Owandji ɔmɔtshi w’aseka enganga mɛnyaka di’okambelo wa la rɛzo sɔsio koka monga l’etombelo wa kɔlɔ le ɛlɔngɔlɔngɔ​—Kakɔna kata Bible lo dikambo sɔ?

Lo Ngɔndɔ ka 5 23, 2023, owandji ɔmɔtshi w’aseka engana wa l’États-Unis akahɛmɔla anto lo kɛnɛ kendana l’okambelo wa la rɛzo sɔsio ɔnɛ dui sɔ mbelaka etombelo wa kɔlɔ le ɛlɔngɔlɔngɔ efula.

•  “Kaanga mbele ana amɔtshi kondjaka wahɔ l’okambelo wa la rɛzo sɔsio, awui amɔtshi mɛnyaka di’okambelo wa la rɛzo sɔsio le ana koka mbasalɛ kɔlɔ lo timba ndo lo yoonge yawɔ.”​—Social Media and Youth Mental Health: The U.S. Surgeon General’s Advisory, 2023.

Ɛtɛkɛta woshilami la diko ɛsɔ mɛnyaka lande na kahombaso mbidja yimba lo dikambo sɔ.

•  Ana wele l’ɛnɔnyi lam’asa 12 la 15 “wetsha wenya ndekana 3 lo lushi lo waa rɛzo sɔsio mongaka bu la yimba efula, l’ɔkɔmwɛlɔ ndo l’ekiyanu efula.”

•  Le ana wele l’ɛnɔnyi 14, “okambelo w’efula wa la rɛzo sɔsio mbashishɛka djɔ, pomanaka la tɔsɛngiya tɔmɔtshi l’ɛtɛrnɛtɛ, djaɛnaka oko demba diawɔ bu dimɛna, ndjaɔsaka dia bu la nɛmɔ, mongaka l’ɔkɔmwɛlɔ efula ndo awui asɔ ndekaka komɛ wamato oleki apami.”

Ngande wakoka ambutshi nkokɛ anawɔ oma lo waale ɛsɔ? Bible mbishaka alako w’eshika.

Kɛnɛ kakoka ambutshi nsala

Yasha lo dikambo diakɔ. Oko ambutshi, ɛna waale ndo ɔsa yɛdikɔ ya kana ɔnayɛ pombaka nkamba la rɛzo sɔsio kana bu.

•  Tɔndɔ di’oma lo Bible: “Etsha ɔna lo mboka kahombande ntshɔ.”​—Tokedi 22:6, nɔtɛ.

•  Dia mbeka awui akina efula, adia sawo diele l’ɔtɛ a dui ɔnɛ: “Mon enfant devrait-​il utiliser les réseaux sociaux?”

Naka wɛ ntshika ɔnayɛ dia nde nkamba la rɛzo sɔsio, kete paka wɛ nsɛna wolo lo waale wakoka mpomana la nde ndo yasha dia mbeya awui wasala ɔnayɛ l’ɛtɛrnɛtɛ. Ngande wakokayɛ nsala dikambo sɔ?

Kokɛ ɔnayɛ lo awui wakoka mboosalɛ kɔlɔ. Lembetshiya ɔnayɛ woho wakokande mbishola awui wa kɔlɔ ndo mbaewɔ.

•  Tɔndɔ di’oma lo Bible: “Awui wa mindo wa dieyanelo ndo weho tshɛ wa mindo kana lokaki watodimɔmake kaanga nimɔma l’atei anyu, . . . oyadi lɔkɛwɔ la nsɔnyi kana ɛtɛkɛta w’enginya kana tɔsɛkɛsɛkɛ t’awui wa nsɔnyi.”​—Ɛfɛsɔ 5:3, 4.

•  Dia nkondja alako w’amɛna, adia sawo diele l’ɔtɛ a dui ɔnɛ: “Protégez votre adolescent des dangers des réseaux sociaux.”

Dja elelo. Ɛnyɛlɔ, dja ɛlɛmbɛ washikikɛ etena ndo wɛnya engana wakoka ɔnayɛ nkamba la rezo sɔsio.

•  Tɔndɔ di’oma lo Bible: “Nyendake dimɛna woho wakɛndakɛndanyu . . . oko akanga wa tomba, nyokambe la wenya anyu lo yoho yoleki dimɛna.”​—Ɛfɛsɔ 5:15, 16.

•  Kamba la vidɛo y’osangelo wa lo dibaya Onga la yewo lo réseaux sociaux dia nkimanyiya ɔnayɛ dia nde nshihodia lande na kahombande monga l’elelo ɛmɔtshi.