Tokedi 16:3—“Ekamaki [Jehowa] l’elimu aye tshe”

“Yaɛkɛ le Jehowa lo kɛnɛ tshɛ kasalayɛ, ko sangwelo diayɛ diayolowana.”​—Tokedi 16:3, Bible––Ekadimwelo k’andja w’oyoyo.

“Ekamaki [Jehowa] l’elimu aye tshe. Ku sangweyu diaye diayushikikala.”​—Tokedi 16:3, Bible k’Ekila.

Elembetshielo wa Tokedi 16:3

Yokedi nyɛ shikikɛka wanɛ watɛmɔla Nzambi ka mɛtɛ dia asangwelo awɔ wayolowana naka vɔ ndjaɛkɛ le nde lo nyanga ndo ndjela ɛlɔmbwɛlɔ kande.

“Yaɛkɛ le Jehowa lo kɛnɛ tshɛ kasalayɛ.” La ntondo ka mbɔsa oseka yɛdikɔ tshɛ, atɛmɔdi wa Jehowaa nyangaka ɛlɔmbwɛlɔ l’okitshakitsha tshɛ. (Jakɔba 1:5) Lande na? Nɛ dia mbala mɔtshi, anto bu l’akoka wa mbahemɛ oseka dui tshɛ diakoka ntomba lo lɔsɛnɔ lawɔ. (Ondaki 9:11; Jakɔba 4:13-15) Ndo nto, vɔ mbeyaka mpomba lomba dia nkotsha asangwelo awɔ. L’ɔtɛ w’ɛkɔkɔ ɛsɔ, mbayaɛkɛ anto efula le Nzambi. Vɔ salaka ngasɔ lo mbɔɔlɔmbaka dia nyanga ɛlɔmbwɛlɔ ndo vɔ salaka akambo lo yoho yɔtɔnɛ la lolango la nde oko wɛnyishamidiɔ lo Bible, Ɔtɛkɛta ande wakafundama.​—Tokedi 3:5, 6; 2 Timɔte 3:16, 17.

Etelo k’ɔnɛ “Ekamaki [Jehowa]b l’elimu aye tshe” nembetshiya tshɛkɛta lo tshɛkɛta ɔnɛ: “Tshika elimu ayɛ l’anya wa Jehowa.” Lo ndjela elembetshielo washa rɛfɛransɛ ɔmɔtshi, etelo kɛnɛ nembetshiyaka dia “onto ɔmɔtshi mbɔɔsa wotsho wele lande ko mbokitsha lo ahɛka w’onto akina loleki wolo ndo lele l’akoka wa mbɛɛmba.” Wanɛ wayaɛkɛ tshɛ le Nzambi koka monga l’eshikikelo dia nde ayowakimanyiya ndo ayowasukɛ.​—Osambo 37:5; 55:22.

Tshɛkɛta “kɛnɛ tshɛ kasalayɛ” halembetshiya dia Nzambi ayɔtshɔkɔla dikambo tshɛ diakoka anto nsala. Dia nkondja ɛtshɔkɔ wa Jehowa, akambo wasalawɔ pombaka mbɔtɔnɛ la atɔndɔ ande ndo lolango la nde. (Osambo 127:1; 1 Joani 5:14) Nzambi hatshɔkɔla anto wele keema l’okitanyiya. Lo mɛtɛ, “nde fukutanyaka dikongelo dia akanga wa kɔlɔ.” (Osambo 146:9) Etena kakɔ kaamɛ nde sukɛka wanɛ wɛnya okitanyiya awɔ le nde lo nkitanyiya atɔndɔ ande watanema lo Bible.​—Osambo 37:23.

“Ko sangwelo diayɛ diayolowana.” Dikadimwelo dimɔtshi mbutaka ɔnɛ “sangwelo diayɛ diayokotshama.” Lo afundelo wa lo Hɛbɛru, kana wɛnɛ welamɛ ɔnɛ Daka di’edjedja, etelo ka lo Angɛlɛ kokadimɔmi ɔnɛ “ayolowana” mbelaka lokanyi la fɔndasiɔ ka luudu ndo mbala mɔtshi dia mɛnya woho woshikimadi diangɔ diakatonge Nzambi. (Tokedi 3:19; Jɛrɛmiya 10:12) Lo woho akɔ waamɛ, Nzambi ayosala dia nde nkotsha l’eshikikelo tshɛ asangwelo wa wanɛ wasala kɛnɛ kele ɔlɔlɔ, lo mbakimanyiya dia vɔ monga la lɔsɛnɔ la shikaa ndo l’ɔngɛnɔngɛnɔ.​—Osambo 20:4; Tokedi 12:3.

Avɛsa wodingi Tokedi 16:3

Yokedi nyɛ yakafundama oma le Sɔlɔmɔna, ɔnɛ lakafunde etenyi ka woke ka dibuku dia tokedi. Nde aki l’akoka wa mfunda tokedi nunu, diɛsɛ la lomba lakawosha Nzambi.​—1 Kumi ya dikanga 4:29, 32; 10:23, 24.

Lo tshapita ya 16, Sɔlɔmɔna tatɛka la mandola lomba l’oma le Nzambi ndo mɛnya woho wahetshande akanga w’etako. (Tokedi 16:1-5) Oma laasɔ, tshapita nyɛ kimanyiyaka ambadi dia vɔ nshihodia dui dimɔtshi dia mɛtɛ diatanaso lo dibuku dia tokedi mbala ko mbala, mbuta ate, anto koka monga la lomba l’oshika ndo ntondoya akambo wa lo lɔsɛnɔ la wɔ naka vɔ monga l’okitshakitsha ndo mbetawɔ dia Nzambi mbaalɔmbɔla. (Tokedi 16:3, 6-8, 18-23) Mɛtɛ kɛsɔ tanemaka lo Bible mbala ko mbala.​—Osambo 1:1-3; Isaya 26:3; Jɛrɛmiya 17:7, 8; 1 Joani 3:22.

Enda vidɛo ya mondo nyɛ dia mbeya awui amɔtshi wendana la dibuku dia Tokedi.