Mpokoso y’oma lo dola—Kakɔna kata Bible lo dikambo sɔ?

L’andja w’otondo, anto efula wekɔ lo diɛnɛ la mpokoso y’oma lo dola. Tende kɛnɛ kɛnya alapɔlɔ ɛmɔtshi:

• “Lo nshi ngana yetshi lam’asa lushi la Samalo la lushi la Sato, lo kapitalɛ ka la Chine akɛlɛdu w’efula wakonge oma lo amvula wakalɔ woho wele atongaka ambeta ɛnɔnyi oko 140 ndo akela elola kaki la otale wa milimɛtrɛ . . . 744.8.”​—AP News, Ngɔndɔ k’enanɛi 2, 2023.

• “Lɔpɛpɛ la wolo lelɛwɔ Khanun lakela amvula wa welo ndo mpɛpɛ ya welo efula lo sidɛ ka Japon mbala ka hende lushi la nɛi, lɔpɛpɛ lakɔ lakadiake anto ahende. . . . Lɔpɛpɛ lɔsɔ lakakoke mbela akɛlɛdu wakakoke mbela elola ka mɛtrɛ 0.6 l’akona wa la Taïwan.”​—Deutsche Welle, Ngɔndɔ k’enanɛi 3, 2023.

• “Elola kakonge lo wikɛndɛ [la Nouvelle-Écosse] kakaye oma l’amvula wa welo wakalɔma oma l’Atlatique wa lo Canada kele atongaka ambeta ɛnɔnyi 50.”​—BBC News, Ngɔndɔ k’esambele  24, 2023.

Kakɔna kata Bible lo dikambo di’awui asɔ?

Djembetelo mɔtshi ya lo “nshi y’ekomelo”

Bible mɛnyaka dia tekɔ lo nsɛna l’etena kelamɛ ɔnɛ “nshi y’ekomelo.” (2 Timɔte 3:1) Yeso akate dia lo nshi yaso nyɛ, tayɛna “akambo wa wɔma,” kana tolembetelo ta wɔma. (Luka 21:11) Otshikitanu wa ndjungudungu mbele lo kiɔkɔ y’akambo efula washana wɔma ndo wamboleka salema lo nshi nyɛ.

Ɔkɔkɔ wa monga l’elongamelo

Bible mbutaka di’akambo efula washana wɔma wasalema lo nshi yaso nyɛ la nkɛtɛ toshaka elongamelo. Lande na? Yeso akate ate: “Lam’ayonyɛna akambo asɔ wosalema, kanyeye dia Diolelo dia Nzambi diaya suke.”​—Luka 21:31; Mateo 24:3.

Akambo wɛnaso wasalema mɛnyaka dia Diolelo diaki Nzambi diayanga kem’edja nɔngɔsɔla diangɔ diele la nkɛtɛ, mbidja ndo woho watshimba ashi.​—Jɔbɔ 36:27, 28; Osambo 107:29.

Dia mbeya akambo akina efula wendana la woho wayanga ndjɔlɔngɔsɔla Diolelo dia Nzambi nkɛtɛ ndo hiɛlɛlɛ enda sawo “Qui sauvera la terre?”