Tokedi 3:5, 6—“Tɛkamake yimba yayɛ hita”

“Yaɛkɛ le Jehowa la otema ayɛ tshɛ, tɛkamake yimba yayɛ hita.Lo mboka yayɛ tshɛ kowodjake yimba, ko nde ayokosembolɛ ɛsɛsɛ ayɛ.”​—Tokedi 3:5, 6, Ekadimwelo k’andja w’oyoyo.

“Ekamaki LATUYALAKA l’utema aye tshe, tekamaki yimba yaye hita. Uwetawoki lu akambu aye tshe, ku ndi ayukolongoswela mbuka yaye.”​—Tokedi 3:5, 6, Bible k’Ekila.

Kɛnɛ kalembetshiya Tokedi 3:5, 6

Sho pombaka nyanga ɛlɔmbwɛlɔ ka Jehowaa Nzambi lo dihole dia shoamɛ mbɔsa tɛdikɔ t’ohomba.

“Yaɛkɛ le Jehowa la otema ayɛ tshɛ.” Sho mɛnyaka dia sho ndjaɛkɛka le Nzambi, etena kasalaso awui lo yoho y’ɔngɛnyangɛnya. Sho pombaka ndjaɛkɛ le Nzambi tshɛ lo tshɛ, mbuta ate l’otema aso tshɛ. Mbala efula lo Bible, otema mendanaka la lonto la l’etei, mbuta ate nsaki, eyango, tokanyi ndo ekanelo ka yimba k’onto. Diakɔ diele, ndjaɛkɛ le Nzambi l’otema aso tshɛ nɔmbaka awui efula, aha tsho nsaki yaso. Ɔsɔ ekɔ ɔsɔnwɛlɔ wasalaso nɛ dia tekɔ l’eshikikelo tshɛ lo tshɛ dia Otungi aso mbeyaka kɛnɛ koleki dimɛna le so.​—Rɔmɔ 12:1.

“Tɛkamake yimba yayɛ hita.” Tekɔ l’ohomba wa ndjaɛkɛ le Nzambi, nɛ dia sho bu kokele ndo hatohombe ndjaɛkɛ lo dikoka diaso di’ekanelo ka yimba. Naka sho ndjaɛkɛ le so shoamɛ kana mbetawɔ dia nsaki yaso monga la shɛngiya l’ɛsɔnwɛlɔ aso, kete sho koka mbɔsa tɛdikɔ tɛnama dia tekɔ amɛna, koko tayonga l’etombelo wa kɔlɔ l’ekomelo. (Tokedi 14:12; Jɛrɛmiya 17:9) Lomba laki Nzambi ndeka laso la fwa. (Isaya 55:8, 9) Naka sho nɔmbwama la tokanyi tande, kete tayotondoya lo lɔsɛnɔ laso.​—Osambo 1:1-3; Tokedi 2:6-9; 16:20.

“Lo mboka yayɛ tshɛ kowodjake yimba.” Sho pombaka nyangaka kanyi yaki Nzambi l’awui tshɛ wa lo lɔsɛnɔ laso ndo lo yɛdikɔ tshɛ y’ohomba yɔsaso. Sho salaka dui sɔ lo mbɔlɔmba dia nde tɔlɔmbɔla ndo lo ndjela kɛnɛ katande l’Ɔtɛkɛta ande, Bible.​—Osambo 25:4; 2 Timɔte 3:16, 17.

“Nde ayokosembolɛ ɛsɛsɛ ayɛ.” Nzambi sembolaka ɛsɛsɛ aso lo tokimanyiya dia nsɛna lo yoho yɔtɔnɛ l’atɔndɔ ande wosembwe. (Tokedi 11:5) Lo nsala ngasɔ, sho mbewɔka ekakatanu efula ndo ndekaka monga la lɔsɛnɔ l’ɔngɛnɔngɛnɔ.​—Osambo 19:7, 8; Isaya 48:17, 18.

Lokanyi lele lo Tokedi 3:5, 6

Dibuku dia Tokedi diekɔ l’atɔndɔ watokimanyiya dia monga la lɔsɛnɔ la ngɛnyangɛnya Nzambi ndo latɔngɛnyangɛnya. Totshapita divwa t’etatelo fundama oko ombutshi wa pami mbasha ɔnande la pami la langande alako. Tshapita 3 mbikaka epole ɔsɛkɛ lo wahɔ wakondja wanɛ wɔsa lomba l’Otungi aso la nɛmɔ ndo wakamba l’alako ande.​—Tokedi 3:13-26.