Anto wekɔ lo tashisha wɛkamu le ewandji wa pɔlitikɛ—⁠Kakɔna kata Bible lo dikambo sɔ?

L’ɔnɔnyi wa 2024 ɔnɛ, lofulo la longanda (vɔtɛ) layokama l’andja w’otondo layoleka ɛnɔnyi ekina. Koko, anto efula wekɔ lo tashisha wɛkamu le ewandji wa pɔlitikɛ.

• Efula k’ase Amɛrikɛ wakawakɔnya wakate ɔnɛ: “ase pɔlitikɛ efula tshutshuyamaka oma lo yimba ya lokaki” lo dihole dia mposa ka kambɛ anto akina.a—Pew Research Center, Ngɔndɔ ka divwa 19, 2023.

Efula k’ɛlɔngɔlɔngɔ vɔ lawɔ hawoyoyaɛkɛ le ase pɔlitikɛ.

• “Nshi nyɛ, ana wele l’ɛnɔnyi dikumi l’ɛmɔtshi ndjakiyanyaka dia nkandola ekakatanu ɛmɔtshi wa wolo, koko l’ɛkɔnya wakawasale, vɔ mbutaka dia ase pɔlitikɛ bu l’akoka wa nkandola ekakatanu wa ngasɔ.”—The New York Times, Ngɔndɔ ka ntondo 29, 2024.

• Ɔkɔnya ɔmɔtshi wakɛnya ɔnɛ: “Ɛlɔngɔlɔngɔ efula ndjaɛkɛka le anto wadja tovidɛo lo rɛzo sɔsio (YouTube) lo dihole dia ndjaɛkɛ le ase pɔlitikɛ.”—The Korea Times, Ngɔndɔ ka ntondo 22, 2024.

Onde sho koka ndjaɛkɛ le ase pɔlitikɛ dia monga la nshi yayaye y’amɛna? Le na akokaso ndjaɛkɛ?

Onga la yewo le onto layaɛkɛyɛ le nde

Anto pombaka monga la yewo lo dikambo di’anto wayaɛkɛwɔ le wɔ. Bible mbutaka ɔnɛ: “Kanga enginya atetawɔka ɛtɛkɛta tshɛ, koko kanga kɛsɔ atokanaka yimba lo ena tshɛ katakolande.”—Tokedi 14:15.

• Dia nkondja alako w’eshika lo kɛnɛ kendana la woho wa nsɛdingola nsango yalongolayɛ, adia sawo diele l’ɔtɛ a dui ɔnɛ: “Protégez-​vous de la mésinformation.”

Laadiko dia laasɔ, kaanga ase pɔlitikɛ woleki losembwe ndo wele la eyango w’amɛna, wekɔ l’elelo lo kɛnɛ kakokawɔ nsala. Diakɔ diatɔhɛmɔla Bible ɔnɛ:

• “Tanyoyaɛkɛke le ewandji kana le ɔna onto lahakoke mbela panda.”—Osambo 146:3.

Ɔnɔmbɔdi wakokayɛ ndjaɛkɛ le nde

Bible mɛnyaka dia Nzambi akasɔnɛ ɔnɔmbɔdi wele l’akoka ndo wakokaso mbɛkɛ otema, mbuta ate: Yeso Kristo. (Luka 1:32, 33) Yeso mbele Nkumekanga ka Diolelo dia Nzambi, lowandji lolɛ oma l’olongo.—Mateo 6:10.

• Enda lande na kakokayɛ ndjaɛkɛ le Yeso ndo kɛnɛ kayondosala dia nkandola ekakatanu wahomana la so. Adia sawo diele l’ɔtɛ a dui ɔnɛ: “Ele Nkumekanga ka Diolelo diaki Nzambi?” ndo “Kakɔna kayosala Diolelo diaki Nzambi?”