Tanyi tamboleka wolo l’andja w’otondo​—Kakɔna kata Bible lo dikambo sɔ?

Lo Ngɔndɔ k’esambele 2022, wakate dia tanyi tamboleka tshɛ wolo tekɔ lo mbalɛ l’andja w’otondo:

• “Ewandji wa la Chine wakewoya mbala ka hende dia lo ngɔndɔ kɛsɔ tanyi tayoleka tshɛ wolo tayoyala l’esomba oko 70.”​—Ngɔndɔ k’esambele 25, 2022, CNN Wire Service.

• “Lam’ele tanyi ta wolo tekɔ lo mbalɛ l’Erɔpɛ w’otondo, dja yambolongoya ekonda efula.”​—Ngɔndɔ k’esambele 17, 2022, The Guardian.

• “Lushi la lomingu, djungudungu yakaleke tshɛ mbidɛ oleki nshi ya ntondo l’esomba efula wa l’États-Unis l’ɔtɛ wa tanyi ta wolo tawalɛ lo ɛstɛ, l’ahole efula wa lo sidɛ ndo la Midwest.”​—Ngɔndɔ k’esambele 24, 2022, The New York Times.

Kakɔna kalembetshiya awui asɔ tshɛ? Onde lɔsɛnɔ layotetemala la nkɛtɛ? Kakɔna kata Bible lo dikambo sɔ?

Onde Bible kakatatshi dia wodelo wa djungudungu?

Eelo. Wodelo wa djungudungu l’andja w’otondo ekɔ l’atei w’awui wata Bible dia wayosalema nshi nyɛ. Ɛnyɛlɔ, Yeso akatatshi dia tayɛna “akambo wa wɔma” kana “weoma a mamba wayuyala la tulimbitelu ta waki.” (Luka 21:11; Bible k’Ekila) Wodelo wa djungudungu l’andja w’otondo ambokonya anto efula dia mboka wɔma ɔnɛ anto wayolanya nkɛtɛ.

Onde anto hawotokoka nsɛna la nkɛtɛ?

Aha ngasɔ. Nzambi akatonge nkɛtɛ di’anto mbidjasɛka lɔkɔ pondjo pondjo. (Osambo 115:16; Ondaki 1:4) Lo dihole dia ntshika di’anto ndanya nkɛtɛ, Nzambi akalake dia “ndanya wanɛ walanya nkɛtɛ.”​—Ɛnyɛlɔ 11:18.

Tende prɔfɛsiya nkina hiende yɛnya awui akina wakalake Nzambi:

• “Oswe wa shɛnga ndo nkɛtɛ y’ofumbo yayɔngɛnangɛna, ndo laandja l’oswe layonga l’ɔlɔ ndo layɔmɔnga oko dɛmbɔlɛmbɔ dia safra.” (Isaya 35:1) Nzambi hatetawɔ dia nkɛtɛ monga dihole dia shɛnga diahakoke anto mbidjasɛ, koko nde ayɔlɔngɔsɔla ahole wamboyolanyema.

• “Wɛ kokɛka nkɛtɛ, lo ndjietɛ ɛtɛtɔ k’efula ndo ɔngɔnyi w’efula.” (Osambo 65:9) Diɛsɛ la Nzambi, nkɛtɛ kayokoma paradiso.

Dia nyomeya awui wendana la woho wakotsha wodelo wa djungudungu prɔfɛsiya ya lo Bible, adia sawo diele l’ɔtɛ a dui ɔnɛ: “Les changements climatiques et notre avenir : qu’en dit la Bible.”

Dia nyomeya awui wendana la daka dia lo Bible dia nkɛtɛ nɔngɔsɔma, adia sawo diele l’ɔtɛ a dui ɔnɛ: “Qui sauvera la terre ?”