Onde ekɔ lowandji lɔmɔtshi loshikimadi dimɛna layokoka mbolɛ nkɛtɛ k’otondo?​—Kakɔna kata Bible lo dikambo sɔ?

Mandji ya l’andja w’otondo yekɔ lo pomana l’efukutanu. Kaanga wedja wɛnama dia wekɔ ki, mandji yawɔ yekɔ lo sutshasutshama oma l’awui wa kɔlɔ, vɔtɛ yahaselama dimɛna, diatɔnelo l’awui wa pɔlitikɛ ndo ata.

Bible mɛnyaka di’ekɔ lowandji lɔmɔtshi loshikimadi dimɛna. Ondo wɛ amboshilaka mboka dia lowandji lɔsɔ. Ekɔ lowandji lakatɛkɛta Yeso Kristo lo dɔmbɛlɔ di’ɛnyɛlɔ.

• “Kanyɔlɔmbake ɔnkɔnɛ nyate: ‘Shɛso lele l’olongo, lokombo layɛ lakidiame. Diolelo diayɛ diaye. Lolango layɛ latshame la nkɛtɛ oko watshamalɔ l’olongo.’”​—Mateo 6:9, 10.

Kakɔna kata Bible lo dikambo dia Diolelo sɔ?

Diolelo mbele lowandji loshikimadi dimɛna

Diolelo diekɔ lo mbolɛ oma l’olongo.

• Yeso akelɛ lowandji lɔsɔ ɔnɛ “Diolelo dia l’olongo.” (Mateo 4:17; 5:3, 10, 19, 20) Diakɔ diakandate ate: “Diolelo diami bu dia l’andja ɔnɛ.”​—Joani 18:36.

Diolelo diayɔhɛna mandji y’ana w’anto.

• Bible mbutaka ɔnɛ: “Diolelo diakɔ . . . diayominola waolelo akɔ tshɛ ndo diayowashila oshiki, ko diɔ diɔamɛ diayotshikala pondjo.”​—Danyɛlɛ 2:44.

Diolelo diele Yeso Kristo nkumekanga kadiɔ hadiolanyemaki pondjo.

• Bible mbutaka ɔnɛ: “Lowandji lande lekɔ lowandji la pondjo lahateta ndo diolelo diande hadiotolanyema.”​—Danyɛlɛ 7:13, 14.

Diolelo sɔ diayela wɔladi ndo lotui tshitshi la nkɛtɛ.

• Bible mbutaka ɔnɛ: “Onto tshɛ ayodjasɛ lo wɔladi l’atei wa dikambɔ diande dia vinyɔ ndo di’esongo ande wa fingo, ndo ndooko onto layowaotsha wɔma.”​—Mika 4:4, Bible en français courant.

Eka awui efula wendana la Diolelo

Lam’aki Yeso lanɛ la nkɛtɛ, nde aketsha wenya efula dia ‘nsambisha lokumu l’ɔlɔlɔ la Diolelo.’ (Mateo 9:35) Nde akate nto ate:

• “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.”​—Mateo 24:14.

Ɛlɔ kɛnɛ, lokumu l’ɔlɔlɔ lekɔ lo sambishama lo wedja ndekana 240. Tambokɔlɔmba dia wɛ mbeka awui efula wendana la lowandji lɔsɔ ndo woho wakokayɛ nkondja wahɔ oma l’ɛlɔmbwɛlɔ kalɔ.

Lam’alangɛ, enda vidɛo yele l’ɔtɛ a dui ɔnɛ Diolelo diaki Nzambi kɛdikɛdi na?