Lo lonya la lɔmɔsɔ: Lɔpɛpɛ la wolo Hurricane Ian, la Floride, États-Unis, Ngɔndɔ ka diwa 2022 (Sean Rayford/Getty Images); l’atei: Wambotondja mama kɛmɔtshi nde l’ɔnande oma la Donetsk, Ukraine, Ngɔndɔ k’esambele 2022 (Alex Chan Tsz Yuk/SOPA Images/LightRocket via Getty Images); Lo lonya l’omi: Nyemba y’anto wasala egzamɛ wa COVID la Beijing, Chine, Ngɔndɔ ka nɛi 2022 (Kevin Frayer/Getty Images)
TETEMALA NSUNGUKALA!
Ɔnɔnyi wa 2022, ɔnɔnyi w’ekiyanu ndo w’efukutanu—Kakɔna kata Bible lo dikambo sɔ?
Lo 2022, tekɔ lo ntetemala mboka nsango yendana l’ata, ekakatanu wendana l’ekondjelo ndo mpokoso y’oma lo diangɔ diakatongama. Paka Bible mbatotɛ kɛnɛ kalembetshiya awui asɔ.
Kitshimudi y’oshika y’awui wasalema lo 2022
Awui wetshi l’ɔnɔnyi w’ekomelo ɔnɛ wamboleka mɛnya hwe dia tekɔ lo nsɛna l’etena kelɛ Bible ɔnɛ “nshi y’ekomelo.” (2 Timɔte 3:1) Etena kɛsɔ kakatatɛ lo 1914. Tende woho wɔtɔnɛ awui weta la kɛnɛ kakatatshi Bible dia kayosalema lo nshi yaso nyɛ:
“Ata.”—Mateo 24:6.
“Ɔnɔnyi wa 2022 ekɔ ɔnɔnyi wambohomana nto Erɔpɛ l’etombelo woleki tshɛ kɔlɔ w’oma lo ata.”a
Enda sawo: “Wodja wa Russie ambɔtwɛ wodja w’Ukraine la ta.”
“Ndjala ya kasha.”—Mateo 24:7.
“Ɔnɔnyi wa 2022 mbele ɔnɔnyi wamboleka tshɛ anto diɛnɛ la ndjala.”b
“Elando.”—Luka 21:11.
“Okalwelo wa hemɔ ka polio, ka variole du singe ambokonya anto ewo ndo hemɔ ka COVID-19 kekɔ lo ntetemala salɛ anto kɔlɔ lo yɛdikɔ y’efula. Kɛsɔ ambɛnya hwe waale wele la hemɔ yasambemɛ ndo woho wahakoke anto ndjiewɔ.”c
Enda sawo: “Miliyɔ 6 y’anto wambovɔ la hemɔ ka COVID.”
“Akambo wa wɔma.”—Luka 21:11.
“Tanyi ta wolo tahatongaka, lɔtɛkɛ lambɔmbɔ, tɔya talongoya ekonda l’eswe ndo dola. Tanyi ta lo 2022 takalanya diangɔ ndo takakonya dia nunu di’anto mvɔ ndo miliyɔ y’anto wa l’andja w’otondo wakashisha mvudu yawɔ.”d
Enda sawo: “Tanyi tamboleka wolo l’andja w’otondo.”
“Efukutanu [kana “mfunge; ɛtɔmbɔkwɛlɔ,” nɔtɛ.].”—Luka 21:9.
“Nkɛlɛ k’efula kaki l’anto l’ɔtɛ w’ekakatanu wendana l’ekondjelo, djekoleko wodelo w’eshinga wa diangɔ akakonya anto efula dia ntomba lo toshinga dia tɔmbɔkwɛ ewandji wa lɛɛta lo 2022.”e
Enda sawo: “Wodelo w’eshinga wa diangɔ l’andja w’otondo.”
Kakɔna kayotomba l’ɔnɔnyi wayaye?
Ndooko onto l’atei aso leya shikaa kɛnɛ kayosalema lo 2023. Kɛnɛ keyaso ele kem’edja, Diolelo dia Nzambi kana lowandji la l’olongo layosala etshikitanu wa weke lanɛ la nkɛtɛ. (Danyɛlɛ 2:44) Lowandji lɔsɔ layonyɛ tɔkɔkɔ tshɛ t’asui w’anto ndo layoyashikikɛ dia lolango la Nzambi salema la nkɛtɛ.—Mateo 6:9, 10.
Tambokokeketsha dia ndjela dako dia Yeso Kristo ndo ‘sungukalaka’ lo mendaka woho watakotsha awui weta l’andja prɔfɛsiya ya lo Bible. (Makɔ 13:37) Lam’alangɛ, yanga dia tofundɛ kana mɛnana laso dia mbeya woho wakoka Bible kokimanyiya kakianɛ ndo woho wakokatɔ kosha wɛ la nkumbo kayɛ elongamelo kendana la nshi yayaye y’amɛna efula.
a AP News, “Ɔnɔnyi wa 2022 ekɔ ɔnɔnyi wambohomana nto Erɔpɛ l’etombelo woleki tshɛ kɔlɔ w’oma lo ata,” oma le Jill Lawless, Ngɔndɔ ka dikumi l’ahende 8, 2022.
b Programme alimentaire mondial, “Ndjala ya l’andja w’otondo.”
c JAMA Health Forum, “Living in an Age of Pandemics—Oma lo COVID-19 polo lo variole du singe, Polio, ndo Disease X,” oma le Lawrence O. Gostin, JD, Ngɔndɔ ka diwa 22, 2022.
d Earth.Org, “What’s Behind the Record-Breaking Extreme Weather Events of Summer 2022?” oma le Martina Igini, Ngɔndɔ ka dikumi 24, 2022.
e Carnegie Endowment for International Peace, “Economic Anger Dominated Global Protests in 2022,” oma le Thomas Carothers nde la Benjamin Feldman, Ngɔndɔ ka dikumi l’ahende 8, 2022.