Kimanyiya anto akina tokonyaka di’aha ndjaoka opoko​—Kakɔna kata Bible lo dikambo sɔ?

Anto efula wa l’andja w’otondo w’ekɔ lo ndjaoka opoko ndo ndjaɔsaka dia hawokoke nsukana l’anto akina. Ambeyi amɔtshi w’awui wa siansɛ mbutaka dia naka sho monga la mbekelo ka nkimanyiya anto akina, kete tayɔlɔshana la tokanyi ta ngasɔ.

• Instituts nationaux de la santé des États-Unis mbutaka ɔnɛ: “Kimanyiya anto wele lo dihombo tokimanyiyaka dia monga la lɔsɛnɔ la dimɛna ndo koka tokimanyiya dia ndɔshana la tokanyi ta ndjaoka opoko kana ndjaanganya l’anto akina.

Bible toshaka alako shikaa wa woho wakokaso nkimanyiya wanɛ wele lo dihombo. Okambelo wa la kɛnɛ katatɔ koka tokimanyiya dia ndɔshana la tokanyi ta ndjaoka opoko.

Kakɔna kakokayɛ nsala?

Onga la lokaho. Yanga waaso wa mbetsha wenya kaamɛ l’anto akina, djekoleko okoko l’okoko. Onga suke dia nkahana l’anto akina kɛnɛ kele layɛ. Etena kasalayɛ ngasɔ, vɔ wayonga suke dia mɛnya lowando ndo kɛsɔ koyokokimanyiya dia nkoma ɔngɛnyi awɔ.

• Tɔndɔ dia lo Bible: “Nyonge la mbekelo ka nkaha, ko wayonyokahɛ.”​—Luka 6:38.

Kamba la wolo ayɛ dia nkimanyiya anto akina. Yanga waaso wa nkimanyiya anto wele l’ekakatanu wa welo. Kɛsɔ koka nembetshiya mbahokamɛ la kɛtshi tshɛ kana mbasalɛ tumu yakoka mbakimanyiya dia ndjaoka dimɛna ndo mbanyɛ wotsho ɔmɔtshi.

• Tɔndɔ dia lo Bible: “Ɔngɛnyi wa mɛtɛ mbokanaka ngandji tena tshɛ.”​—Tokedi 17:17.

Dia mbeya awui efula wendana la woho wa nama lɔngɛnyi la dimɛna l’anto akina, adia sawo diele l’ɔtɛ a dui ɔnɛ: “Lɔsɛnɔ la lo nkumbo ndo lɔngɛnyi.”