Odiakelo w’anto l’ekoma l’andja w’otondo​—Kakɔna kata Bible lo dikambo sɔ?

Lo Ngɔndɔ k’esambele 2022, awui wa ngala anɛ w’okandelo w’ekoma wakasalema l’andja w’otondo:

• “Nyɔi k’ose pɔlitikɛ ɔmɔtshi leyama efula la Japon [Shinzo Abe, ɔnɛ laki prɛmie ministrɛ] kakakiyanya w’odja w’otondo ndo andja w’otondo wakaambe, djekoleko woho wele la Japon awui wa diakatanelo hawoleke salema ndo lo woho wewɔ l’ɛlɛmbɛ wa wolo efula wendana l’onto monga l’okoma.”​—Ngɔndɔ k’esambele 10, 2022, The Japan Times.

• “Ase Denmark wakandama la lɔkɔnyɔ etena kakadiake pami kaki l’okoma anto asato la Copenhague lo dihole di’amundji w’okanda.”​—Ngɔndɔ k’esambele 4, 2022, Reuters.

• “L’Afrique du Sud: Anto waki l’ekoma wakadiake anto 15 lo barɛ kɛmɔtshi l’osomba wa Soweto.”​—Ngɔndɔ k’esambele 10, 2022, The Guardian.

• “Wakakande ekoma ndekana mbala 220 ndo anto wakadiakema lo États-Unis lo nshi ya fɛtɛ ka wodja kasalema Ngɔndɔ k’esambele 4.”​—Ngɔndɔ k’esambele 5, 2022, CBS News.

Onde elongamelo k’ɔnɛ awui wa ngala wayokomɛ kekɔ? Kakɔna kata Bible?

Ekomelo k’awui wa ngala

Bible mɛnyaka dia nshi nyɛ ekɔ “nshi y’ekomelo,” etena kasala anto awui wa ngala, w’esehe ndo wa kɔlɔ efula. (2 Timɔte 3:1, 3) Awui wa ngala asɔ konyaka anto dia nsɛna lo wɔma. (Luka 21:11) Koko Bible mɛnyaka dia ndooko edja, awui wa ngala wayanga komɛ ndo Nzambi mbutaka ɔnɛ: “Anto ami wayodjasɛ lo dihole dia wɔladi w’efula, lo didjaselo dia lotui tshitshi ndo lo ahole wa diomuyelo wa ki.” (Isaya 32:18) Ngande wayokomɛ awui wa ngala?

Nzambi ayonya anto wa kɔlɔ ndo dihomɔ tshɛ di’ata.

• “Akanga wa kɔlɔ wayonyɛma oma la nkɛtɛ.”​—Tokedi 2:22.

• “[Nzambi] ekɔ lo nkomiya ata lo nkɛtɛ k’otondo. Nde ambɔkɔla ota ndo ambohembola dikɔnga; nde ambotshumba pusupusu y’asɔlayi lo dja.”​—Osambo 46:9.

Nzambi ayonya awui wa ngala lo mbetsha anto dia nsɛna lo wɔladi.

• “Vɔ hawotosala ndooko kɔlɔ kana ndanya dikona diami di’ekila di’otondo, nɛ dia nkɛtɛ kayolola mɛtɛ la ewo ka Jehowa oko watololaka ashi lo ndjale.”​—Isaya 11:9.

• Kaanga ɛlɔ kɛnɛ, Nzambi ekɔ lo mbetsha anto wa l’andja w’otondo dia ntshika awui wa ngala ndo ekɔ lo mbuta lo dikambo dia dihomɔ dia ta ɔnɛ: “Vɔ wayotshula tokuwa tawɔ ta ta nkongo ndo akɔnga awɔ tɔshɔlɔ takɔlɔngawɔ adiyo.”​—Mika 4:3.

Dia mbeya awui efula wendana la daka dia lo Bible di’ɔnɛ ata hawotonga l’andja w’otondo, adia sawo diata ɔnɛ: “Affranchis de la peur : est-ce possible?”

Dia mbeya awui efula wendana la woho wayoshila awui wa ngala lo pondjo, adia sawo diata ɔnɛ: “Enfin la paix sur la terre!”