ƐLƆNGƆLƆNGƆ WEKƆ LO NDJAMBOLA
Ngande wakoka Bible kimanyiyami?—Etenyi 2: Etɛ wadielo wa Bible dui di’ɔngɛnɔngɛnɔ
Will, ɔlɔngɔlɔngɔ ɔmɔtshi wele l’ɛnɔnyi dikumi l’ɛmɔtshi mbutaka dia “Bible koka mɛnaka oko disanya, naka wɛ heye yoho ya dimɛna ya kiada.”
Onde wɛ nangaka mbishola toho tayokokimanyiya dia nanga wadielo wa Bible? Sawo diayokokimanyiya.
Tɛkɛtsha Afundelo
Yasha tshɛ lo kɛnɛ kadiayɛ. Wɛ koka nkamba la yoho nyɛ:
Sɔna ɔkɔndɔ ɔmɔtshi wa lo Bible walangayɛ mbeka. Wɛ mbeyaka nsɔna dikambo dimɔtshi diakatombe kana divɛsa dia l’Evanjiliɔ ɔmɔtshi, kana wɛ koka nsɔna ɔkɔndɔ ɔmɔtshi w’oma lo adramɛ wa lohokamɛ tsho dia wadielo wa Bible wa lo jw.org.
Adia ɔkɔndɔ akɔ. Wɛ koka mbadia ɔkɔndɔ akɔ wɛmɛ, kana mbadia ɔkɔndɔ akɔ la dui dia wolo kaamɛ l’angɛnyi ayɛ kana ase nkumbo kayɛ. Onto ɔmɔtshi mbeyaka tadiaka awui waki ɔkɔndɔdi ndo anto akina wayɔsa ahole w’anto akina wa l’ɔkɔndɔ akɔ.
Hemba nkamba la dako ɔtɔi kana l’alako efula l’atei w’alako wayela anɛ:
Sala sango dia nembetshiya ɔkɔndɔ wadiayɛ. Kana sanga sango diendana l’ɔkɔndɔ akɔ diɛnya woho wakayasalema akambo. Lo asango akɔna, funda awui amɔtshi dia nkɔndɔla kɛnɛ kakete.
Sala adiagramɛ. Ɛnyɛlɔ, etena kadiayɛ ɔkɔndɔ wendana l’onto ɔmɔtshi la kɔlamelo, ɔtɔnganyiya waonga ndo ditshelo diande la ɛtshɔkɔ wakandalongola.
Kɔnya ɔkɔndɔ ɔsɔ oko dui diasalema nshi nyɛ. Kɔndɔla ɔkɔndɔ akɔ lo monga la tokanyi totshikitanyi tendana la ɔkɔndɔ akɔ ndo “kɔnya” anto woleki tɛkɛtama l’ɔkɔndɔ akɔ ndo ɛmɛnyi ɛmɔtshi wa dikambo diakɔ.
Naka ɔmɔtshi l’atei w’anto wa l’ɔkɔndɔ akɔ akɔshi yɛdikɔ mɔtshi ya kɔlɔ, kete kanyiya woho wakakomɛ dui sɔ. Tɔshi ɛnyɛlɔ ka woho wakanguna Petero Yeso. (Makɔ 14:66-72) Ngande wakandakoke nkandola okakatanu ɔsɔ lo yoho ya dimɛna?
Naka wɛ ekɔ wolo lo kɛnɛ kendana la mfunda awui, kete mfunda ɔkɔndɔ ɔmɔtshi diɛsɛ l’ɔkɔndɔ wa Bible wadishayɛ. Dja ndo wetshelo wakoka onto nkondja oma l’ɔkɔndɔ akɔ.—Rɔmɔ 15:4.
Wɛ kokaka tɛkɛtsha Bible!
Sala eyangelo!
Naka wɛ sɛdingoka kiambokambo tshɛ, kete wɛ koka mbishola diangɔ di’oshinga wolo dioshɛmi l’ɔkɔndɔ ɔmɔtshi. Mbala mɔtshi, tshɛkɛta tshɔi kana tɔtɛkɛta tohende t’oma l’ɔkɔndɔ ɔmɔtshi wa lo Bible mbeyaka ketsha akambo efula.
Ɛnyɛlɔ, ɛdika Mateo 28:7 la Makɔ 16:7.
Lande na kakashikikɛ Makɔ ɔnɛ Yeso ayɛnama ndooko edja le ambeki ande “ndo Petero”?
Djembetelo: Makɔ kɔmɛna akambo asɔ la washo ande ndo ondo nde akeye awui asɔ oma le Petero.
Ɛngɔ k’oshinga wolo koshɛmi: Lande na kakahombe Petero keketshama dia mboka dia Yeso nangaka mbɛɛna nto? (Makɔ 14:66-72) Ngande wakɛnya Yeso dia Petero aki ɔngɛnyi w’oshika le nde? Ngande wakokayɛ mbokoya Yeso ndo monga ɔngɛnyi w’oshika le anto akina?
Naka wɛ tɛkɛtsha Afundelo ndo nsala eyangelo lo kiambokambo tshɛ, kete wadielo ayɛ wa Bible wayonga dikambo di’ɔngɛnɔngɛnɔ!