Miliyɔ 6 y’anto wambovɔ la hemɔ ka COVID​—Kakɔna kata Bible lo dikambo sɔ?

Lo ndjela Organisation mondiale de la santé (OMS), lo Ngɔndɔ ka tanu 23, 2022, ko anto miliyɔ 6,27 wambovɔ la hemɔ ka COVID-19. Koko, lo alapɔlɔ w’oyoyo wakatondjama lo Ngɔndɔ ka tanu 5, 2022, Organisation mondiale de la santé akate di’anto wambovɔ la hemɔ kɛsɔ ndeka lofulo lɔsɔ la fwa. Tshunda sɔ diakɛnya dia lo 2020 ndo lo 2021, “lofulo tshɛtshɛ l’anto wakavu mbala kakɔ ɔtɔi la hemɔ ka COVID-19 kana l’etombelo w’oma lo hemɔ kakɔ . . . aki suke l’anto miliyɔ 14,9.” Onde Bible mbutaka dui dimɔtshi lo kɛnɛ kendana la mpokoso yele oko kɛnɛ?

Bible kakatatɛkɛtshi dia hemɔ ya lɔnyɔi yakokanɛ l’ahole efula

•  Yeso akate dia hemɔ ndo “elando” wakokanɛ l’ahole efula wayonga lo etena kelamɛ ɔnɛ “nshi y’ekomelo.”​—Luka 21:11, Contemporary English Version; 2 Timɔte 3:1.

Prɔfɛsiya kaki Yeso kɛnɛ kekɔ lo kotshama ɛlɔ kɛnɛ. Dia mbeya awui akina, adia sawo diele l’ɔtɛ a dui ɔnɛ: “Naa djembetelo ya ‘nshi y’ekomelo,’ kana ya ‘etena k’ekomelo’”?

Bible mbishaka ekeketshelo

•  ‘Nzambi k’esambelo tshɛ tosambaka l’asui aso tshɛ.’​—2 Kɔrɛtɔ 1:3, 4.

Efula ka wanɛ wambovusha lakiwɔ ɔmɔtshi la ngandji keketshamaka la losango l’oma lo Bible. Eya awui akina oma lo sawo diele l’ɔtɛ a dui ɔnɛ: “Kɛnɛ kakokayɛ nsala nshi nyɛ​—Dia ndɔshana l’ɔkɛyi” ndo diata ɔnɛ: “Ekimanyielo koleki dimɛna le wanɛ wele l’ɔkɛyi.“

Bible mɛnyaka woho wayokadɔma dikambo sɔ lo pondjo

•  “Diolelo diayɛ diaye. Lolango layɛ latshame la nkɛtɛ oko watshamalɔ l’olongo.”​—Mateo 6:10.

Keem’edja, “Diolelo dia Nzambi” diayosala dui dimɔtshi woho waha “ndooko onto lodjashi lɛkɔ [mbuta] ate: ‘Dimi lekɔ la hemɔ.’” (Makɔ 1:14, 15; Isaya 33:24) Enda vidɛo yele l’ɔtɛ a dui ɔnɛ: Diolelo diaki Nzambi kɛdikɛdi na? dia mbeya awui wendana la lowandji la l’olongo lɔsɔ ndo kɛnɛ kayolosala.

Tambokɔlɔmba dia wɛ mbeka awui akina wendana la kɛnɛ kata Bible dia wɛ la nkumbo kayɛ nkondja wahɔ oma l’alako wa lomba wele lɔkɔ ndo oma l’alaka wa diambo wele lɔkɔ.