Dikongelo dia nsanganya ya weke ‘yokɛma ndo yɛnyama’

Ambolekana ɛnɔnyi 130 wele Ɛmɛnyi wa Jehowa wa nshi nyɛ wekɔ lo nsangana kaamɛ lo nsanganya ya weke. Lo nsanganya shɔ, asawo ndekana 40 mbishamaka, anto pokamɛka mishiki, ɛkɔnya ndo mendaka tovidɛo. Di’anto wele lo losanganya nkondja wahɔ ndo keketshama, losanganya lakɔ pombaka ‘mbokɛma ndo mɛnyama’ lo yoho ya dimɛna. (Luka 2:20) Ngande wakambaso la weshasha anyu dia ndjashikikɛ di’anto tshɛ wekɔ lo nkondja wahɔ oma lo nsanganya oyadi dihole diakɔna diewɔ?

Dihomɔ di’Audio/Video diɔtɔnganɛ la dihole tshɛ diasalema losanganya la woke

Asɛkɛ efula wakɛnyawɔ ponde ndo ahole efula wa weke wahomawɔ mishiki wa lo wedja wa l’owɛstɛ, waya la dihomɔ di’Audio/video. Ko laasɔ, etena kasɔnaso ahole asɔ dia nsala losanganya la woke, lande na kakambaso la dihomɔ diaso? Ɔnangɛso David lakamba lo departɛma dia televisɔ dia lo Mbalasa kalɔmbɔla olimu aso wa l’andja w’otondo mbutaka ate: “Ahole efula wasɔnaso dia nsala nsanganya wakakongɛma di’anto ndjela ekongelo l’edja ka wenya ndekana esamalo ndo mbala efula mongaka paka ekongelo kalohokamɛ. Ɛnyɛlɔ l’ahole wakɛnyawɔ ponde, vɔ ndekaka nkamba la diangɔ dia sɔnɔrizasiɔ paka dia mbewoya awui amɔtshi kana mbokiyɛ anto totenyi ta mishiki. Ekra awɔ mɛnyaka paka etshumba wa lo ponde, wa piblisite ndo awui amɔtshi walangawɔ nyomɛnya anto. Otshikitanyi la wɔ, sho kombolaka di’anto menda tovidɛo, mboka ndo nshihodia oseka tshɛkɛta tshɛ y’oma lo lɔyɛnga lo yoho ya dimɛna.”

Oseka dihole tshɛ diasalema losanganya ntshikitana l’ahole akina, diakɔ diele dihomɔ di’Audio/video tshikitanaka. L’ɔkɔngɔ wa vɔ nsɔna ahole wayosalema losanganya, departɛma dia televiziɔ mbidjaka yimba lo dikambo di’ahole wayodjasɛ anto ndo lo woho wa dihomɔ diahombaso nkamba la diɔ dia losanganya mbokɛma dimɛna. Anangɛso shikikɛka ahole wahomba atɛkɛtshi monga, ahole wahomba w’ekra kitshɛma, ndjashikikɛka dia woho wahombawɔ nkɔhama lo yoho ya dimɛna ndo fundaka dihomɔ diayokamba la wɔ l’oyango w’anto tshɛ mɛna ndo ndjela losanganya lo yoho ya dimɛna.

Okongelo wa dihomɔ di’Audio/video mongaka wolo l’ahole wahomba losanganya mbeta l’ɛtɛkɛta efula. Naka losanganya pombaka kadimɔma l’ɔtɛkɛta okina, kete wanɛ wakadimola pombaka mɛna ndo ndjela ekongelo dimɛna ndo oma laasɔ, ekadimwelo awɔ pombaka ntshɔ mbala kakɔ ɔtɔi lo wa aradio wotshikitanyi di’anto woka ɔtɛkɛta akɔ ndjela losanganya. Diɛsɛ la dihomɔ dia tovidɛo diele la so, vidɛo tshɔi koka mɛnyama le anto tshɛ kaanga naka ɛtɛkɛta wa wanɛ wakadimola pombaka mbokɛma l’ɛtɛkɛta enanɛi. Ɔnangɛso David mbutaka ate: “Diangɔ sɔ mongaka l’awui efula ndo wanɛ wayakimɔ la lolango dia nkamba la diɔ pombaka ndowanyɛma lo yoho ya dimɛna.”

Bɛtɛlɛ efula y’ekɔ la dihomɔ di’Audio/video diakamba la wɔ oseka ɔnɔnyi tshɛ. Lɛnɛ ele awui ngasɔ, anangɛso ndjakongɛka di’oseka ehomɔ tshɛ tɔlama lo dihole dikina dia tosala losanganya lokina. Bɛtɛlɛ ka lo États-Unis kambaka l’adɔlɔra ndekana 200 000a oseka ɔnɔnyi tshɛ dia tomaka dihomɔ otsha lo nsanganya ya l’ahole akina. Lo nsala ngasɔ, hatoleke nshisha akuta dia nsomba ndo nɔngɔsɔla dihomɔ diaso. Ɔnangɛso Steven, lakakimanyiya dia nɔmbɔla awui wendana la Audio/video lo losanganya lɔmɔtshi la lo Canada mbutaka ate: “Olui aso w’Audio/video wakasale kɛnɛ tshɛ kakawakoke, wakaadia dihomɔ tshɛ, wakadilɔngɛ lo yoho ya dimɛna dia diɔ monga suke dia losanganya layela.”

Woho wakondjaso dihomɔ ndo wadikokɛso

Ndowɛ dihomɔ di’Audio/video mbɔsaka falanga efula ndo mbala efula dihomɔ sɔ hadioleke monga amɛna ndo akanga adiɔ hawoleke dilɔngɔsɔla. L’ɔtɛ w’ɔkɔkɔ ɔsɔ mbakatasombe dihomɔ dieso la diɔ ohomba. Nshi nyɛ, ekra wa woke wamatawɔ l’ehele dia mɛnya vidɛo ndo woonga la woke nd’otale wa mɛtrɛ 16 lo 10, waya lo adɔlara suke la 24 000 dia mboosomba ndo kaanga ɔkɔdi wa mikro wa mɛtrɛ 15, waya oya lo adɔlɔra 20. Departɛma dia televiziɔ kambaka kaamɛ la departɛma di’osombelo wa diangɔ dia “nkamba akumi” dimɛna la ntondo ka nsomba dihomɔ. (Luka 14:28) Vɔ ndjaokaka ambola wele oko: anto angana wayokondja wahɔ oma lo dihomɔ sɔ? Onde paka sho kosombi dihomɔ di’eyoyo dia nkotsha ehomba awɔ? Onde tekɔ la dihole dia dimɛna dia nama dihomɔ ndo onde tekɔ la dihomɔ diahombama ndo anto wayakimɔ la lolango dia dikokɛ?

Dia nkokɛ dimɛna dihomɔ diaso dia Audio/video ndo nama falanga yaso, sho salaka ɛlɔngɔswɛlɔ ɛmɔtshi mbala la mbala. La ntondo ka ntoma dihomɔ diaso, sho mbodidjaka l’ɛshɛtɛ w’amɛna l’oyango w’aha diɔ ndaana ndo sho nɔngɔsɔlaka ɛshɛtɛ ɛsɔ naka kokaka.

Kɛnɛ kata anto akina ndo woho wakonge ekongelo dimɛna

Anto wele bu Ɛmɛnyi wa Jehowa wakaambe yoho y’efula lo mɛna woho wele dihomɔ diaso dia Audio/video amɛna efula. Ɛnyɛlɔ, l’ɔkɔngɔ a midi wa lushi lɔmɔtshi la losanganya la rejɔ, onto ɔmɔtshi lakamba lo aradio ɔmɔtshi weyama efula akaambe lo mɛna dihomɔ diamɛna diele laso ndo kɛnɛ katondjaso. Ɔnangɛso Jonathan lakimanyiya dia nkongɛ ndo nkamba dimɛna la dihomɔ dia Audio/video lo nsanganya ya weke mbutaka ate: “Nde akaambe efula etena kakandeye di’anto tshɛ wakakambaka waki anto wakayakimɔ la lolango ndo waki kɔmbɔtɔ kalasa dia nsala olimu ɔnɛ.” “Nde akate dia kɔpanyi kande kotetsha nshi tshanu dia nkongɛ diangɔ diakatakongɛ l’edja ka lushi ɔtɔi l’etenyi.” Lo losanganya lokina la woke, pami kɛmɔtshi akate ate: “Lambɛna anto efula wakamba olimu wa mishiki ndo wa vidɛo, koko ɔnɛ ekɔ mbala kami ka ntondo ka mɛna anto wakamba olimu wa dimɛna efula nganɛ!”

Onde wɛ ambokondjaka wahɔ lo losanganya diɛsɛ la dihomɔ dia Audio/video dia lo losanganya la woke? Ondo wɛ mbeyaka ndjaoka oko David, ladjasɛ lo wodja w’Angleterre. Nde mbutaka ate: “L’ekɔ l’ɛnɔnyi 88 ndo lambɔtɔ nsanganya ya weke efula lo lɔsɛnɔ lami. Koko nshi nyɛ kamboleka wɔdu lemi dia ndeka mbidja yimba lo nsanganya diɛsɛ la dihomɔ nɛ. Losaka efula lo tovidɛo t’amɛna, ekongelo k’otondo mbetaka dimɛna ndo amboleka monga wɔdu dia mboka losango ndo nshihodia akambo.” Micheal, ladjasɛ lo wodja wa Nigéria mbutaka ate: “Lam’ele aya bu wolo le anangɛso la akadiyɛso dia vɔ mɛna ɔtɛkɛtshi ndo tovidɛo dimɛna, dui sɔ ambakimanyiya dia vɔ ndjasha tshɛ lo losanganya ndo hawoyoleka ndjasanya etena keta losanganya.”

Etena kayoyonga lo losanganya la woke la l’ɔnɔnyi ɔnɛ lele l’ɔtɛ a dui ɔnɛ: “Tosambisha Lokumu l’ɔlɔlɔ!” ndo kayoyɔtɔ lo losanganya la laande, kana yimba l’olimu wa wolo wakasalema dia wɛ mboka ndo mɛna awui wendana la losanganya lakɔ dimɛna. Tekɔ la lowando lo weshasha anyu tshɛ mbidja ndo wɛnɛ wakimɔnyu lo tshimbo ya donate.jw.org, nɛ dia vɔ wambokimanyiya di’awui anɛ tshɛ salema. Losaka efula.