Ta dia l’Ukraine diambɔtɔ l’ɔnɔnyi wa hende​—Elongamelo kakɔna katosha Bible?

Lushi la tanu Ngɔndɔ ka hende 24, 2023, dui dimɔtshi dia diambo efula diakasalema mbuta ate ta dia lo Ukraine diambɔlɔma l’edja k’ɔnɔnyi w’otondo. Lo ndjela alapɔlɔ ɛmɔtshi, asɔlayi oko 300,000 w’ase Ukrainie ndo w’ase Russie wambodiakema kana mpomɔ mpota ya weke ndo anto akina oko 30,000 wambodiakema lo ta diakɔ. Koko, lofulo la mɛtɛ mbeyaka ndekana laasɔ.

Dui dia lonyangu ko, ndooko kɛnɛ kɛnya dia ta sɔ diayokomɛ keema edja.

• “Ayanga nkoka ɔnɔnyi w’otondo oma l’etena kakɔtɔ asɔlayi w’ase Russie lo Ukraine, koko ndooko kɛnɛ kɛnya dia ta diakɔ diayangakomɛ keema edja. Ndooko lɛkɛ lɛnama dia vɔ mbayotondoya ndo mɛnamaka nto dia ndooko wedi wele suke dia mbetawɔ dia vɔ mbokana kana mbɔtɔnɛ.”​—NPR (National Public Radio), Ngɔndɔ ka hende 19, 2023.

Dui sɔ diambokonya anto efula dia diɛnɛ l’ekakatanu ndo nsowa efula l’ɔtɛ wa ta sɔ ndo ata akina walɔɔma l’andja w’otondo. Ko elongamelo kakɔna katosha Bible? Onde ata wayokomɛ lushi lɔmɔtshi?

Ta diayokomiya ata akina tshɛ

Bible tɛkɛtaka dikambo dia ta dimɔtshi diayoshimbɛ anto tshɛ aha la mbalanya. Ta diakɔ mbeyamaka lo lokombo la Aramangɛdɔna ndo diɔ nembetshiyamaka oko “ta dia lushi la woke la Nzambi Kanga-Wolo-Tshɛ.” (Ɛnyɛlɔ 16:14, 16) Lo tshimbo ya ta sɔ, Nzambi ayokomiya mandji y’ana w’anto yasala dia ata monga. Dia mbeya woho wayela ta dia Aramangɛdɔna wɔladi, adia asawo wayela anɛ:

• “Ta di’Aramangɛdɔna kɛdikɛdi na?”

• “Aramangɛdɔna ekɔ lokumu l’ɔlɔlɔ!”