalema lo waa kalasa ɔnɔnyi wetshi. Okandelo ɔsɔ ndeka wakasalema ɛnɔnyi ekina tshɛ ntatɛ oma l’ɔnɔnyi 1970.”

Lande na kasalema awui wa kɔlɔ wa ngasɔ? Ngande wakokaso ndɔshana la ditshelo dia kɔlɔ dia ngasɔ? Onde elongamelo kekɔ k’ɔnɛ awui wa ngala wayokomɛ? Bible kadimolaka ambola asɔ.

Lande na kamboleka awui wa ngala salema l’andja ɔnɛ?

•  Bible mbelɛka etena kaso kɛnɛ ɔnɛ “nshi y’ekomelo,” etena kele anto ‘hawotonga la ngandji ka lam’asa ase nkumbo’ ndo kayowonga “akanga w’ekonda,” mbuta ate etena kayoyakimɔ anto l’awui w’esehe ndo wa ngala. Wanɛ wayakimɔ l’awui asɔ “wayoleka mpama lo kɔlɔ.” (2 Timɔte 3:1-5, 13) Dia mbeya awui akina, adia sawo diele l’ɔtɛ a dui ɔnɛ: “La Bible a-t-elle prédit la mentalité et la conduite des gens de notre époque?” (“Onde Bible kakatatshi di’anto wa lo nshi yaso nyɛ wayonga la waonga ndo la lɔkɛwɔ lele lawɔ ɛlɔ kɛnɛ?”

Anto efula ndjambolaka ɔnɛ: ‘Lande na kahashimbe Nzambi diaha mpokoso yele oko okandelo w’ekoma lo waa kalasa salema?’ Dia mɛna okadimwelo washa Bible, adia sawo diele l’ɔtɛ a dui ɔnɛ: “Lande na kele awui wa kɔlɔ komɛka anto w’ɛlɔlɔ?”

Ngande wakokaso ndɔshana l’awui wa kɔlɔ wa ngasɔ?

•  “Akambo tshɛ wakafundama lo nshi y’edjedja wakafundama dia tosha wetshelo, dia . . . oma lo esambelo k’oma lo Afundelo, sho monga la elongamelo.”​—Rɔmɔ 15:4.

Atɔndɔ wa lo Bible koka kokimanyiya dia ndɔshana l’awui wa ngala wa l’andja ɔnɛ. Dia mbeya awui akina, enda sawo dia lo Emɔ! diele l’ɔtɛ a dui ɔnɛ: “La violence cessera-t-elle un jour?” (“Onde awui wa ngala wayoshila lushi lɔmɔtshi?”)

Dia nkondja alako wa woho wakoka ambutshi nkimanyiya anawɔ lo kɛnɛ kendana la nsango ya wɔma yokawɔ ndo yɛnawɔ, adia sawo diele l’ɔtɛ a dui ɔnɛ: “Kimanyiya anayɛ woho wakokawɔ nsala la nsango ya kɔlɔ.”

Onde awui wa ngala wayokomɛ lushi lɔmɔtshi?

•  “Nde ayowatsha oma lo dihɛnyɔki ndo oma l’awui wa ngala, ndo dikila diawɔ diayonga la nɛmɔ lo washo ande.”​—Osambo 72:14.

•  “Vɔ wayotshula tokuwa tawɔ ta ta nkongo ndo akɔnga awɔ tɔshɔlɔ takɔlɔngawɔ adiyo. Wodja ɔmɔtshi hawotɛmbɛ wodja okina lokuwa la ta, ndo vɔ hawoteka ta nto.”​—Mika 4:3.

Nzambi ayosala kɛnɛ kele anto bu l’akoka wa nsala. Diolelo diande dia l’olongo diayolanya ekoma tshɛ ndo diayokomiya awui tshɛ wa ngala. Dia mbeya awui akina wayosala Diolelo diaki Nzambi, adia sawo diele l’ɔtɛ a dui ɔnɛ: “‘Wɔladi wayofulanɛ’ l’ɛlɔmbwɛlɔ ka Diolelo diaki Nzambi.”