Yoonge ya demba​​—Kɛnɛ kayosala Diolelo dia Nzambi

“Kaanga mbele COVID-19 aya bu hemɔ kele la shɛngiya y’efula lo yoonge y’anto wa l’andja w’otondo, kɛsɔ halembetshiya dia tɔ kaya bu l’etombelo wa kɔlɔ lo yoonge y’anto. Etena kayoya hemɔ kekina ka woke ka woho akɔ waamɛ, sho pombaka monga suke.”​​—Dr. Tedros Adhanom Ghebreyesus, Directeur général de l’Organisation mondiale de la santé, Ngɔndɔ ka tanu 22, 2023.

Anto efula wekɔ lo nsowa lo yimba ndo lo demba l’ɔtɛ w’etombelo w’oma lo hemɔ ka COVID-19. Onde wa nguvɛrnɛma ndo atshunda wayasha dia nkokɛ yoonge y’anto wayonga suke dia hemɔ kayaye ndo onde vɔ koka tokimanyiya lo yoho ya dimɛna?

Bible tɛkɛtaka dia nguvɛrnɛma kimɔtshi kayotokokɛ dimɛna. Tɔ mbutaka ɔnɛ “Nzambi ka l’olongo ayotondja Diolelo,” kana nguvɛrnɛma. (Danyɛlɛ 2:44) L’ɛse k’ɛlɔmbwɛlɔ ka lowandji lɔsɔ, “ndooko onto lodjashi lɛkɔ layota ate: ‘Dimi lekɔ la hemɔ.’” (Isaya 33:24) Onto tshɛ ayonga la yonge ya dimɛna ndo la wolo w’efula oko lo nshi yande y’ɔlɔngɔlɔngɔ.​​—Jɔbɔ 33:25.