Onde Ɛmɛnyi wa Jehowa wakatshikitanya Bible l’oyango wa kiɔtɔnganyiya la waetawɔ awɔ?
Ndooko. Otshikitanyi la woho wafɔnya anto akina, etena kakatashihodia dia waetawɔ aso kɔmbɔtɔnɛka la Bible tshɛ lo tshɛ, sho takatshikitanya waetawɔ aso.
Edja efula la ntondo ka sho ndjotatɛ ntondja Ekadimwelo k’andja w’oyoyo ka Afundelo w’Ekila lo Angɛlɛ lo 1950, sho takasɛdingola Bible dimɛna. Sho takakambe la dikadimwelo dia Bible diakatanemaka ndo waetawɔ aso wakahikama lo dikadimwelo sɔ. Enda bɛnyɛlɔ dimɔtshi diendana la waetawɔ woketawɔka Ɛmɛnyi wa Jehowa oma ko nshi y’edjedja, kele oshikikɛ wɛmɛ dia kana vɔ mbɔtɔnɛka la kɛnɛ ketsha Bible mɛtɛ.
Kɛnɛ ketawɔso: Nzambi bu Losato l’osanto. Tshoto y’Etangelo ya Siɔna ya Ngɔndɔ k’esambele 1882 yakate ɔnɛ: “Ambadi aso shihodiaka dia, lam’ele tekɔ la mbetawɔ le Jehowa, Yeso ndo nyuma k’ekila, sho mbikadjaka wetshelo wahatombi oma l’Afundelo wata ɔnɛ, ekɔ Nzambi shato lo onto ɔtɔi kana lo Nzambi ɔtɔi ekɔ anto asato.”
Kɛnɛ kata Bible: “[Jehowa, Nzambi k]asu, ndame keli [Jehowa].” (Euhwelu k’Elembe 6:4, Bible k’Ekila) “Koko leeso, kotamba kolembɔ, eekɔ paka [Nzambi] ɔtɔi akɔ, Mbapa, ɔnɛ lakatonge dyaangɔ cɛɛ ndo l’ɔkɔkɔ waakinde mbeeso lo nsɛna; eekɔ ntoo Owanji akɔ ɔtɔi, Yeeso Kristo, oma leende kele dyaangɔ cɛɛ ndo oma leende keeso la lɔsɛnɔ.” (1 Kɔrɛtɔ 8:6, Dyokaneelo dy’Oyooyo) Yeso ndaamɛ akate ate: “Mbapa ndekami.”—Joani 14:28, Dyokaneelo dy’Oyooyo.
Kɛnɛ ketawɔso: Ndooko sui dia pondjo dia l’ifɛrnɔ. Lo nshila awui wa lo Rɔmɔ 6:23 lo ndjela ekadimwelo ka King James Version, Tshoto y’Etangelo ya Siɔna ya Ngɔndɔ ka samalo 1882 yaki l’ɔtɛ a dui ɔnɛ: “Difutu dia pɛkato ele nyɔi” yakate ɔnɛ: “Ɛtɛkɛta ɛsɔ wekɔ wɔdu ndo mbokɛmaka hwe. Ekɔ dui dia diaambo nɛ dia, efula k’anto wayata ɔnɛ vɔ mbetawɔka Bible oko Ɔtɛkɛta wa Nzambi tetemalaka ndɔshana l’ɛtɛkɛta wokɛma hwe ɛsɔ, vɔ nshikikɛka dia vɔ wekɔ la mbetawɔ ndo ɔnɛ Bible mbetshaka dia difutu di’akambo wa kɔlɔ ele lɔsɛnɔ la pondjo l’asui.”
Kɛnɛ kata Bible: “Anima watsha pɛkato, pombaka mvɔ.” (Ezekiyele 18:4, 20, King James Version) Dilanya di’ekomelo diayolongola wanɛ walɔshana la Nzambi keema sui dia pondjo koko, “oshishuelo wa pundju.”—2 Tɛsalɔnika 1:9, Dikelemba di’Oyuyu.
Kɛnɛ ketawɔso: Diolelo diaki Nzambi diekɔ lowandji la mɛtɛ, koko aha tsho dikambo di’otema. Lo kɛnɛ kendana la Diolelo diaki Nzambi, Tshoto y’Etangelo ya Siɔna ya Ngɔndɔ ka dikumi l’ahende 1881 yakate ɔnɛ: “Eshikimalelo ka lowandji lɔsɔ mbayolanya mandji tshɛ ya la nkɛtɛ.”
Kɛnɛ kata Bible: “Lu nshi ya khumi ya dikanga yako, Nzambi leli l’ulungu ayutundja diulelu diahalanaki pundju. Dio hadiuyala l’okongo a wudja ukina. Dio diayulanya waulelu ako tshe, diayâshila ushiki, ku dio diame diayushikikala pundju.”—Danyele 2:44, Bible k’ekila.
Onde Ɛmɛnyi wa Jehowa kambaka paka la Ekadimwelo k’andja woyoyo dia sukɛ waetawɔ awɔ?
Ndooko, sho tekɔ lo ntetemala nkamba la dikadimwelo efula dia Bible l’olimu aso w’esambishelo. Ekɔ mɛtɛ dia sho kahɛka wanɛ weka la so kɔpi kɛmɔtshi ka Bible—Ekadimwelo k’andja w’oyoyo ofele. Koko, sho mbekaka nto l’anto walanga nkamba la dikadimwelo dikina dia Bible.