Etena kakɔna kayokomɛ ata?—⁠Kakɔna kata Bible lo dikambo sɔ?

Lo dikambo dia ta diakalɔsha Iran Israël lushi la samalo, Ngɔndɔ ka nɛi 13, 2024, António Guterres lele secrétaire général des Nations unies akate ate: “Ɔnɛ mbele etena ka nkitshakitsha lofulo l’ata ndo etombelo wonga oma lɔkɔ. Ɔnɛ ekɔ etena ka ndeka monga la ndjakimɛ.”

Ta dia lo Moyen-Orient di’ekɔ ɛnyɛlɔ kɛmɔtshi k’ata walɔma l’andja w’otondo.

Conseil de sécurité des Nations Unies kakate ɔnɛ: “Kakianɛ, awui wa ngala wamboleka efula oleki woho wakiwɔ l’etena ka ta diahende dia l’andja w’otondo ndo awui asɔ wekɔ la shɛngiya le anto miliyara 2, mbuta ate onto ɔtɔi lo anto anɛi.”—Ngɔndɔ ka ntondo 26, 2023.

L’ahole walɔma ata wa wolo mbele ndo: Israël, Gaza, Syrie, Azerbaïdjan, Ukraine, Soudan, Éthiopie, Niger, Myanmar ndo Haïti.a

Etena kakɔna kayokomɛ ata? Onde ɛnɔmbɔdi w’andja ɔnɛ koka mbidja wɔladi? Kakɔna kata Bible lo dikambo sɔ?

Ata l’andja w’otondo

Ekakatanu watomba l’andja w’otondo ɛlɔ kɛnɛ mɛnyaka di’ata tshɛ wayanga nkomɛ. Ata asɔ kotshaka prɔfɛsiya ka lo Bible kendana l’etena kasɛnaso kɛnɛ. Bibe mbelɛka etena kɛnɛ ɔnɛ “ekomelo ka dikongɛ di’akambo.”—Mateo 24:3.

• “Nyayoka awui w’ata ndo nkumu y’ata. . . . Wodja wayɔlɔsha wodja okina ndo diolelo diayɔlɔsha diolelo dikina.”—Mateo 24:6, 7.

Adia sawo diele l’ɔtɛ a dui ɔnɛ: “Awui wɛnya dia tekɔ lo nsɛna lo “nshi y’ekomelo,” kana ‘etena k’ekomelo’?” dia mɛna woho wele ata wa nshi nyɛ kotshaka prɔfɛsiya ya lo Bible.

Ta diayokomiya ata tshɛ

Bible kakatewoyisha ekomelo k’ekakatanu wele l’anto. Ngande wayokotshama dui sɔ? Aha oma lo welo w’ana w’anto koko, lo tshimbo y’Aramangɛdɔna, mbuta ate “ta dia lushi la woke la Nzambi Kanga-Wolo-Tshɛ.” (Ɛnyɛlɔ 16:14, 16) L’ɔkɔngɔ wa ta sɔ, Nzambi ayokotsha daka diande diendana l’anto nsɛna lo wɔladi wa pondjo.—Osambo 37:10, 11, 29.

Dia mbeya awui akina wa woho wayokomiya ta dia Nzambi ata tshɛ, adia sawo diele l’ɔtɛ a dui ɔnɛ: “Ta di’Aramangɛdɔna kɛdikɛdi na?”