“Ndooko onto lakatɔtɛkɛta ngasɔ”

Yeso eke paka la Jɛrusalema lo Fɛtɛ ka Tabɛranaklɛ (kana ka Totombotombo). Nde ekɔ lo ngɛnangɛna dia “anto efula oma l’atei w’olui w’anto wakonge la mbetawɔ le nde.” Koko dui sɔ kɔngɛnyangɛnya ewandji w’ɔtɛmwɛlɔ. Vɔ wakatome apulushi wakakambaka oko apulushi w’ɔtɛmwɛlɔ dia towonda. (Joani 7:31, 32) Koko, Yeso konyanga dia ndjashɛ.

Lo dihole dia ndjashɛ, Yeso akatetemala mbetsha lo sɛkɛ la Jɛrusalɛma, ata ate: “Dimi leke la nyu lo tshanda mɔtshi la ntondo ka dimi ntshɔ le Ɔnɛ lakantome. Nyu nyayonyanga koko hanyotɔmɛna, ndo hanyotokoka nkoma lɛnɛ ayomonga.” (Joani 7:33, 34) Ase Juda komboka kɛnɛ kakandalange mbuta ko vɔ wakayambola lam’asawɔ ɔnɛ: “Lende alanga pami kɛnɛ ntshɔ ahatakoke mbɛɛna? Shi aha le ase Juda wakahandjɔnɛ l’atei w’ase Ngirika mbalangande ntshɔ ndo tetsha ase Ngirika? Ko alangande mbuta lam’otshinde ɔnɛ: ‘Nyu nyayonyanga koko hanyotɔmɛna, ndo hanyotokoka nkoma lɛnɛ ayomonga’?” (Joani 7:35, 36) Koko, Yeso akatɛkɛtaka dikambo dia nyɔi kande ndo dia eolwelo k’otsha l’olongo ndo atunyi ande hawokoke mboyela lɛkɔ.

Lushi l’esambele la fɛtɛ lakakoke. La pindju tshɛ lo fɛtɛ, ɔlɔmbɛdi akatsholaka ashi wakatahɔma oma lo Oduwa wa Silɔama dia vɔ nkɛla l’ɛse ka elambwelo ka lo tɛmpɛlɔ. Ondo dia mbohola anto mbekelo kɛsɔ, Yeso akate la dui dia wolo ate: “Naka onto ekɔ la mposa k’ashi, nde aye le mi, ayɔnɔ. Onto tshɛ lele la mbetawɔ le mi, oko wakate afundelo ɔnɛ: ‘Ɛkɛdi w’ashi wa lɔsɛnɔ wayɔkɛlaka oma l’otema ande.’”​—Joani 7:37, 38.

Yeso akatɛkɛtaka dia kɛnɛ kayotomba lam’ayokitama ambeki ande nyuma k’ekila ndo kayowelamɛ dia tɔsɛna l’olongo. Okitamelo ɔsɔ wayosalema l’ɔkɔngɔ wa nyɔi ka Yeso. Ntatɛ lushi la Pɛntɛkɔsta k’ɔnɔnyi wakayele, ɛkɛdi w’ashi washa lɔsɛnɔ wakatatɛ nkɛla etena kakasambishaka ambeki wakakitama nyuma anto akina akambo wa mɛtɛ.

L’ɔtɛ wa kɛnɛ kaketshaka Yeso, anto amɔtshi wakate vate: “Ɔnɛ mɛtɛ ekɔ Omvutshi,” ondo wakatɛkɛtaka dia omvutshi wakatama dia nde ayoleka Mɔsɛ. Anto akina wakate vate: “Ɔnɛ kele Kristo.” Koko amɔtshi wakadje taamu ɔnɛ: “Kristo hahombe ndja oma la Ngalileya, shi mɛtɛ? Shi afundelo wakate dia Kristo ayoya oma le kanula ya Davidɛ ndo oma la Bɛtɛlɛhɛma, ngelo kakadjasɛka Davidɛ?”​—Joani 7:40-42.

Ɔnkɔnɛ, olui w’anto waki la tokanyi totshikitanyi. Kaanga mbele amɔtshi wakalangaka dia Yeso mindama, ndooko onto lakawahɛ lonya. Etena kakakalola apulushi le ewandji w’ɔtɛmwɛlɔ aha la minda Yeso, owandji w’ɛlɔmbɛdi ndo Afarisɛ wakambola ɔnɛ: “Lande na kahanyaye la nde?” Apulushi wakakadimola ɔnɛ: “Ndooko onto lakatɔtɛkɛta ngasɔ.” Ewandji w’ɔtɛmwɛlɔ wakomala ndo wakɔnyɔla apulushi ndo wakate vate: “Onde ndo nyu mbambotonganyiyama? Onde ekɔ omboledi kana Ofarisɛ ɔmɔtshi wambonga la mbetawɔ le nde? Koko olui w’anto ɔnɛ waheye Ɛlɛmbɛ wambodjama mananu.”​—Joani 7:45-49.

Ko Nikɔdɛmɔ, Ofarisɛ ndo ose tominadi ta laadiko t’ase Juda akatɛkɛta lo wahɔ wa Yeso. Ambeta oko ɛnɔnyi ehende l’etenyi, Nikɔdɛmɔ akaye le Yeso l’otsho ndo akɛnya dia nde ekɔ la mbetawɔ le nde. Nikɔdɛmɔ akawatɛ ate: “Lo ndjela Ɛlɛmbɛ aso, hawanya onto la ntondo ka mbohokamɛ ndo mbeya kɛnɛ kosadinde, shi mɛtɛ?” Kakɔna kakawokadimola? Wakokadimola vate: “Onde ndo wɛ kaya ose Ngalileya? Sala eyangelo ko wɛ ayɛna dia ndooko omvutshi wahomba ntomba oma la Ngalileya.”​—Joani 7:51, 52.

Afundelo hawote mbala kakɔ ɔtɔi dia omvutshi ayotomba oma la Ngalileya. Koko, Ɔtɛkɛta wa Nzambi mɛnyaka dia Kristo ayoya oma lɛkɔ; akatama dia “osase wa woke” wayɛnama lo “Ngalileya k’ase wedja.” (Isaya 9:1, 2; Mateo 4:13-17) Ndo nto, oko wakadiatama Yeso akotɔ la Bɛtɛlɛhɛma ndo nde ekɔ kanula ya Davidɛ. Kaanga mbele ondo Afarisɛ wakeyaka dui sɔ, vɔ ondo mbaki anto wakadianganya tokanyi ta kɔlɔ taki l’anto lo dikambo dia Yeso.