Ladiko lo lonya la lɔmɔsɔ: Marek M. Berezowski/Anadolu Agency via Getty Images; Lɛse lo lonya la lɔmɔsɔ: Halfpoint Images/Moment via Getty Images; center: Zhai Yujia/China News Service/VCG via Getty Images; La diko lo lonya l’omi: Ismail Sen/Anadolu Agency via Getty Images; Lɛse lo lonya la lɔmɔsɔ: E+/taseffski/via Getty Images
TETEMALA NSUNGUKALA!
Ɔnɔnyi wa 2023: Ɔnɔnyi w’ekiyanu—Kakɔna kata Bible lo dikambo sɔ?
L’ɔnɔnyi wa 2023, akambo weta l’andja ɔnɛ mɛnyaka dia tekɔ lo nsɛna l’etena kelɛ Bible ɔnɛ “nshi y’ekomelo.” (2 Timɔte 3:1) Enda woho wele akambo wasalema nshi nyɛ mbɔtɔnɛka la wanɛ wakatatshi Bible dia wayoyala lo nshi yaso nyɛ.
Akambo weta nshi nyɛ ndo kɛnɛ kakate Bible
“Ata ndo nkumu y’ata.”—Mateo 24:6.
“Akambo wa ngala wekɔ lo tafule lo wedja efula wa l’andja.”a
Adia sawo diele l’ɔtɛ a dui ɔnɛ: “Akɔna ayoshimbɛ anto wele bu asɔlayi?” ndo “Adepansɛ wendana l’awui w’ata wa l’andja w’otondo wambolekana miliyara nunu 2 ya dɔlara.”
“Adidimu wa nkɛtɛ wayonga lo dihole la dihole.”—Makɔ 13:8.
“Ntatɛ l’etatelo k’ɔnɔnyi wa 2023, adidimu wa nkɛtɛ 13 wa magnitude 7 wambosalema la nkɛtɛ, lofulo lamboleka tshɛ.”b
Adia sawo diele l’ɔtɛ a dui ɔnɛ: “Didimu dia nkɛtɛ dia wolo efula diakasalema la Turquie ndo la Syrie”(lo falase).
“Akambo wa wɔma.”—Luka 21:11.
António Guterres, Secrétaire général de l’ONU akate ate: “Andja ɔnɛ wambokolɔ dihɔndɔ ndo akambo wa l’andja ɔnɛ wekɔ lo taleke ntshɔ otsha lo kɔlɔ ka ditshi.”c
Adia sawo diele l’ɔtɛ a dui ɔnɛ: “Tanyi ta wolo ta l’andja w’otondo lo nshi y’ɔwɔ wa lo 2023.”
“Ndjala ya kasha.”—Mateo 24:7.
“Ɔnɔnyi wa 2023 wekɔ ɔnɔnyi okina wa wolo efula le wanɛ wɛna paa dia ntana mbo ya ndɛ ya ndesha nkumbo yawɔ.”d
Adia sawo diele l’ɔtɛ a dui ɔnɛ: “Andja w’otondo waya la wola wa mbo ya ndɛ l’ɔtɛ wa ta ndo w’otshikitanu wa deko.”
“Tena dia paa dia wolo mbikikɛ diayoyala.”—2 Timɔte 3:1.
“L’andja w’otondo, l’anto enanɛi, onto ɔtɔi ekɔ la hemɔ ka lo wɛɔngɔ.”e
Adia sawo diele l’ɔtɛ a dui ɔnɛ: “Kakɔna kata Bible lo dikambo dia hemɔ ya lo wɛɔngɔ yele l’ana wele l’ɛnɔnyi dikumi l’ɛmɔtshi?.”
Kakɔna katokongɛ l’ɔnɔnyi wa 2024?
Ndooko onto leeya shikaa kɛnɛ kayosalema l’ɔnɔnyi wa 2024. Koko, akambo weta l’andja ɔnɛ mɛnyaka dia keema edja Diolelo dia Nzambi, kana lowandji la l’olongo, layanga mpɛna mandji y’ana w’anto ndo nkomiya kɛnɛ tshɛ kakonya anto l’asuyi ndo l’ekiyanu.—Danyɛlɛ 2:44; Ɛnyɛlɔ 21:4.
L’etena kakongaso, naka tambonga l’ekiyanu, sho koka nyanga ekimanyielo oma le Nzambi. Bible mbutaka ɔnɛ:
“Etena kokami wɔma, dimi ndjaɛkɛka le yɛ.”—Osambo 56:3.
Ngande wakokayɛ mɛnya wɛkamu ayɛ le Nzambi? Tambokɔlɔmba dia wɛ mbeka akambo efula wetsha Bible lo kɛnɛ kendana la nshi yayaye yahatatonga l’ekiyanu. Hemba wekelo aso wa Bible w’ofele dia mɛna wahɔ wakoka wɛ la nkumbo kayɛ nkondja oma lo wekelo wa Bible.
a Akambo wendana l’anto wa lo wedja ekina, “Andja wele la ta: Kakɔna kele ledia k’ekakatanu wa wolo wa l’andja w’otondo?” oma le Emma Beals ndo Peter Salisbury, Ngɔndɔ ka dikumi 30, 2023.
b Nsango y’adidimu, “Ɔnɔnyi wa 2023: lofulo l’adidimu wa nkɛtɛ wa weke lekɔ suke la mbeyama,” Ngɔndɔ ka tanu, 2023.
c Organisation des Nations unies, “Ɛtɛkɛta wa sekeletɛlɛ lo dikambo dia ndjungudungu l’etena kakawɔkɔnyaka,” Ngɔndɔ k’esambele 27, 2023.
d Ekongelo kendana la mbo ya ndɛ l’andja w’otondo, “Andja w’otondo waya la wola wa mbo ya ndɛ.”
e Organisation mondiale de la santé (OMS), “Lushi lohɔwɔ wanɛ watata hemɔ ka lo yimba l’andja w’otondo lo 2023,” Ngɔndɔ ka dikumi 10, 2023.