“Ɔngɛnɔngɛnɔ le wanɛ walama olowanyi” le Jehowa

1-2. a) Kakɔna kasalɛ mandji mɔtshi ekambi wa Jehowa, ko kakɔna kasala ekambi ande? b) Ngande wele ɛhɛnyɔhɛnyɔ koka mbisha ɔngɛnɔngɛnɔ? (Lembetshiya ndo osato wa lo lohoso.)

ƐLƆ kɛnɛ, lo wedja ndekana 30, wamboshimba olimu aso kana awui amɔtshi wendana l’olimu aso. Lo wedja ɛmɔtshi, ewandji wa laadiko wakadje anangɛso l’akadiyɛso lo lokanu. Kakɔna kakawasale ka kɔlɔ? Le Jehowa, ndooko dui dia kɔlɔ diakawasale. Tshɛ kakawasale ele mbadia kana mbeka Bible, nsambisha anto akina dietawɔ diawɔ ndo mbɔtɔ lo nsanganya kaamɛ l’asekawɔ ambetawudi. Vɔ wakatone nto mbɔtɔ l’awui wa pɔtilitikɛ. Kaanga l’atei w’ɔlɔshamelo wa wolo, ekambi wa Nzambi ɛsɔ wakatetemala nama olowanyi awɔ,b mbuta ate vɔ wakatshikala la kɔlamelo le Jehowa. Ndo kɛsɔ mbashaka ɔngɛnɔngɛnɔ.

² Ondo wɛ ambɛnaka esato ɛmɔtshi w’Ɛmɛnyi ɛmɔtshi wele la dihonga ndo wele la dungi di’ɛmɔnɔmɔnɔ. Vɔ wekɔ l’ɔngɛnɔngɛnɔ nɛ dia vɔ mbeyaka dia Jehowa mbaangɛnangɛnaka l’ɔtɛ watetemalawɔ nama olowanyi awɔ otsha le nde. (1 Ɛk. 29:17a) Yeso akate ate: “Ɔngɛnɔngɛnɔ le wanɛ wahɛnyahɛnyama l’ɔtɛ wasalawɔ kɛnɛ kele ɔlɔlɔ, . . . Nyɔngɛnɛngɛnɛ, nyonge l’ɔlɔ w’efula, nɛ dia difuto dianyu diekɔ woke.”​—Mat. 5:10-12.

ƐNYƐLƆ LE SO

3. Oko wotamidiɔ lo Etsha 4:19, 20, kakɔna kakasale apɔstɔlɔ lo ntambe ka ntondo etena kakawahɛnyahɛnyamaka ndo lande na kakawasale ngasɔ?

³ Anangɛso l’akadiyɛso wekɔ lo mpomana la weho w’ekakatanu akɔ waamɛ wakakikɛ apɔstɔlɔ wa lo ntambe ka ntondo etena kakawahɛnyahɛnyama l’ɔtɛ wakawasambishaka awui wendana la Yeso. Mbala ko mbala, toshushi ta lo tominadi ta laadiko t’ase Juda ‘wakawadjangɛ dia vɔ ntshika ntɛkɛta lo lokombo la Yeso.’ (Ets. 4:18; 5:27, 28, 40) Kakɔna kakasale apɔstɔlɔ? (Adia Etsha 4:19, 20.) Vɔ wakeyaka di’onto ɔmɔtshi lele la lowandji loleki tshɛ ‘akawadjangɛ dia nsambisha anto ndo dia nsambisha dimɛna dimɛna’ awui wendana la Kristo. (Ets. 10:42) Koko la dihonga tshɛ, enyimpala awɔ, mbuta ate Petero nde la Joani wakate dia vɔ pombaka nkitanyiya Nzambi lo dihole dia nkitanyiya toshushi ndo vɔ wakate dia hawototshika nsambisha awui wendana la Yeso. Lo mɛtɛ, aki oko vɔ wakambolaka toshushi tɔsɔ ɔnɛ: ‘Onde nyu nangaka mbuta dia ɛlɛmbɛ wakinyu ndeka ɛlɛmbɛ wa Nzambi?

4. Oko wɛnyamidiɔ l’Etsha 5:27-29, ɛnyɛlɔ kakɔna kakatshikɛ apɔstɔlɔ Akristo wa mɛtɛ tshɛ ndo ngande wakokaso mbaokoya?

⁴ Apɔstɔlɔ wakatshikɛ Akristo wa mɛtɛ tshɛ ɛnyɛlɔ ka dimɛna kewɔ lo tayele oma k’etena kɛsɔ, mbuta ate ɛnyɛlɔ kendana la “nkitanyiya Nzambi oko wende owandji lo dihole dia nkitanyiya anto.” (Adia Etsha 5:27-29.) L’ɔkɔngɔ wa vɔ kɔmama l’ɔtɛ wakawalame olowanyi awɔ, apɔstɔlɔ wakatombe oma lo tominadi ta laadiko t’ase Juda “watangɛnangɛna, nɛ dia vɔ wakɔsama oko anto wasungana mbishama nsɔnyi l’ɔtɛ wa lokombo [la Yeso]” ndo vɔ wakatetemala nsambisha!​—Ets. 5:40-42.

5. Ambola akɔna wahombaso nkadimola?

⁵ Ɛnyɛlɔ kakatotshikɛ apɔstɔlɔ monyiyaka ambola amɔtshi. Ɛnyɛlɔ, ngande wakɔtɔnɛka yɛdikɔ yawɔ ya nkitanyiya Nzambi lo dihole dia nkitanyiya anto la didjango dia l’Afundelo dia lɔmba dia “[ndja]kitshakitsha l’ɛse ka ewandji wa laadiko”? (Rɔmɔ 13:1) Ngande wakokaso “nkitanyiya awui w’emboledi ndo w’ewandji,” oko wakate ɔpɔstɔlɔ Pɔɔlɔ, ko l’etena kakɔ kaamɛ ntetemala nama olowanyi aso otsha le Nzambi lele Omboledi aso waheme tshɛ?​—Tito 3:1.

“EWANDJI WA LAADIKO”

6. a) Waa na wele “ewandji wa laadiko” wɔtɛkɛtami lo Rɔmɔ 13:1, ndo ngande wahombaso mbaɔsa? b) Kakɔna kele mɛtɛ lo dikambo di’ɛnɔmbɔdi tshɛ w’ana w’anto?

⁶ Adia Rɔmɔ 13:1. Lo divɛsa nɛ, tshɛkɛta “ewandji wa laadiko” mendanaka l’ɛnɔmbɔdi w’ana w’anto wele la lowandji laadiko di’anto akina. Akristo pombaka nkitanyiya ewandji ɛsɔ w’ana w’anto. Ɛnɔmɔdi ɛsɔ mbidjaka ki, vɔ salaka di’ɛlɛmbɛ nɛmiyama, ndo lo ntena dimɔtshi vɔ mamɛka ekambi wa Jehowa. (Ɛny. 12:16) Laasɔ, sho nɔmbamaka dia mfuta elambo, mbaoka wɔma, mbasha ɛkɔngɔ ndo kɛnɛmɔ kalɔmbawɔ. (Rɔmɔ 13:7) Koko ewandji ɛsɔ w’ana w’anto wekɔ la lowandji nɛ dia Jehowa mbakalange dia vɔ monga la lɔ. Yeso akakambe la tɔndɔ sɔ lo yoho yokɛma hwe etena kakawoke nguvɛrnɛrɛ ka la Rɔmɔ, Pɔnsɔ Pilato ambola. Etena kakatɛ Pilato Yeso dia nde ekɔ la lowandji la nshimbɛ lɔsɛnɔ lande kana la mbodiakisha, Yeso akokadimola ate: “Wɛ totoyonga la lowandji le mi otondongaka vɔ kokoshalɔ oma l’olongo.” (Jni. 19:11) Oko wakidiɔ lo dikambo diaki Pilato, lowandji lele la ɛnɔmbɔdi tshɛ w’anto ɛlɔ mbidja ndo lowandji lele l’ase pɔlitikɛ lekɔ la elelo.

7. Lo awui akɔna wahatahombe nkitanyiya ɛnɔmbɔdi w’ana w’anto ndo kakɔna kahomba ɛnɔmbɔdi ɛsɔ mbohɔka?

⁷ Akristo kitanyiyaka mandji y’ana w’anto l’awui wele ɛlɛmbɛ awɔ hawɔlɔshana l’ɛlɛmbɛ wa Nzambi. Koko hatokoke nkitanyiya anto etena katɔlɔmbawɔ dia nsala kɛnɛ kakatosekɛ Nzambi kana etena katoshimbawɔ dia nsala kɛnɛ katɔlɔmba Nzambi dia nsala. Ɛnyɛlɔ, vɔ mbeyaka nɔmba ɛlɔngɔlɔngɔ dia mɛmba ekoma dia ndɔsha dikambo dia wodja.c Kana vɔ mbeyaka nshimba Bible kaso, ekanda aso walembetshiya Bible kana vɔ mbeyaka toshimba dia nsambisha ndo dia ntɛmɔla Jehowa kaamɛ. Etena kakamba ɛnɔmbɔdi la lowandji lawɔ lo yoho ya kɔlɔ, ɛnyɛlɔ lo mpɛnyahɛnya ambeki wa Kristo, vɔ pombaka ndjokoya la Nzambi. Jehowa ekɔ lo mɛna kɛnɛ kasalema!​—Ond. 5:8.

8. Naa otshikitanu wele lam’asa “laadiko” la “laheme-tshɛ,” ndo lande na kele ekɔ ohomba mbeya dui sɔ?

⁸ Tshɛkɛta “laadiko” nembetshiyaka kɛnɛ kele “dimɛna efula, woke efula, dihole dia laadiko.” Koko yɔ hayolembetshiya “dimɛna dioleki, loleki woke kana laheme laadiko dia tshɛ.” Yɔ nembetshiyaka l’ɛtɛkɛta ekina “laheme-tshɛ.” Kaanga mbele ewandji w’ana w’anto mbelamɛka ɔnɛ “ewandji wa laadiko,” koko ekɔ lowandji lokina laheme tshɛ. Mbala nyɛi y’etondo lo Bible, “Ɔnɛ-Laheme-Tshɛ” ekɔ titrɛ ka Jehowa Nzambi.”​—Dan. 7:18, 22, 25, 27.

“ƆNƐ-LAHEME-TSHƐ”

9. Kakɔna kakɛnyi omvutshi Danyɛlɛ lo waɛnɛlɔ?

⁹ Omvutshi Danyɛlɛ akɛnyi ɛnɛlɔ kakɛnyaka hwe dia lowandji laki Jehowa lekɔ laadiko dia mandji tshɛ. Danyɛlɛ akɛnyi ntondo nyama nyɛi ya diambo yalembetshiya mandji yakete ndo ya nshi nyɛ, mbuta ate Babilɔna, lowandji l’ase Mediya la Pɛrɛsiya, Ngirika ndo Rɔmɔ ndo lowandji la nshi nyɛ l’ase Amérique l’Angleterre. (Dan. 7:1-3, 17) Oma laasɔ, Danyɛlɛ akɛnyi Jehowa Nzambi odjashi lo kiti ka lowandji l’olongo. (Dan. 7:9, 10) Kɛnɛ kakayɛna omvutshi wa kɔlamelo ɔsɔ koka monga tshondo y’ɔhɛmwɛlɔ le ɛnɔmbɔdi nshi nyɛ.

10. Lo ndjela Danyɛlɛ 7:13, 14, 27, Jehowa onto akɔna akandasha lowandji laadiko dia nkɛtɛ, ndo kakɔna kɛnya dui sɔ lo kɛnɛ kendana la nde?

¹⁰ Adia Danyɛlɛ 7:13, 14, 27. Nzambi ambonya lowandji tshɛ oma le ewandji w’ana w’anto ndo ambolisha anto akina wasungana ndo wele la wolo w’efula. Le waa na? Le “onto ɔmɔtshi lele oko ɔna onto,” Yeso Kristo, ndo le “anto wele ekilami wa Omboledi-Waheme-Tshɛ,” anto 144 000 wayolɛ “pondjo pondjo.” (Dan. 7:18) Mɛnamaka hwe dia Jehowa kele “Omboledi-Waheme-Tshɛ” ndo ndamɛ onto mbele la lowandji la nsala dui sɔ.

11. Naa dui dikina diakafunde Danyɛlɛ diɛnya dia Jehowa mbaheme tshɛ laadiko dia wedja?

¹¹ Kɛnɛ kakɛnyi Danyɛlɛ lo ɛnɛlɔ mbɔtɔnɛka la dui diakandate ntondo. Danyɛlɛ akate ate: “Nzambi ka l’olongo,” “minyaka nkumi ya dikanga ndo mbidjaka nkumi ya dikanga.” Nde akafunde nto ate: “Ɔnɛ-Laheme-Tshɛ ekɔ Omboledi lo diolelo di’anto ndo nde dishaka onto tshɛ lalangande.” (Dan. 2:19-21; 4:17) Onde ɔsɔ aki waaso wakanya Jehowa kana wakandadje ɛnɔmbɔdi? Eelo!

12. Sha ɛnyɛlɔ kɛnya woho wakanya Jehowa nkumi ya dikanga mɔtshi oma lo kiti yawɔ ya diolelo lo nshi y’edjedja. (Enda osato.)

¹² Jehowa akɛnya hwe woho wele nde mbaheme tshɛ laadiko dia “ewandji wa laadiko.” Tɔsɛdingole bɛnyɛlɔ sato. Farawɔ nkumekanga ka l’Edjibito akande ekambi waki Jehowa lo lɔhɔmbɔ ndo mbala la mbala nde akatonaka dia mbakimɔ. Koko Nzambi akaatshungola ndo nde akadindja Farawɔ lo Ndjale ka Beela. (Eto. 14:26-28; Os. 136:15) Nkumekanga ka la Babilɔna Bɛlɛshaza akasale fɛtɛ ndo “akayadiya dia ndɔshana la Nkumadiɔndjɔ k’olongo” ndo nde “[akatombola] tozambizambi ta mfɛsa ndo ta paonyi” lo dihole dia ntombola Jehowa. (Dan. 5:22, 23) Koko, Nzambi akakitshakitsha pami ka lotamanya kɛsɔ. “Ko otsho akɔ,” Bɛlɛshaza akadiakema ndo lowandji lande lakashama le ase Mediya ndo ase Pɛrɛsiya. (Dan. 5:28, 30, 31) Nkumekanga Hɛrɔdɛ Angiripa I ka la Palɛstinɛ akadiake ɔpɔstɔlɔ Jakɔba ndo akadje ɔpɔstɔlɔ Petero lo lokanu l’oyango wa mbodiaka nde lawɔ. Koko Jehowa kombetawɔ dia Hɛrɔdɛ nsala kɛnɛ kakandakongɛ dia nsala. “Ondjelo wa Jehowa akɔɔkɔmɔla,” ko nde akavu.​—Ets. 12:1-5, 21-23.

13. Sha ɛnyɛlɔ kɛnya woho wakalanya Jehowa tshɛ lo tshɛ osanga w’ɛnɔmbɔdi.

¹³ Jehowa akɛnya nto dia nde lowandji lande lekɔ laadiko dia osanga w’emboledi tshɛ. Nde akalwɛ Isariyɛlɛ ta, lo mbakimanyiya dia vɔ nɛndja nkumi ya dikanga 31 y’ase Kanana yakasangana dia mbalɔsha ndo nde akaakimanyiya dia vɔ mbɔsa Nkɛtɛ ya daka. (Jas. 11:4-6, 20; 12:1, 7, 24) Jehowa akakimanyiya nto ase Isariyɛlɛ dia ndanya tshɛ lo tshɛ nkumekanga Bɛnɛ-Hadada nde la emboledi 32 w’ase Suriya wakaye ndjɔlɔsha ase Isariyɛlɛ.​—1 Nku. 20:1, 26-29.

14-15. a) Kakɔna kakasale nkumekanga Nɛbukadinɛza ndo kakɔna kakate Dariyo lo kɛnɛ kendana la lowandji lele la Jehowa? b) Kakɔna kakate omembi w’esambo lo kɛnɛ kendana la Jehowa ndo wodja ande?

¹⁴ Mbala la mbala, Jehowa akɛnya dia nde kele Ɔnɛ-Laheme-Tshɛ! Etena kakayadiya nkumekanga k’ase Babilɔna, Nɛbukadinɛza lo nkamba la ‘wolo ande la nkudu kande ndo la lowandji lande’ aha la ndjakitshakitsha ndo aha mbeya dia Jehowa ndamɛ oto mbasungana tombɔma, Nzambi akawetɛ ɛngɔ k’anyanya. Oma l’ɔkɔngɔ wa nde nkɔnɔ, Nɛbukadinɛza ‘akatombola Ɔnɛ-Laheme-Tshɛ’ ndo nde akeye dia “lowandji la [Jehowa] lekɔ la pondjo.” Nde akakotsha ate: “Ndooko onto lakoka mboshimba.” (Dan. 4:30, 33-35) L’ɔkɔngɔ w’olowanyi wa Danyɛlɛ otsha le Nzambi mbidjama l’ohemba ndo l’ɔkɔngɔ wa Jehowa mbotsha oma lo difuku dia waa ntambwɛ, nkumekanga Dariyo akate ate: “Anto pombaka nsaka lokomba la wɔma la ntondo ka Nzambi ka Danyɛlɛ. Nɛ dia nde ekɔ Nzambi kasɛna ndo nde tshikalaka pondjo. Diolelo diande hadiolanyemaki pondjo, ndo lowandji lande lekɔ la pondjo.”​—Dan. 6:7-10, 19-22, 26, 27, nɔtɛ.

¹⁵ Omembi w’esambo akashihodia ɔnɛ: “Jehowa akafukutanya toseke ta wedja; nde akalanya dikongelo di’anto.” Nde akakotsha ate: “Ɔngɛnɔngɛnɔ le wodja wele Jehowa kele Nzambi kawɔ, anto wakandasɔnɛ oko wande hita.” (Os. 33:10, 12) Eelo, tekɔ mɛtɛ l’ɔkɔkɔ w’oshika wa ntetemala nama olowanyi aso le Jehowa!

TA DI’EKOMELO

16. Eshikikelo kakɔna kakokaso monga la tɔ l’etena ka “mfɔnu ka woke,” ndo lande na? (Enda osato.)

¹⁶ Tambɛna kɛnɛ kakasale Jehowa lo nshi y’edjedja. Kakɔna kalongamɛso lo nshi yayaye yaya k’emembe? Sho koka monga l’eshikikelo dia Jehowa ayokokɛ ekambi ande wa kɔlamelo l’etena ka “mfɔnu ka woke.” (Mat. 24:21; Dan. 12:1) Nde ayosala dui sɔ etena kayɔlɔsha osanga wa wedja, weyama oko Ngɔngɔ ka la Mangɔngɔ wanɛ wele la kɔlamelo le Jehowa l’andja w’otondo. Oyadi osanga wa wedja ɔsɔ wayokengama la wedja akɔ tshɛ 193 wakenga Nations unies, vɔ hawotokoka ndɔsha Ɔnɛ-Laheme-Tshɛ ndo alembe ande wa l’olongo! Jehowa ndakaka ɔnɛ: “Dimi mɛtɛ layoyatombola ndo layoyakidia ndo layoyaeyanya lo washo wa wedja efula; ko vɔ wayohomba mbeya dia dimi kele Jehowa.”​—Ɛzk. 38:14-16, 23; Os. 46:10.

17. Nshi yayaye yakɔna yalaka Bible nkumi ya dikanga ya la nkɛtɛ ndo wanɛ watetemala nama olowanyi awɔ le Jehowa?

¹⁷ Etena kayɔlɔsha Ngɔngɔ ka la Mangɔngɔ, kɛsɔ ayokonya Jehowa dia nde tatshiya ta di’ekomelo di’Aramangɛdɔna diayondolanya “nkumi ya dikanga ya lo nkɛtɛ k’otondo.” (Ɛny. 16:14, 16; 19:19-21) Otshikitanyi la wɔ, “paka anto wosembwe mbayodjasɛ la nkɛtɛ, ndo ɔnɛ laha la onongo kayotshikala lɔkɔ.”​—Tok. 2:21, nɔtɛ.

SHO POMBAKA NAMA OLOWANYI ASO

18. Kakɔna kakasale Akristo wa mɛtɛ efula, ndo lande na? (Danyɛlɛ 3:28)

¹⁸ L’edja ka ntambe efula, Akristo wa mɛtɛ efula wakashisha lotshungɔ lawɔ ndo wakadje nsɛnɔ yawɔ lo waale l’ɔtɛ walangawɔ Jehowa oko Omboledi w’andja w’otondo. Akristo wa mɛtɛ asɔ wakayashikikɛ dia ntetemala nama kɔlamelo yawɔ le Jehowa. Vɔ wekɔ oko ase Hɛbɛru asato wakatshikala la kɔlamelo le Ɔnɛ-Laheme-Tshɛ lakaashimbɛ lo kuka ka dja.​—Adia Danyɛlɛ 3:28.

19. Lo ndjela awui akɔna wayolombosha Jehowa ekambi ande, ndo kakɔna kahombaso nsala kakianɛ?

¹⁹ Omembi w’esambo akafunde lo kɛnɛ kendana la ntetemala nama olowanyi le Nzambi ate: “Jehowa ayosambola anto. Jehowa le, onombosha lo ndjela losembwe lami ndo lo ndjela olowanyi ami.” (Os. 7:8) Davidɛ akafunde nto ate: “Olowanyi la losembwe wankokee.” (Os. 25:21) Yoho ya lɔsɛnɔ yoleki dimɛna ele, ntetemala ntshikala la kɔlamelo le Jehowa, nama kɔlamelo yaso le nde oyadi dui diakɔna diakoka tokomɛ! Lo nsala ngasɔ, mbayotoyaoka oko omembi w’esambo lakafunde ate: “Ɔngɛnɔngɛnɔ le wanɛ walama olowanyi . . . , wanɛ wakɛndakɛnda lo ɛlɛmbɛ wa Jehowa.”​—Os. 119:1, nɔtɛ.