Aramangɛdɔna watɛkɛta ase pɔlitikɛ​—Kakɔna kata Bible lo dikambo sɔ?

La pindju ka lushi l’ɔtɔi, Ngɔndɔ ka dikumi, nshi 10, 2022, waa misilɛ wakakande ase Russie wakahandjola esomba wa l’Ukraine l’ɔtɛ wa bɔmbɛ ya weolo efula yakakandema ambeta nshi hiende yakalanya kilalo k’ohomba efula kele lam’asa Crimée la Russie. Awui asɔ wakasalema yema tshitshɛ l’ɔkɔngɔ w’ase pɔlitikɛ amɔtshi mbuta dia ondo Aramangɛdɔna wayanga salema.

• “Nshi nyɛ mbotoleka tshɛ sukana l’Aramangɛdɔna [Prizida k’États-Unis John F.] Kennedy ndo lo ta dia la Cuba. . . . Hafɔnya dia ayokoka nkamba la bɔmbɛ nikliyɛrɛ aha la tokonya lo Aramangɛdɔna.”—Joe Biden, Prizida k’États-Unis, Ngɔndɔ ka dikumi 6, 2022.

• “Lambetawɔ dia Aramangɛdɔna wayanga salema lo nkɛtɛ k’onto.”—Ɔsɔ ɛtɛkɛta wa Volodymyr Zelensky, prezida ka l’Ukraine etena kakawawombola di’etombelo wakoka monga la bɔmbɛ nikliyɛrɛ, BBC News, Ngɔndo ka dikumi 8, 2022.

Onde okambelo wa bɔmbɛ nikliyɛrɛ wayokonya lo Aramangɛndɔna? Kakɔna kata Bible lo dikambo sɔ?

Onde okambelo wa la bɔmbɛ nikliyɛrɛ wayela Aramangɛdɔna?

Ndooko. Tshɛkɛta “Aramangɛdɔna” tanemaka paka mbala ɔtɔi lo Bible l’Ɛnyɛlɔ 16:16. Ɔsɔ bu ta dia lam’asa wedja, koko ta dia lam’asa Nzambi la “nkumi ya dikanga ya lo nkɛtɛ k’otondo.” (Ɛnyɛlɔ 16:14) Nzambi ayokamba la ta dia Aramangɛdɔna dia nkomiya ɛlɔmbwɛlɔ k’ana w’anto.—Danyɛlɛ 2:44.

Dia mbeya awui efula wendana la kɛnɛ kayolembetshiya Aramangɛdɔna lo dikambo dia nkɛtɛ, adia sawo diele l’ɔtɛ a dui ɔnɛ: Ta dia Aramangɛdɔna kɛdikɛdi na?

Onde nkɛtɛ l’anto wodjashi lɔkɔ wayolanyema la bɔɔmbɛ nikliyɛrɛ?

Ndooko. Kaanga mbayokoka ewandji nkamba la bɔmbɛ nikliyɛrɛ lo nshi yayaye, Nzambi hatetawɔ dia nkɛtɛ ndanyema. Bible mbutaka ɔnɛ:

• “Nkɛtɛ tshikalaka pondjo.”—Ondaki 1:4.

• “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.”—Osambo 37:29.

Koko, prɔfɛsiya ya lo Bible mɛnyaka dia awui weta nshi nyɛ mɛnyaka dia totatshu lo kondo ko y’ɔkɔndɔ w’ana w’anto. (Mateo 24:3-7; 2 Timɔte 3:1-5) Eya kɛnɛ kata Bible lo dikambo dia nshi yayaye lo mbetawɔ mbeka laso Bible ofele.