Ekakatanu wendana l’ekondjelo​—Kɛnɛ kayosala Diolelo diaki Nzambi

Le anto efula wa l’andja ɔnɛ, aya tshondo y’okakatanu dia kondjaka dikuta dia ndjasɛnya ndo dui sɔ diekɔ lo tatetemala ntshɔ otsha lo kɔlɔ.

• Lo ndjela alapɔlɔ ɔmɔtshi wakasalema l’andja w’otondo,a lofulo la falanga yafutama anto lo ngɔndɔ “hayokoka dia vɔ somba kɛnɛ kewɔ latɔ ohomba.” Alapɔlɔ akɔ pɛmɔlaka dia naka ndooko kayosalema, kete otshikitanu wa mamba wayonga lam’asa woho wasɛna ase ɛngɔnyi l’ase wola la nkumbo yawɔ, mbuta ate wayonga la paa ndeka nshi yakete.”

Onde mandji y’ana w’anto yekɔ l’akoka wa shidiya okakatanu wendana l’ekondjelo ɔsɔ?

Bible mɛnyaka di’ekɔ lowandji lɔmɔtshi lakoka ndo layokandola ekakatanu wendana l’ekondjelo ndo layosala di’anto tshɛ nsɛna woho ɔtɔi. Tɔ mbutaka dia “Nzambi ka l’olongo ayotondja Diolelo” dia nɔmbɔla nkɛtɛ k’otondo. (Danyɛlɛ 2:44) L’ɛlɔmbwɛlɔ ka lowandji lɔsɔ, ndooko onto layohamamɛ kana minyɛma yimba. (Osambo 9:18) Diolelo dia Nzambi diayosala di’onto tshɛ monga la kɛnɛ kende latɔ ohomba dia monga l’ɔngɛnɔngɛnɔ. Onto tshɛ ayɔngɛnangɛna etombelo w’oma l’olimu ande wa wolo.​—Isaya 65:21, 22.