Tokane yimba lo ngandji ka pondjo ka Jehowa

1, 2. a) Lande na kakashikikɛ anto amɔtshi ɔnɛ Jehowa mbokaka ekambi ande ngandji? b) Anto wakatongama l’ohomba akɔna?

LANDE na kashikikɛyɛ ɔnɛ Jehowa mbokaka ekambi ande ngandji? La ntondo ka nkadimola dimbola sɔ, totasɛdingodi bɛnyɛlɔ nɛ: L’edja k’ɛnɔnyi efula, anangɛso l’akadiyɛso wakakeketshaka kadiyɛso kelɛwɔ Taylene la ngandji tshɛ. Vɔ wakawotɛka di’aha nde mfɔnya ɔnɛ nde pombaka nsala akambo wahandakoke nsala. Nde mbutaka ate: “Otondonga Jehowa kombokami ngandji, tshike totondotetemala mbishami dako diande sɔ.” Brigitte, kadiyɛso kakodiɛka ana ahende ndamɛ l’ɔkɔngɔ w’omɛnde mvɔ mbutaka ate: “Mbodia ana lo dikongɛ diaki Satana nɛ ekɔ okakatanu ɔmɔtshi woleki woke, djekoleko le ombutshi wodia ana ndamɛ. Koko, lakashikikɛ dia Jehowa mbokakami ngandji, nɛ dia nde akanɔmbɔla etena kakamalelaka ndo kakimi la lɔkɔnyɔ ndo nde kotshikami pondjo dia dimi pembama lo yoho yahamakoke mbikikɛ.” (1 Kɔrɛtɔ 10:13) Sandra akatate hemɔ ka wolo kahakɔnɔ. Lo losanganya lɔmɔtshi la woke, kadiyɛso kɛmɔtshi akayasha efula le Sandra. Omi aki Sandra mbutaka ate: “Kaanga mbakiso kombeyaka waonga ande, koko woho wakandayakiyanya efula dikambo diaso akatɔngɛnyangɛnya efula. Kaanga ditshelo dia totshitshɛ dia ngandji diakatosalɛ anangɛso l’akadiyɛso, akamɛnya ngandji k’efula katoka Jehowa.”

² Jehowa akatonge anto l’ohomba wa mbokana ndo mbokama ngandji. Koko, sho koka nkɔmɔ esadi eto l’ɔtɛ wa hemɔ kana ekakatanu wendana l’ekondjelo kana l’ɔtɛ wahatakondja etombelo w’amɛna l’esambishelo. Naka tambotatɛ mfɔnya ɔnɛ Jehowa hayotolanga, kete sho pombaka mbohɔ dia tekɔ la nɛmɔ le nde ndo ɔnɛ nde ekɔ suke dia tokimɛ lo lonya l’omi dia tokimanyiya. Nde hatohɛki pondjo naka tekɔ la kɔlamelo le nde.—Isaya 41:13; 49:15.

3. Kakɔna kakoka nkeketsha dietawɔ diaso di’ɔnɛ ngandji katoka Jehowa kekɔ ka pondjo?

³ Ɛmɛnyi wa Jehowa wɔtɛkɛtami oma l’etatelo wakashikikɛ dia Nzambi aki kaamɛ la wɔ lo tena di’ekakatanu. Sho pombaka monga l’eshikikelo kakɔ kaamɛ k’ɔnɛ nde ekɔ lo wedi aso. (Osambu 118:6, 7) Lo sawo nɛ, tayɛna weshasha ɛnɛi watoshikikɛ dia Jehowa tokaka ngandji. Weshasha akɔ ko 1) etongelo kande, 2) Bible, 3) dɔmbɛlɔ, ndo 4) oshinga w’etshungwelo. Nkana yimba lo akambo w’amɛna wakatosalɛ Jehowa ayotokimanyiya dia ndeka monga la lowando lo ngandji kande ka pondjo.—Adia Osambu 77:11, 12.

TOKANE YIMBA LO ETONGELO KA JEHOWA

4. Wetshelo akɔna wakondjaso oma l’etongelo ka Jehowa?

⁴ Etena kendaso etongelo ka Jehowa, sho shihodiaka dia nde tolangaka efula. (Rɔmɔ 1:20) Ɛnyɛlɔ, Jehowa akatonge nkɛtɛ l’oyango wa sho nsala akambo efula, koko aha mbidjasɛka tsho. Nde akatosha ɛngɔ tshɛ keso l’ohomba dia sho ngɛnangɛnaka la lɔsɛnɔ. Tekɔ l’ohomba wa ndɛ, koko Jehowa akatosha mbo ya ndɛ yotshikitanyi yele etena kayilɛso, sho ngɛnangɛnaka efula! (Undaki 9:7) Kadiyɛso Catherine ngɛnangɛnaka efula etena kasɛdingolande etongelo, djekoleko l’eleko kamɔnga akatshi lo Canada. Nde mbutaka ate: “Ekɔ mɛtɛ dikambo dia diambo efula lo menda woho wakatongama diangɔ tshɛ, ɛnyɛlɔ alɛmbɔlɛmbɔ w’elangala watomba oma lo nkɛtɛ ndo woho weya tofudu nkalola l’ahole awɔ kaanga vɔ kɛngɔlaka etale, ndo woho weya fudu ya tshɔdi mboka dia ndjɔlɛ diangɔ laa didishi dia kuku kami. Jehowa tolangaka efula lo menda woho watoshande diangɔ efula diatɔngɛnyangɛnya.” Shɛso nangaka etongelo kande ndo nde nangaka dia sho lawɔ kingɛnangɛna.—Etsha 14:16,  17.

5. Ngande wɛnama ngandji ka Jehowa lo woho wakandatonge anto?

⁵ Jehowa akatotonge la dikoka dia nkamba olimu w’ohomba efula ndo ngɛnangɛna la wɔ. (Undaki 2:24) Nde akasha anto ɔkɛndɛ wa ndodia nkɛtɛ, kikamba, nkokɛ nse, tofudu ndo ditongami dikina diasɛna lɔkɔ. (Etatelu 1:26-28) Nde akatotonge nto la waonga w’amɛna efula l’oyango wa sho mbookoya!—Ɛfɛsɔ 5:1.

ƆTƐKƐTA WAKI NZAMBI WEKƆ LA NƐMƆ EFULA

6. Lande na kahombaso monga la lowando l’efula l’Ɔtɛkɛta wa Nzambi?

⁶ Jehowa akatosha Bible l’ɔtɛ wa ngandji k’efula katokande. Tɔ totɛka kɛnɛ kahombaso mbeya lo dikambo diande la woho wayaokande lo dikambo di’anto. Ɛnyɛlɔ, Bible totɛka woho wakayaokaka Jehowa lo dikambo di’ase Isariyɛlɛ waki mbala la mbala kombokitanyiyɛka. Osambu 78:38 mbutaka ɔnɛ: “Ndi akawauki ketshi, akâdimanyia kolo yawo, kumbadiaka. Tena efula, ndi akayakimela lu kele kandi, kundeka mvudunganela la kele.” Nkana yimba la divɛsa nɛ koka kokimanyiya dia mɛna dia Jehowa kokaka ngandji efula ndo ndjakiyanyaka lo dikambo diayɛ. Tonge l’eshikikelo ɔnɛ Jehowa ndjakiyanyaka efula lo dikambo diaso.—Adia 1 Petero 5:6, 7.

7. Lande na kahombaso mbɔsa Bible la nɛmɔ di’efula?

⁷ Sho pombaka mbɔsa Bible la nɛmɔ di’efula. Lande na? Nɛ dia Jehowa sawolaka la so lo tshimbo y’Ɔtɛkɛta ande. Etena katanɛ ombutshi l’ɔnande akambo hwe hwe, vɔ keketshaka ngandji kokanawɔ ndo onto l’onto ndjaɛkɛka le osekande. Jehowa ekɔ Shɛso ka ngandji. Kaanga mbele ndooko lushi lakatawɛnyi kana lakatoke dui diande, ekɔ oko nde ekɔ lo nsawola la so mbala kakɔ ɔtɔi lo tshimbo ya Bible. Sho pombaka ntetemala mbohokamɛ! (Isaya 30:20, 21) Etena kadiɛso Ɔtɛkɛta wa Nzambi, tayeya ndo tayoyaɛkɛ le Jehowa, Ɔnɛ latɔlɔmbɔla ndo latokokɛ.—Adia Osambu 19:7-11; Tukedi 1:33.

8, 9. Kakɔna kalanga Jehowa dia sho mbeya? Sha ɛnyɛlɔ k’oma lo Bible.

⁸ Jehowa nangaka sho mbeya dia nde tokaka ngandji ndo nde mendaka akambo efula, koko aha wandja aso ato nɛ dia nde nyangaka akambo w’ɛlɔlɔ le so. (2 Ekondo 16:9) Nyɛsɔ tɔsɛdingole woho wakɛnyi Jehowa akambo w’ɛlɔlɔ le Jɛhɔshafata nkumekanga ka Juda. Jɛhɔshafata akayɔsa yɛdikɔ ya kɔlɔ dia mbeta lo wedi wa Ahaba, nkumekanga k’Isariyɛlɛ dia ndɔsha ase Suriya la Ramɔta-Ngiliyadɛ. Kaanga mbakatɛ aprɔfɛta wa kashi 400 Ahaba nkumekanga ka kɔlɔ ɔnɛ nde ayɔlɛndja lo ta, Mikaya laki ɔprɔfɛta wa mɛtɛ wa Jehowa akatɛ Jɛhɔshafata nde la Ahaba ɔnɛ naka vɔ ntshɔ dia tɔlɔsha, kete vɔ ayɔlɛndjama. Ndo kɛsɔ mɛtɛ mbakasalema. Ahaba akatovɔ lo ta, ndo kɔkɔ ate kwɛ tshiki Jɛhɔshafata otovɔ. L’ɔkɔngɔ wa ta, Jehowa akatome Jehu dia tosha Jɛhɔshafata alako l’ɔtɛ wa munga kande. Koko, Jehu akawotɛ nto ɔnɛ: “Akambu amotshi w’ololo weko le ye.”—2 Ekondo 18:4, 5, 18-22, 33, 34; 19:1-3.

⁹ Ɛnɔnyi efula la ntondo, Jɛhɔshafata akatɛ ewandji, ase Lɛwi ndo ɛlɔmbɛdi dia tembola esomba tshɛ wa la Juda dia tetsha anto Ɛlɛmbɛ wa Jehowa. Vɔ wakasale dui sɔ dimɛna efula woho wele kaanga anto w’oma lo wedja ekina wakayeya Jehowa. (2 Ekondo 17:3-10) Diakɔ diele, kaanga mbakayɔsa Jɛhɔshafata yɛdikɔ ya kɔlɔ l’ɔkɔngɔ diko, Jehowa kombohɛ akambo w’ɛlɔlɔ wakandasalaka ntondo lo lɔsɛnɔ lande. Ɛnyɛlɔ kɛsɔ tokeketshaka efula nɛ dia lo tena dimɔtshi sho ndjosalaka munga. Koko, naka sho nsala la wolo dia kambɛ Jehowa, nde ayotetemala tooka ngandji ndo nde hohɛ akambo w’amɛna wakatasale.

NGƐNANGƐNA WOSHASHA WA DƆMBƐLƆ

10, 11. a) Lande na kele dɔmbɛlɔ diekɔ woshasha wa laande w’oma le Jehowa? b) Ngande wakadimola Nzambi alɔmbɛlɔ aso? (Enda osato wele lo mbɔtwɛlɔ.)

¹⁰ Ombutshi wa ngandji mbɔsaka etena ka mpokamɛ anande etena kasawolawɔ la nde. Nde nangaka mbeya woho wayaokawɔ nɛ dia nde ndjakiyanyaka efula lo dikambo diawɔ. Ngasɔ mbasala Jehovah, Shɛso lele l’olongo. Nde tohokamɛka etena kawɔlɔmbaso. Nsawola la Shɛso ekɔ woshasha wa woke efula!

¹¹ Sho kokaka nɔmba Jehowa wonya tshɛ. Nde ekɔ Ɔngɛnyi aso ndo nde ekɔ suke dia mpokamɛ alɔmbɛlɔ aso tena tshɛ. Taylene, lakatatɛkɛtshi oma l’etatelo mbutaka ate: “Wɛ koka mbotɛ oseka dui diakɔna tshɛ.” Etena katɛso Jehowa tokanyi taso t’oma k’ɛse otema, nde koka tokadimola lo tshimbo ya divɛsa dimɔtshi, ya sawo dimɔtshi dia l’ekanda aso kana tosha ekeketshelo lo tshimbo y’ɔnangɛso kana kadiyɛso kɛmɔtshi. Jehowa mbokaka ɛsɛngɔsɛngɔ aso w’oma k’ɛse otema ndo nde teyaka ndeka kaanga onto okina tshɛ. Woho wakadimolande alɔmbɛlɔ aso mɛnyaka dia ngandji katokande kekɔ ka pondjo.

12. Lande na kahombaso mbekaka alɔmbɛlɔ wele lo Bible? Sha ɛnyɛlɔ.

¹² Sho koka nkondja wetshelo w’ohomba efula oma l’alɔmbɛlɔ wele lo Bible. Lo tena dimɔtshi, ekɔ ohomba mbeka alɔmbɛlɔ amɔtshi l’atei awɔ lo Ɔtɛmwɛlɔ wa lo nkumbo. Alɔmbɛlɔ aso wayolowana naka sho nkana yimba lo alɔmbɛlɔ w’oma k’ɛse otema wakasale ekambi wa Nzambi wa lo nshi yakete. Ɛnyɛlɔ, wɛ koka mbeka dɔmbɛlɔ di’okitshakitsha diakasale Jɔna lam’akinde l’otema wa lose la shaka. (Jona 1:17–2:10) Vusola dɔmbɛlɔ dia l’otema ɔtɔi diakalɔmbɛ Sɔlɔmɔna Jehowa lo osapwelo wa tɛmpɛlɔ. (1 Khumi ya Dikanga 8:22-53) Ndo kana yimba lo dɔmbɛlɔ dia ɛnyɛlɔ dia Yeso. (Mateo 6:9-13) Kɛnɛ koleki tshɛ ele, “nyote Nzambi . . . ɛsɛngɔsɛngɔ [anyu]” mbala la mbala. Etombelo wayonga ko, “wɔladi wa Nzambi woleki tokanyi tshɛ wayolama etema anyu la timba tanyu.” Lowando lele la so l’ɔtɛ wa ngandji ka pondjo katoka Jehowa layotetemala mfula.—Filipɛ 4:6, 7.

ƐNYA DIA WƐ EKƆ LA LOWANDO L’OSHINGA W’ETSHUNGWELO

13. Diaaso diakɔna diele la so l’ɔtɛ w’oshinga w’etshungwelo?

¹³ Jehowa akatosha woshasha w’oshinga w’etshungwelo “dia sho nkondja lɔsɛnɔ.” (1 Joani 4:9) Lo dikambo dia tshelo ya ngandji ka Nzambi shɔ, ɔpɔstɔlɔ Pɔɔlɔ akafunde ate: “Kristo akavu dikambo di’anto wa kɔlɔ lo etena kakashikikɛma. Ekɔ wolo di’onto mvɔ dikambo di’onto lele la losembwe, eelo, lo dikambo di’onto ɔlɔlɔ, ondo onto koka mbetawɔ mvɔ. Koko Nzambi akatɛnya ngandji kande hita lo yoho nyɛ: Kaanga mbakiso atshi wa pɛkato, Kristo akavu dikambo diaso.” (Rɔmɔ 5:6-8) Oshinga w’etshungwelo ekɔ djembetelo yoleki woke ya ngandji katoka Nzambi ndo vɔ mbishaka anto diaaso dia monga la diɔtɔnganelo dia ma ma la nde.

14, 15. Kakɔna kalembetshiya oshinga w’etshungwelo le a) Akristo w’akitami? b) wanɛ wele l’elongamelo ka ndjɔsɛna la nkɛtɛ?

¹⁴ Djui mɔtshi y’Akristo wekɔ lo mbokama ngandji ka Jehowa ka pondjo lo yoho ya laande. (Joani 1:12, 13; 3:5-7) Nzambi akakite Akristo asɔ nyuma kande k’ekila ndo l’ɔtɛ wa dui sɔ, vɔ waya anande. (Rɔmɔ 8:15, 16) Lam’ele amɔtshi l’atei awɔ weke la nkɛtɛ, lande na kakate Pɔɔlɔ ɔnɛ vɔ wambodjasɛ “kaamɛ lo ahole wa l’olongo kaamɛ la Kristo Yeso”? (Ɛfɛsɔ 2:6) Ekɔ ngasɔ nɛ dia Jehowa akawasha elongamelo ka lɔsɛnɔ la pondjo l’olongo.—Ɛfɛsɔ 1:13, 14; Kɔlɔsayi 1:5.

¹⁵ Wanɛ tshɛ wele bu akitami w’esɔ kokaka nkoma angɛnyi wa Nzambi naka vɔ monga la mbetawɔ l’oshinga w’etshungwelo. Vɔ lawɔ wekɔ la diɛsɛ dia monga ana wa yanyi wa Nzambi ndo ndjɔsɛna pondjo pondjo lo paradiso ka la nkɛtɛ. Oshinga w’etshungwelo mɛnyaka ngandji koka Jehowa anto tshɛ. (Joani 3:16) Ande ɔngɛnɔngɛnɔ wele la so dia mbeya ɔnɛ naka sho kambɛ Nzambi la kɔlamelo, kete nde ayotosha lɔsɛnɔ loleki dimɛna tshɛ l’andja w’oyoyo lee! Ɔnkɔnɛ, nyɛsɔ tɛnya dia sho mbɔsaka oshinga w’etshungwelo la nɛmɔ, nɛ dia vɔ wekɔ djembetelo yoleki woke yɛnya ngandji ka pondjo katoka Nzambi.

ƐNYA DIA WƐ MBOKAKA JEHOWA NGANDJI

16. Kakɔna kayotosala l’ɔkɔngɔ wa sho nkana yimba lo ngandji ka Nzambi?

¹⁶ Hatokoke mbeya mbadiɛ toho efula tatɛnya Jehowa ngandji kande. Nkumekanga Davidɛ akembe ate: “We [Nzambi], ndi tukanyi taye le mi dimena li! Ndi efula keli wuki ato li! Utunduyala dimi ntali, tshiki to mbeyaka ndeka seke ya losenga efula.” (Osambu 139:17, 18) Nkana yimba lo toho efula tatoka Jehowa ngandji ayototshutshuya dia sho lawɔ mbooka ngandji ndo mbosha kɛnɛ mɛtɛ kele ɔlɔlɔ le so.

17, 18. Naa toho tɔmɔtshi takokaso mɛnya dia sho mbokaka Nzambi ngandji?

¹⁷ Ekɔ toho efula takokaso mɛnya Jehowa ngandji kawokaso. Ɛnyɛlɔ, sho koka mɛnya dia sho mbokaka Jehowa ngandji lo mbutɛ anto akina l’ohetoheto tshɛ akambo wendana la lokumu l’ɔlɔlɔ la Diolelo. (Mateo 24:14; 28:19, 20) Sho koka nto mɛnya Nzambi ngandji lo ntshikala la kɔlamelo la ntondo k’ehemba. (Adia Osambu 84:11; Jakɔba 1:2-5.) Kaanga naka tekɔ l’ehemba wa wolo, sho koka monga l’eshikikelo ɔnɛ Jehowa ekɔ lo mɛna asui aso ndo nde ayotokimanyiya, nɛ dia tekɔ la nɛmɔ efula lo washo ande.—Osambu 56:8.

¹⁸ Ngandji kokaso Jehowa atotshutshuya dia sho nkana yimba lo diangɔ tshɛ dia diambo diakandatonge. Tayɛnya Jehowa dia sho mbookaka ngandji ndo nangaka Ɔtɛkɛta ande lo monga ambeki wa Bible w’eshika. Tɔlɔmbake Jehowa mbala la mbala dia mɛnya ɔnɛ sho mbolangaka ndo dia sho nkeketsha diɔtɔnganelo diasaso la nde. Ndo naka tayokanaka yimba lo woshasha wa nɛmɔ w’oshinga w’etshungwelo, kete ngandji kawokaso kayofula. (1 Joani 2:1, 2) Ɔsɔ ekɔ tsho toho tɔmɔtshi l’atei wa toho efula takokaso mɛnya Jehowa dia sho mbɔsaka ngandji katokande ka pondjo la nɛmɔ.