Onde falanga ekɔ odio wa weho tshɛ w’akambo wa kɔlɔ?

Okadimwelo washa Bible

Ndooko. Bible hate dia falanga yekɔ kɔlɔ, kana ɔnɛ yɔ mbele lo kiɔkɔ ya akambo tshɛ wa kɔlɔ. Etelo k’ɔnɛ “falanga ekɔ odio wa weho tshɛ w’akambo wa kɔlɔ” ekɔ ɛtɛkɛta w’oma lo Bible wɔsami etenyi ndo wanganyiya anto. Bible mbutaka hwe dia “ngandji ka falanga ekɔ odio wa weho tshɛ w’akambo wa kɔlɔ.”a—1 Timɔte 6:10.

Kakɔna kata Bible lo dikambo dia falanga?

Bible mbutaka lo kɛnɛ kendana la falanga dia naka sho nkamba la yɔ la lomba, kete yɔ koka tokimanyiya ndo ɔnɛ yɔ “kokɛka.” (Ondaki 7:12) Ndo nto, Bible keketshaka wanɛ wele la mbekelo ka kahɛ anto akina dia vɔ koka mbakahɛ falanga.—Tokedi 11:25.

L’etena kakɔ kaamɛ, Bible tɔhɛmɔlaka lo kɛnɛ kendana la mbidja falanga lo dihole dia ntondo lo lɔsɛnɔ laso. Tɔ mbutaka ɔnɛ: “Tanyongake la ngandji ka falanga, koko nyɔngɛnangɛnake la kɛnɛ kele la nyu.” (Hɛbɛru 13:5) Kɛsɔ tetshaka dia nkitsha falanga lo dihole diayɔ ndo aha nyanga dia nkoma ɔngɔnyi. Ndo sho pombaka ngɛnangɛna la dangɔ diele laso mɛtɛ ohomba, ɛnyɛlɔ oko diango dia ndɛ, ahɔndɔ, ndo luudu.—1 Timɔte 6:8.

**Lande na katɔhɛmɔla Bible lo kɛnɛ kendana la ngandji ka falanga?**

Akanga wa lokaki hawotokondja lɔsɛnɔ la pondjo. (Ɛfɛsɔ 5:5) Nɛ dia lokaki ekɔ yoho mɔtshi y’ɔtɛmwɛlɔ wa dikishi, kana y’ɔtɛmwɛlɔ wa kashi. (Kɔlɔsayi 3:5) Ɔkɔkɔ okina ele, lo nyanga la wolo tshɛ dia nkotsha nsaki yawɔ, kanga lokaki hatoyelaka mbala efula atɔndɔ w’ɛlɔlɔ. Todi 28:20 mbutaka dia “ɔnɛ lasamanya dia nkondja ɔngɔnyi hatotshikala aha l’onongo.” Vɔ koka pembama dia nsala akambo wa kɔlɔ efula, ɛnyɛlɔ mpɔtwana, mbiva, nkesa kana ndjaka.

Kanga mbele ngandi ka falanga hakonya onto dia nde monga la lɔkɛwɔ la kɔlɔ, tɔ koka monga la etombelo ekina wa kɔlɔ. Bible mbutaka dia “wanɛ wamboyashikikɛ dia monga ɛngɔnyi kɔka l’ohemba, lo djonga ndo lo nsaki efula y’anyanya ndo ya kɔlɔ yakonya anto lo elanyelo ndo lo eshishwelo.”—1 Timɔte 6:9.

Ngande wakokaso nkondja wahɔ oma lo alako watosha Bible lo kɛnɛ kendana la falanga?

Naka sho ntona dia ndjela nsaki ndo tokanyi ta kɔlɔ lo kɛnɛ kendana la oyangelo wa falanga, kete tayoyasha nɛmɔ, tayetawɔma le Nzambi ndo nde ayotosukɛ. Lo kɛnɛ kendana la wanɛ wasala la wolo dia mbɔɔngɛnyangɛnya, Nzambi mbalakaka ate: “Dimi hakotshikaki ndo hakokalɛki pondjo.” (Hɛbɛru 13:5, 6) Nde toshikikɛka nto ɔnɛ “kanga kɔlamelo ayolongola ɛtshɔkɔ efula.”—Tokedi 28:20.

Avɛsa wa lo Bible wendana falanga

Ondaki 7:12: “Falanga kokɛka.”

Kɛnɛ kalembetshiya dui sɔ: Etena kakambaso la yɔ la lomba, falanga koka monga la wahɔ le so nɛ dia yɔ kokaka tokokɛ.

Luka 12:15: “Kanga etena kele onto la diangɔ efula, lɔsɛnɔ lande halolemanɛ la diangɔ diele la nde.”

Kɛnɛ kalembetshiya dui sɔ: Falanga bu ɛngɔ koleki ohomba lo lɔsɛnɔ laso, ndo yɔ hayototosha panda.

1 Timɔte 6:10: “Ngandji ka falanga ekɔ odio wa weho tshɛ w’akambo wa kɔlɔ, ndo amɔtshi wakayala la tɔ, ko wakatakɔ mboka ka mbetawɔ ndo wakayatshatsha la lonyangu l’efula.”

Kɛnɛ kalembetshiya dui sɔ: Monga la falanga bu kɔlɔ. Koko anto wele la ngandji ka falanga, mbuta ate wanɛ wamboyikonya ɛngɔ koleki ohomba lo nsɛnɔ yawɔ, wamboyayangɛ ekakatanu efula, ɛnyɛlɔ ohandjwelo wa nkumbo yawɔ ndo waya la yoonge l’ɔtɛ wayawɔ mfumbe k’olimu.

Hɛbɛru 13:5: “Tanyongake la ngandji ka falanga, koko nyɔngɛnangɛnake la kɛnɛ kele la nyu.”

Kɛnɛ kalembetshiya dui sɔ: Lo dihole dia nyanga dia nkoma ɔngɔyi, ayonga dui dia lomba dia sho ngɛnangɛna la kɛnɛ kele mɛtɛ laso ohomba.

Mateo 19:24: “Wɔtwɛlɔ wa kanga ɔngɔnyi lo Diolelo dia Nzambi ekɔ oko mponda mbɔtɔ lo wosho wa ntɛdi.”

Kɛnɛ kalembetshiya dui sɔ: Yeso akasha ɔlɔngɔ a pami ɔmɔtshi leeta la nde mboyela. Pami kɛsɔ akatone nɛ dia nde akalangaka lomombo lande efula. Diakɔ diakasha Yeso ɔhɛmwɛlɔ ɔmɔtshi. Onto ladja lomombo lo dihole dia ntondo mbeyaka nshisha lɔsɛnɔ la pondjo.

a Divɛsa sɔ kadimɔmaka nto ɔnɛ: “Ngandji ka falanga kekɔ odio wa weho tshɛ w‘akambo washa paa l‘asolo.“