Ekadimwelo lo ambola w’oma lo Bible / Lɔsɛnɔ ndo nyɔi / Ngande wakokaso ntondoya wɔma wa nyɔi?

Okadimwelo washa Bible

Aha la taamu, sho mbokaka nyɔi wɔma oko wakokaso mboka otunyi ɔmɔtshi ndo sho salaka kɛnɛ tshɛ kakokaso nsala dia nkokɛ nsɛnɔ yaso. (1 Kɔrɛtɔ 15:26) Koko wanɛ wele la wɔma wa kɔlɔ wa nyɔi l’ɔtɛ wa wetshelo wa kashi kana dikanyiyakanyiya wekɔ “lo lɔhɔmbɔ l’ɔtɛ wa wɔma wele la wɔ wa nyɔi.” (Hɛbɛru 2:​15) Mbeya akambo wa mɛtɛ ayokotshungola oma lo wɔma wa nyɔi, wɔma wakoka kokonya diaha wɛ monga l’ɔngɛnɔngɛnɔ wa nsɛna.​—Joani 8:​32.

Mɛtɛ lo dikambo dia nyɔi

• Wanɛ wambovɔ haweye ndooko dui. (Osambo 146:4) Lam’ele Bible mbɛdikaka nyɔi la djɔ, wɛ hahombe mboka wɔma ɔnɛ wɛ ayosoyamaka pondjo pondjo l’ɔkɔngɔ wa nyɔi.​—Osambo 13:3; Joani 11:11-​14.

• Wanɛ wambovɔ hawokoke tosalɛ kɔlɔ. Kaanga wanɛ waki atunyi aso wa ngala “bu la wolo lo nyɔi.” (Tokedi 21:16) Bible mbutaka ɔnɛ: “Lohetsho lawɔ ndo kandjema kawɔ kamboshila ndanyema.”​—Ondaki 9:6.

• Nyɔi bu ekomelo a shimu. Diɛsɛ la eolwelo, Nzambi ayosha wanɛ wakavu lɔsɛnɔ nto.​—Joani 5:​28, 29; Etsha 24:15.

• Nzambi ndakaka dia ayonga etena kɛmɔtshi kele “nyɔi hatoyala nto.” (Ɛnyɛlɔ 21:4) Lo kɛnɛ kendana la etena kɛsɔ, Bible mbutaka ɔnɛ: “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo,” mbuta ate wayotshungɔ tshɛ lo tshɛ oma lo wɔma wa nyɔi.​—Osambo 37:29.