Akɔna ayoshimbɛ anto wele bu asɔlayi? ​—Kakɔna kata Bible lo dikambo sɔ?

Alapɔlɔ ɛmɔtshi w’oma lo Nations Unies wakate ɔnɛ:

• Oma lo Ngɔndɔ ka dikumi 7 polo 23, 2023, ta dia lam’asa Gaza l’Israël diambodiaka anto ndekana 6 400 ndo anto 15 200 wakahomɔ. Efula ka l’atei w’anto asɔ bu asɔlayi. Laadiko dia laasɔ, nunu nkama y’anto wakatshutshuyama dia ntakɔ ngelo yawɔ.

• Lo Ngɔndɔ ka divwa 24, 2023, ta dia lam’asa Russie l’Ukraine diaka diake anto wele bu asɔlayi 9 701 ndo anto akina 17 748 wakahomɔ l’Ukraine.

Elongamelo kakɔna kasha Bible wanɛ wasowa l’ɔtɛ w’ata?

Ɔkɔkɔ wa monga l’elongamelo

Bible kakatatshi dia Nzambi ‘ayokomiya ata lo nkɛtɛ k’otondo.’ (Osambo 46:9) Nde ayɔhɛnya mandji tshɛ y’ana w’anto la lowandji la l’olongo kana Diolelo. (Danyɛlɛ 2:44) Diolelo diaki Nzambi diayokandola ekakatanu w’ana w’anto.

Enda kɛnɛ kayosala Yeso Kristo lele Nkumekanga ka Diolelo diaki Nzambi:

• “Nde ayotsha ose wola layanga ekimanyielo, ndo mbolambola la ɔnɛ tshɛ laha l’okimanyedi. Nde ayoka mbolambola ndo ose wola kandji, ndo nde ayoshimbɛ nsɛnɔ y’ase wola. Nde ayowatsha oma lo dihɛnyɔki ndo oma l’awui wa ngala.”​—Osambo 72:12-14.

Lo tshimbo ya Diolelo diande, Nzambi ayonya shɔkɔ ndo asui woye oma l’ata ndo awui wa ngala.

• “Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”​—Ɛnyɛlɔ 21:4.

Kem’edja Diolelo diaki Nzambi diayanga mbela etshikitanu wa weke la nkɛtɛ. Bible kakatatshi dia “ata ndo nkumu y’ata” yokaso ɛlɔ kɛnɛ. (Mateo 24:6) Awui asɔ ndo awui akina mɛnyaka dia tekɔ lo nsɛna lo “nshi y’ekomelo” y’ɛlɔmbwɛlɔ k’ana w’anto.​—2 Timɔte 3:1.