Ɔnɔmbɔdi akɔna wayoyɔsɔna?​—Kakɔna kata Bible lo dikambo sɔ?

Lo mingu ngana yayela, vɔtɛ yayosalema lo wedja efula wa l’andja w’otondo. Anto wekɔmbɔsa tɛdikɔ t’ohomba lo dikambo di’ɛnɔmbɔdi wayowɔsɔna.

Kakɔna kata Bible lo dikambo sɔ?

Ɛnɔmbɔdi w’ana w’anto wekɔ l’elelo

Bible mɛnyaka elelo wele l’ɛnɔmbɔdi tshɛ w’ana w’anto.

• “Tanyoyaɛkɛke le ewandji kana le ɔna onto lahakoke mbela panda. Loowe lande latotombaka, ko nde atokalolaka lo nkɛtɛ; lushi lakɔ tokanyi tande ndanaka.”​—Osambo 146:3, 4, nɔtɛ ka l’ɛse ka dikatshi.

Oyadi ɛnɔmbɔdi wele l’akoka efula wayokomɛ paka la mvɔ. Koko, hawokoke ndjashikikɛ dia elimu awɔ tshɛ w’amɛna wayotetemala oma le wanɛ wayoyonga l’ɔkɔngɔ awɔ.​—Ondaki 2:18, 19.

Kɛnɛ kele mɛtɛ ele, Bible mɛnyaka dia kɔnɔngɔsɔma pondjo dia anto ndjalɔmbɔla vɔamɛ.

• “Lam’akɛndakɛnda onto, nde bu la lotshungɔ la nɔmbɔla kaanga ekolo ande.”​—Jɛrɛmiya 10:23.

Onde ekɔ onto ɔmɔtshi lakoka monga ɔnɔmbɔdi wa dimɛna ɛlɔ kɛnɛ?

Ɔnɔmbɔdi waketawɔma oma le Nzambi

Bible nembetshiyaka dia Nzambi akasɔnɛ ɔnɔmbɔdi wele l’akoka ndo wasungana mbɛkɛ otema: Yeso Kristo. (Osambo 2:6) Yeso mbele Nkumekanga ka Diolelo dia Nzambi, lowandji lalɔmbɔma oma l’olongo.​—Mateo 6:10.

Onde wɛ ayɔsɔna dia mbetawɔ nɔmbɔma oma le Yeso? Bible mɛnyaka ohomba wa dimbola sɔ:

• “Nyosha ɔna kɛnɛmɔ [Yeso Kristo], naka aha ngasɔ, Nzambi ayomala ko nyayonyɛma oma lo mboka, nɛ dia nkɛlɛ kande mbidɛka esadi. Ɔngɛnɔngɛnɔ le wanɛ tshɛ wayanga eshamelo le Nde.”​—Osambo 2:12.

Ɔnɛ mbele etena ka wɛ mbɔsa yɛdikɔ. Prɔfɛsiya ya lo Bible mɛnyaka dia Yeso akatatɛ nɔmbɔla l’ɔnɔnyi wa 1914 ndo keema edja Diolelo dia Nzambi diayanga mpɛna waolelo tshɛ w’ana w’anto.​—Danyɛlɛ 2:44.

Dia mbeka awui akina efula lo woho wakokayɛ nsukɛ ɛlɔmbwɛlɔ ka Yeso, adia sawo diele l’ɔtɛ a dui ɔnɛ: “Sɔna dia sukɛ Diolelo diaki Nzambi kakianɛ!”