Tanyi ta wolo ta l’andja w’otondo lo nshi y’ɔwɔ wa lo 2023​—Kakɔna kata Bible lo dikambo sɔ?

Anto wa l’andja w’otondo wekɔ lo diɛnɛ la tanyi ta wolo tele tatoongaka ndo etombelo wa kɔlɔ efula waya oma lo dikambo sɔ. Tende kɛnɛ katama:

• “Ngɔndɔ ka samalo kakaleke tshɛ tanyi ta wolo ntatɛ l’etena kakatatɛ anto mbɛdika lalaadi la tanyi l’andja w’otondo ambeta ɛnɔnyi 174.”​—National Oceanic and Atmospheric Administration, U.S. Department of Commerce, Ngɔndɔ k’esembele 13, 2023.

• “Lo wedja ɛnɛ: Italie, Espagne, France, Allemagne ndo Pologne, lalaadi la dja lekɔ lo nkoma polo lo degré Celcius 48 lo asɛnga wa Sicile ndo Sardaigne – Ondo ɔsɔ mbele lalaadi la dja lamboleka tshɛ wolo l’Erɔpɛ.”​—European Space Agency, Ngɔndɔ k’esambele 13, 2023.

• “Oko wataleke okama a nkɛtɛ ndolɔ, tekɔ lo nongamɛ dia avula ngembe wa wolo efula wayɔlɔ ndo wayɔlɔ mbala la mbala ndo ndooko onyake kɛsɔ ayela dola efula.”​—Stefan Uhlenbrook, director of hydrology, water and cryosphere at the World Meteorological Organization, Ngɔndɔ k’esambele 17, 2023.

Onde woho wataleke tanyi ndo lalaadi mbidɛ kokiyanyaka? Tende kɛnɛ kata Bible lo dikambo di’ohomba efula sɔ.

Onde tanyi ta wolo la lalaadi la dja ekɔ lo nkotsha prɔfɛsiya ya lo Bible?

Eelo. Tanyi ta wolo l’andja w’otondo ndo woho watadɛ lalaadi la dja ndo awui akina wa ngasɔ mbɔtɔnɛka la kɛnɛ kakatatshi Bible lo dikambo dia nshi yaso nyɛ. Ɛnyɛlɔ, Yeso akatatshi dia tayɛna “akambo wa wɔma,” kana “akambo w’ehekesa ndo washa wɔma efula.” (Luka 21:11; Good News Translation) Woho watadɛ lalaadi ambokonya anto efula dia mboka wɔma ɔnɛ anto wayanga mbetɛ nkɛtɛ dihole diahakoke anto mbidjasɛ.

Onde nkɛtɛ kayokoma dihole diahakoke anto mbidjasɛ?

Ndooko. Nzambi akatonge nkɛtɛ di’anto mbidjasɛka lɔkɔ pondjo pondjo; nde hetawɔki di’anto kilanya. (Osambo 115:16; Ondaki 1:4) Nde akalake dia “ndanya wanɛ walanya nkɛtɛ.”​—Ɛnyɛlɔ 11:18.

Bible mɛnyɛka dia Nzambi koka ndo nde ayokokɛ nkɛtɛ diaha tɔ ndanyema.

• “[Nzambi] mbɔladiaka lɔpɛpɛ la wolo; asuku wa lo ndjale mbɔlamaka yɔɔ.” (Osambo 107:29) Nzambi ekɔ la wolo wa mbahemɛ diangɔ diakatongama. Nde ekɔ l’akoka wa nsala diaha nkɛtɛ la diangɔ diele lɔkɔ ndanyema la lalaadi la dja la wolo.

• “Wɛ kokɛka nkɛtɛ, lo ndjietɛ ɛtɛtɔ k’efula ndo ɔngɔnyi w’efula.” (Osambo 65:9) L’ekimanyielo ka Nzambi, nkɛtɛ kayokoma paradiso.

Dia mbeya awui wendana la daka dia lo Bible diata dia ahole wadjasɛ anto wayɔlɔngɔsɔma, enda sawo diele l’ɔtɛ a dui ɔnɛ: “Qui sauvera la terre ?”