Woongelo wa l’angɛnyi tokimanyiyaka di’aha ndjaoka opoko​—Ngande wakoka Bible tokimanyiya?

L’ɔnɔnyi wa 2023, enganga waketawɔ dia eokelo k’opoko k’ekɔ l’etombelo wa kɔlɔ efula lo yoonge ya demba ndo vɔ pombaka nsala dui dimɔtshi lo dikambo sɔ. Onde eokelo k’opoko koka nshila?

• Dr. Vivek Murthy, lele Chirurgien général des États-Unis akate ate: “Sho koka ndjasalɛ kɔlɔ lo yoonge yaso ya demba ndo nshisha ɔngɛnɔngɛnɔ naka sho ndjaoka opoko kana ndjanganya l’anto akina.” Ndo nde kotshaka ɔnɛ: “sho koka nsala dui dimɔtshi lo dikambo sɔ.” Ko dui diakɔna? “Ntakola wanya amɔtshi lushi tshɛ dia nkeketsha diɔtɔnganelo diaso l’anto akina.”a

Eokelo k’opoko keema tsho etombelo wa wanganelo l’anto akina. Kaanga vɔ koongaka l’atei w’anto akina, anto amɔtshi koka ndjaoka opoko. Bible koka tokimanyiya, oyadi ɔkɔkɔ akɔna wele la so wa ndjaoka opoko. Tɔ k’ekɔ l’alako w’eshika wakoka tokimanyiya dia ndɔshana la eokelo k’opoko ndo nkeketsha diɔtɔnganelo diaso l’anto akina.

Atɔndɔ wa lo Bible koka tokimanyiya

Onga onto lasawola dimɛna. Kɛsɔ nembetshiyaka dia wɛ hahombe tsho mbutɛka anto akina kɛnɛ kele la yɛ, koko monga nto onto lahokamɛ dimɛna. Naka wɛ ndjasha efula le anto akina, kete wɛ ayoleka nkeketsha diɔtɔnganelo diasayɛ la wɔ.

• Tɔndɔ dia lo Bible: “Tanyendake paka wahɔ anyu hita eto, koko nyendake ndo wahɔ w’anto akina .”​—Filipɛ 2:4.

Onga l’angɛnyi wotshikitanyi. Onga l’angɛnyi wokoole, wele akɛnda, wele la mbekelo yotshikitanyi la yayɛ kana wotshikitanyi la yɛ wodja.

• Tɔndɔ dia lo Bible: “Nyodihole etema anyu hwe .”​—2 Kɔrɛtɔ 6:13.

Dia nkondja alako akina l’oyango wa ndeka nkeketsha diɔtɔnganelo diayɛ l’anto akina, adia sawo diele l’ɔtɛ a dui ɔnɛ: “Comment combler notre besoin d’amitié.”