Woho wa monga l’ɔngɛnɔngɛnɔ lo tena dia paa—Kakɔna kata Bible lo dikambo sɔ?

Lo nshi ya paa yasɛnaso nyɛ, hatokoke nsɔna kɛnɛ kakoka tokomɛ. Koko ɔngɛnɔngɛnɔ aso nemanɛka aha lo kɛnɛ katokomɛ, koko lo woho wɔsaso akambo watokomɛ. Bible mbutaka dia kaanga mbahomanawɔ l’ekakatanu, “anto wele l’ɔngɛnɔngɛnɔ ngɛnangɛnaka la lɔsɛnɔ tena tshɛ.” (Tokedi 15:15, Bible en français courant) Akokaso nsala dia mfudia ɔngɛnɔngɛnɔ aso? Tende woho wakoka alako wele lo Bible tokimanyiya.

Ndɔshana l’ekiyanu

Bible mbutaka ɔnɛ: “Ekiyanu lo otema w’onto mbɔkɔmɔlaka, koko tshɛkɛta y’ɔlɔlɔ keketshaka.”​—Tokedi 12:25.

• Bible koka tokimanyiya dia ndɔshana l’ekiyanu. Dia mbeya woho wakoka dui sɔ salema, adia sawo “Ce que la Bible dit au sujet de l’inquiétude.”

Ndjaoka opoko

Bible mbutaka ɔnɛ: “Ɔngɛnyi wa mɛtɛ mbokanaka ngandji tena tshɛ ndo ekɔ ɔnanyɔ lakokayɛ mendɛ le nde lo tena dia paa.”​—Tokedi 17:17.

• Bible kekɔ l’alako wakoka tokimanyiya dia ndɔshana la nsaki ka ndjaoka opoko lo monga l’angɛnyi w’eshika wakoka tokimanyiya di’aha ndjaoka opoko. Adia sawo “Woongelo wa l’angɛnyi tokimanyiyaka di’aha ndjaoka opoko​​—Ngande wakoka Bible tokimanyiya?.”

Mboka Nzambi ndo osekaso onto ngandji

Bible mbutaka ɔnɛ: “Langa Jehowa Nzambi kayɛ la otema ayɛ tshɛ ndo la anima ayɛ tshɛ ndo la yimba yayɛ tshɛ. . . . Langa wonyayɛ onto oko wayalangayɛ.”a​—Mateo 22:37-39.

• Dɔmbɛlɔ koka tokimanyiya dia mfudia ngandji kokaso Nzambi. Dia nyomeka akambo akina, adia sawo “Onde Nzambi pokamɛka alɔmbɛlɔ aso?”

• Sho mbokaka anto akina ngandji lo mbasalɛ akambo woho wakate Yeso dia mbasalɛ. Nyomeka awui akina lo sawo “Elɛwɔ dako dioleki dimɛna?”

Onde wɛ nangaka mbeya woho wakoka Bible kokimanyiya dia monga l’ɔngɛnɔngɛnɔ lo nshi ya paa nyɛ? Naka ngasɔ, tambokɔlɔmba dia wɛ mbeka la so Bible ofele.