Onde sho pombaka nɔmbaka asanto?

Okadimwelo washa Bible

Ndooko. Bible mɛnyaka dia sho pombaka nɔmba paka Nzambi, lo lokombo la Yeso. Yeso akatɛ ambeki ande ate: “Woho ɔnɛ mbahombanyu nɔmbaka: Shɛso lele l’olongo, lokombo lakiyɛ lakidiame.” (Mateo 6:9, New American Bible) Ndooko lushi lakatɛ ambeki dia nɔmbaka asanto, andjelo, kana onto okina laadiko dia Nzambi.

Yeso akatɛ nto ambeki ande ate: “Dimi lekɔ mboka ndo mɛtɛ ndo lɔsɛnɔ. Ndooko onto laya oya le Papa naka aha oma lo tshimbo yami.” (Joani 14:6, NAB) Paka Yeso oto mbele Nzambi aketawɔ dia nde tɔtɛkɛtɛ.​—Hɛbɛru 7:25.

Ko naka lalɔmba Nzambi ko lalɔmba ndo asanto?

Lo Ɛlɛmbɛ dikumi, Nzambi akate ate: “Dimi, NKUMADIƆNDJɔ, Nzambi kayɛ, lekɔ Nzambi ka kandjema.” (Etombelo 20:5, NAB) Lo yoho yakɔna yende Nzambi ka “kandjema”? Nɔtɛ ka l’ɛse ka dikatshi ka lo ekadimwelo ka Bible kelɛwɔ New American Bible mbutaka dia nde “nɔmbaka dia mbomamema paka ndamɛ oto.” Nzambi nɔmbaka dia tshelo tshɛ yendana la omamemelo ndo la ɔtɛmwɛlɔ, mbidja ndo dɔmbɛlɔ pombaka ntshɔ paka otsha le nde.​—Isaya 48:11.

Tayonyangiya Nzambi naka sho nɔmba onto okina laadiko dia nde, oyadi asanto kana waa andjelo w’ekila. Etena kakahembe ɔpɔstɔlɔ Joani ntɛmɔla ondjelo ɔmɔtshi, ondjelo akɔ akoshimbe lo mbotɛ ate: “Totshake dikambo ndo! Dimi lekɔ wonyayɛ okambi ndo ɔtɔi ɔmɔtshi l’atei w’ananyɔ wanɛ wasambisha lo dikambo dia Yeso. Tɛmɔla Nzambi.”​—Ɛnyɛlɔ 19:10, NAB.