Tɛkɛ nɛndɛ ngande watiɔsa Jehowa?
ADAMA akate ate: “Umuntu lakayambisha dia ndjala la mi kakambishawo, diako mbakamali.” Eva akakadimola ate: “Ului kakampimbi, diako mbakamali.” Ɛtɛkɛta wakatɛ ambutshi aso wa ntondo Adama la Eva Nzambi ɛsɔ mbaki etatelo ka tɛkɛ nɛndɛ tamboshama l’edja tshɛ k’ɔkɔndɔ w’ana w’anto.—Etat. 3:12, 13.
Woho wakalombosha Jehowa Adama la Eva l’ɔtɛ wakawɔtɔmbɔkwɛ l’okonda akɛnya hwe dia nde kombetawɔ tɛkɛ nɛndɛ takawasha. (Etat. 3:16-19) Lâsɔ, onde sho kokaka mbuta ɔnɛ Jehowa hetawɔ tɛkɛ nɛndɛ tshɛ kana nde mbetawɔka tɛkɛ nɛndɛ tɔmɔtshi? Naka ngasɔ mbediɔ, ngande wakokaso ntshikitanya tɛkɛ nɛndɛ tetawɔma la tahetawɔma? Dia nkadimola lo ambola asɔ, nyɛsɔ tɔsɛdingola ntondo kɛnɛ kalembetshiya tɛkɛ nɛndɛ.
Yɛkɛ nɛndɛ ekɔ ɔkɔkɔ washa onto dia nembetshiya lande na kosadinde dikambo dimɔtshi, kahandadisadi kana kahandatodisala. Anto mbeyaka mbisha tɛkɛ nɛndɛ l’ɔtɛ wa kɔlɔ kosadiwɔ ndo tɔ mbeyaka mbɔsama oko ɛtɛkɛta walɔmbawɔ edimanyielo dia vɔ mbakimwɛ. Koko, oko wakidiɔ lo dikambo dia Adama la Eva, yɛkɛ nɛndɛ kokaka monga nto ɔkɔkɔ wa kashi washa onto dia nyanga shadiya kana mbishɛ kɛnɛ kele mɛtɛ. Lam’ele mbala efula tɛkɛ nɛndɛ mbishamaka l’ɔtɛ w’ɛkɔkɔ wa ngasɔ, diakɔ diahataleke mbetawɔma.
Etena kashaso tɛkɛ nɛndɛ, djekoleko lo kɛnɛ kendana l’olimu wakambɛso Nzambi, sho pombaka monga la yewo ‘diaha sho ndjakesa shoamɛ la tokanyi ta kɔlɔ.’ (Jak. 1:22) Ɔnkɔnɛ, nyɛsɔ tɔsɛdingole bɛnyɛlɔ dimɔtshi dia lo Bible ndo atɔndɔ amɔtshi wayotokimanyiya dia sho ‘nshikikɛ kɛnɛ ketawɔma le Nkumadiɔndjɔ.’—Ef. 5:10.
Kakɔna kalongamɛ Nzambi dia sho nsala?
Lo Ɔtɛkɛta wa Nzambi, sho tanaka wadjango shikaa wahombaso nkitanyiya oko weso ekambi waki Jehowa. Ɛnyɛlɔ, didjango diakasha Kristo di’ɔnɛ: “Nyutshu, nyete wedja tshe ambeki” ekɔ didjango diahomba ambeki wa mɛtɛ waki Kristo tshɛ nkitanyiya. (Mat. 28:19, 20) Diakɔ mbele, dia mɛnya dia ekɔ ohomba nkitanyiya didjango sɔ, ɔpɔstɔlɔ Paulo akate ate: “Fono keko lemi, naka dimi halasambisha lukumu l’ololo!”—1 Kor. 9:16.
Koko, anto amɔtshi wambeka la so Bible ɛnɔnyi efula mengengaka dia nsambisha lokumu l’ɔlɔlɔ la Diolelo diaki Nzambi. (Mat. 24:14) Apandjudi amɔtshi wakasambishaka ntondo hawoyosambisha nto. Mbala efula, ɛkɔkɔ akɔna watoshaka apandjudi wahayosambisha? Ngande wakasale Jehowa l’anto wakewewɔka dia nkitanyiya wadjango ande shikaa lo nshi yakete?
Tɛkɛ nɛndɛ tahetawɔ Nzambi
“Ekɔ wolo efula.” Lo yoho ya lânde, wanɛ wakotɔ la diki mbeyaka mɛna dia ekɔ wolo efula nkamba olimu w’esambishelo. Ɔnkɔnɛ, nyɛsɔ tɔsɛdingole wetshelo wakokaso nkodja oma l’ɛnyɛlɔ ka Jɔna. Nde akalongola ɔkɛndɛ wakandɔshi dia wekɔ wolo efula, mbuta ate Jehowa akawotɛ dia nde tewoya ase Niniva losango l’elanyelo. Kema dui dia wolo dia sho mɛna lande na kele Jɔna akɔshi di’ɔkɛndɛ wakawosha Jehowa waki wolo efula. Niniva aki kapitalɛ ka wodja w’Asuriya ndo ase Asuriya wakeyamaka oko anto wa ngala. Ondo Jɔna akayambola ate: ‘Ngande wayomosala la ntondo k’anto wa ngasɔ?’ ‘Kakɔna kayowosalɛ?’ Yema tshitshɛ oma lâsɔ, nde akalawɔ. Koko, Jehowa kombetawɔ yɛkɛ nɛndɛ yakasha Jɔna. Jehowa akôtome nto dia nde tosambisha ase Niniva. Mbala kɛsɔ, la dihonga tshɛ Jɔna akakotsha ɔkɛndɛ wakandalongola ndo Jehowa akatshɔkɔla olimu ande.—Jona 1:1-3; 3:3, 4, 10.
Naka wɛ ekɔ lo mfɔnya dia nsambisha lokumu l’ɔlɔlɔ ekɔ ɔkɛndɛ a wolo, kete ohɔ dia “akambu tshe mbeyaka ntshama le [Nzambi].” (Mako 10:27) Wɛ kokaka monga l’eshikikelo k’ɔnɛ Jehowa ayokokeketsha naka wɛ ayotetemala nyanga ekimanyielo kande ndo nde ayɔtshɔkɔla welo wayoyodja dia monga la dihonga dia nsambisha dimɛna.—Luka 11:9-13.
“Handolange.” Kakɔna kakokayɛ nsala naka wɛ aya bu la nsaki k’oma k’ɛse otema ka nkamba olimu ayɛ w’Okristo? Ohɔka dia Jehowa kokaka nkamba l’otema ayɛ ndo nomialomia nsaki kayɛ. Paulo akate ate: “Ne dia [Nzambi] katukambaka l’etema anyu, dia nyu nanga la ntsha lulangu landi.” (Fil. 2:13) Oma lɔkɔ, wɛ kokaka nɔmba Jehowa dia nde kosha nsaki ka wɛ nsala lolango lande. Kɛsɔ mbakasale nkumekanga Davidi. Nde akasɛngasɛnga Jehowa ɔnɛ: “Onombolaki lu mete kaye.” (Osam. 25:4, 5, sho mbɛnganyisha alɛta ango.) Wɛ kokaka nsala woho akɔ wâmɛ lo nɔmbaka Jehowa oma k’ɛse otema dia wɛ monga la nsaki ka nsala kɛnɛ kɔngɛnyangɛnya.
Lo mɛtɛ, etena keso l’ɔlɛmbɛlɔ kana l’ɔkɔmwɛlɔ, mbeyaka tokomɛ tena dimɔtshi dia paka sho mbosadi la wolo ko mbɔtɔ lo nsanganya yasalema lo Mbalasa ka Diolelo kana ntomba l’olimu w’esambishelo. Naka ngasɔ mbediɔ, onde sho kokaka mbuta ɔnɛ hatoke Jehowa ngandji mɛtɛ? Ndooko. Ekambi wa kɔlamelo waki Nzambi wa lo nshi y’edjedja vɔ lawɔ wakasalaka la wolo dia nsala lolango lande. Ɛnyɛlɔ, Paulo akate dia nde “atuyakomolaka” dia nkitanyiya wadjango waki Nzambi. (1 Kor. 9:26, 27) Ɔnkɔnɛ, kânga etena kasalaso la wolo dia nsambisha, sho kokaka monga l’etshikikelo k’ɔnɛ Jehowa ayotɔtshɔkɔla. Lande na? Nɛ dia sho salaka la wolo dia ntsha lolango laki Nzambi l’ɔtɛ w’ɔkɔkɔ w’oshika wele ngandji kokaso Jehowa. Lo nsala ngasɔ, sho mbishaka okadimwelo lo tɔfwɛfwɛ taki Satana t’ɔnɛ ekambi waki Nzambi wayowɔsɛka naka vɔ tanema l’ehemba.—Jobo 2:4.
“Lekɔ l’akambo efula wa nsala.” Naka wɛ hasambisha l’ɔtɛ weyɛ l’akambo efula wa nsala, kete ayonga ohomba wɛ nyomɔsɛdingola akambo wetshayɛ lo dihole dia ntondo. Yeso akate ate: “Keli ntundu nyutayangi diulelu.” (Mat. 6:33) Dia wɛ nkitanyiya tɔndɔ sɔ, ondo ayonga ohomba dia wɛ mbetɛ lɔsɛnɔ layɛ ɔsɛlɛngɛ kana mbɔsa wenya watoyetshaka lo tɔkɛnyɔ dia ndjasha l’olimu w’esambishelo. Lo mɛtɛ, tɔkɛnyɔ ndo eyango w’onto ndamɛ wekɔ la dihole diawɔ, koko vɔ kema tɛkɛ nɛndɛ ta mɛtɛ takokaso mbisha diaha nkamba olimu w’esambishelo. Ekambi waki Nzambi pombaka mbetsha wahɔ wa Diolelo lo dihole dia ntondo lo nsɛnɔ yawɔ.
“Dimi kema l’akoka wahombama.” Wɛ mbeyaka ndjaoka dia wɛ kema l’akoka wahombama dia monga osambisha wa lokumu l’ɔlɔlɔ. Ekambi ɛmɔtshi wa kɔlamelo waki Jehowa wa lo nshi yakafundamaka Bible wakayaoke dia vɔ kema l’akoka wahombama dia mɛmba ɛkɛndɛ wakandawasha. Tɔshi ɛnyɛlɔ kaki Mɔsɛ. Etena kakandalongola ɔkɛndɛ wa lânde oma le Jehowa, Mɔsɛ akate ate: “Ai! Khumemi, dimi untu lahatudjaka nteketa, kuyanga lu nshi ya ntundu kuyanga kam’ateketaye la ukambi aye aso; dimi kanga oteketa w’okoke la lulimi wutshu!” Kânga mbakoshikikɛ Jehowa dia nde ayonga kâmɛ la nde, Mɔsɛ akakadimola ate: “Khumemi li, utumi one lalangaye ntuma.” (Etum. 4:10-13) Kakɔna kakasale Jehowa?
Jehowa kombetawɔ yɛkɛ nɛndɛ yakasha Mɔsɛ, koko nde akasɔnɛ Arɔna oko okimanyedi waki Mɔsɛ dia nde mbeya mɛmba ɔkɛndɛ wakandawosha. (Etum. 4:14-17) Lâdiko dia lâsɔ, l’ɛnɔnyi wakayele, Jehowa akasukɛ Mɔsɛ ndo akawosha kɛnɛ tshɛ kaki la nde ohomba dia nde mɛmba ɔkɛndɛ wakandawosha. Ɛlɔ kɛnɛ, wɛ kokaka monga l’eshikikelo dia Jehowa ayotshutshuya asekayɛ ambetawudi wambohokɔ akambo dia vɔ kokimanyiya woho wa wɛ nkamba olimu ayɛ. Lâdiko dia lâsɔ, Ɔtɛkɛta wa Nzambi toshikikɛka dia Jehowa ayotosha akoka wahombama dia sho nkamba olimu wakandatosha.—2 Kor. 3:5; enda kiombo yele l’ɔtɛ a dui ɔnɛ: “Ɛnɔnyi wakamaleke monga l’ɔngɛnɔngɛnɔ lo lɔsɛnɔ lami.”
“Onto ɔmɔtshi akanyangiya.” Anto amɔtshi ndjotshikaka dia nsambisha kana mbɔtɔ lo nsanganya ya l’etshumanelo l’ɔtɛ wakawanyangiya lo mfɔnya ɔnɛ Jehowa ayetawɔ tɛkɛ nɛndɛ tashawɔ diaha vɔ ndjasha l’elimu wa lo nyuma. Kânga l’etena keso l’ɛkɔkɔ w’eshika wa momala l’ɔtɛ wambowotonyangiya, onde ɔsɔ ekɔ yɛkɛ nɛndɛ ya dimɛna yahomba totshutshuya dia sho ntshika dia ndjasha l’elimu w’Akristo? Ondo Paulo nde la Baranaba wakanyangiyana l’ɔtɛ w’owanu wa wolo waki lam’asawɔ wakayakonyaka dia vɔ ‘mbokana nkɛlɛ ka wolo.’ (Etsha 15:39) Ko onde dikambo sɔ diakakonya ɔmɔtshi la l’atei awɔ dia nde ntshika dia ndjasha l’olimu w’esambishelo? Ndooko!
Woho akɔ wâmɛ mbele, naka wonyayɛ ombetawudi ambokonyangiya, ɔhɔka diaha wonyayɛ Okristo lele bu kokele mbele otunyi ayɛ koko Satana, ɔnɛ lalanga dia nyɔlɛ. Diabolo hatotondoya naka wɛ ‘mbohangakalɛ lo monga la mbetawɔ ka nge.’ (1 Pet. 5:8, 9; Ngal. 5:15) Naka wɛ monga la mbetawɔ ka ngasɔ, kete wɛ “hutshama sonyi.”—Romo 9:33.
Kakɔna kahombaso nsala naka hateye kɛnɛ ka nsala?
Oma lo bɛnyɛlɔ dingana diambotosɛdingola lo kɛnɛ kendana la tɛkɛ nɛndɛ, tambɛna dia ndoko divɛsa shikaa diasukɛ dia ekɔ dimɛna mbisha tɛkɛ nɛndɛ diaha nkotsha wadjango waki Jehowa, mbidja ndo didjango dia nsambisha lokumu l’ɔlɔlɔ. Koko, mbeyaka monga ko tekɔ l’ɛkɔkɔ w’eshika wahatayoyasha l’olimu w’esambishelo lo yoho yɛdimi l’akoka aso. Ɛkɛndɛ ekina w’oma l’Afundelo mbeyaka nkitshakitsha lofulo la wenya lakatashikikɛ dia sambishaka. Ndo nto, lo tena dimɔtshi sho mbeyaka monga l’ɔkɔmwɛlɔ w’efula kana la hemɔ katoshimba dia sho ndjasha efula l’olimu wa Jehowa oko wakombolaso. Koko, Ɔtɛkɛta waki Nzambi toshikikɛka dia Jehowa mbeyaka nsaki k’oma k’ɛse otema kele la so ndo mbidjaka yimba l’elelo wele la so.—Osam. 103:14; 2 Kor. 8:12.
Ɔnkɔnɛ, sho pombaka monga la yewo diaha ndjalombosha shoamɛ kana nombosha anto akina lo yoho ya kɔlɔ lo akambo asɔ. Ɔpɔstɔlɔ Paulo akafunde ate: “We na lalumbuya ukambi w’untu ukina? Kuyanga ndi kemadi, kuyanga ndi kokwe oso eli dikambu dia uwandji andi.” (Romo 14:4) Lo dihole dia sho mbɛdika olimu aso la w’anto akina, sho pombaka mbohɔka ɔnɛ: “Shu tshe, untu l’untu, tayuyateketela le [Nzambi].” (Romo 14:12; Ngal. 6:4, 5) Etena kayasukanyaso la Jehowa lo dɔmbɛlɔ ndo kawoshaso tɛkɛ nɛndɛ tendana la dikambo dimɔtshi, sho pombaka nsala dikambo sɔ la ‘nkum’otema ka pudipudi.’—Heb. 13:18.
Lande na kele kambɛ Jehowa toshaka ɔngɛnɔngɛnɔ?
Onto tshɛ la l’atei aso kokaka kambɛ Jehowa l’otema w’ɔngɛnɔngɛnɔ nɛ dia ɛlɛmbɛ ande mongaka nshi tshɛ ɔlɔlɔ ndo sho kokaka mbâkitanyiya oyadi ekakatanu akɔna tshɛ wele la so. Lande na kataso ngasɔ?
Ɔtɛkɛta waki Nzambi mbutaka ɔnɛ: “Tuyalaki la unyishi a di’ololo le wane wukuki dilungula lam’eye la wulu wa mbashadio.” (Tuk. 3:27) Wetshelo akɔna wambotokondja oma lo divɛsa nɛ lo kɛnɛ kendana la wadjango waki Nzambi? Jehowa hatodjangɛ dia sho mbɛdinya wolo aso la wɔnɛ wele l’anangɛso l’akadiyɛso, koko nde tɔlɔmbaka dia sho mbokambɛ ‘la wolo wele la so.’ Eelo, oyadi wolo wele la so wekɔ tshitshɛ kana efula, sho tshɛ kokaka kambɛ Jehowa l’etema aso tshɛ.—Luka 10:27; Kol. 3:23.
[Kiombo/Osato wa lo lɛkɛ 14]
“Ɛnɔnyi wakamaleke monga l’ɔngɛnɔngɛnɔ lo lɔsɛnɔ lami”
Oyadi tekɔ lo ndɔshana la hemɔ ka wolo lo demba kana lo yimba, tatotake esadi eto ɔnɛ akambo asɔ hawotosha diaaso dia sho ndjasha tshɛ l’olimu w’esambishelo. Dia nshikikɛ dia ɛtɛkɛta ɛsɔ wekɔ mɛtɛ, tɔshi ɛnyɛlɔ ka kɛnɛ kakakomɛ Ernest, ɔnangɛso ɔmɔtshi la lo wodja wa Canada.
Ernest aki l’okakatanu wendana l’ɔtɛkɛta ndo aki l’ɔsɔnyi efula. L’ɔkɔngɔ wa nde mbɔkɔ okandji, nde akatshike olimu wa wokelo wa mvudu wakandakambaka. Kânga mbakandatshikala l’ɛkɔmɔ, kɛnɛ kakokomɛ kakawoshaka diaaso dia nde ndeka ndjasha l’olimu w’esambishelo. Asawo wakashamaka lo nsanganya ya l’etshumanelo lo kɛnɛ kendana l’olimu w’ombatshi mboka wa tshanda wakanandaka otema ande. Koko, nde akɛnaka dia nde kema l’akoka wa nkamba olimu ɔsɔ.
Dia mɛnya dia nde komonga l’akoka wa nkamba oko ombatshi mboka wa tshanda, nde akalɔmbɛ dia tokokamba oko ombatshi mboka wa tshanda ngɔndɔ ɔtɔi. Dui dia diambo ko, nde akakotsha lofulo la wenya lalɔmbama. Oma lâsɔ, nde akakane ate: ‘Hatonga l’akoka wa nyomokamba olimu ɔsɔ mbala kekina nto.’ Dia mɛnya dia ngasɔ mbakidiɔ, nde akanyomokamba olimu ɔsɔ nto ngɔndɔ ka hende ndo mbala kɛsɔ nto, nde akakotsha lofulo la wenya.
Ernest akakambe olimu w’ombatshi mboka wa tshanda l’edja k’ɔnɔnyi w’otondo ndo nde akate ate: “Dimi mbeyaka nte hakokaki pondjo monga ombatshi mboka wa pondjo.” Dia mɛnya dia ngasɔ mbakidiɔ, nde akatatɛ nkamba olimu w’ombatshi mboka wa pondjo. Nde akâmbe efula etena kakandɛnyi dia nde ambokotsha oyango w’ombatshi mboka wa pondjo l’edja k’ɔnɔnyi wa ntondo wakandakambe. Nde akayashikikɛ dia ntetemala nkamba olimu ɔsɔ ndo akonge l’ɔngɛnɔngɛnɔ l’ɔtɛ wakandakambe olimu w’ombatshi mboka wa pondjo l’edja k’ɛnɔnyi ehende edja ndo etena kakandayovɔka l’ɔtɛ wakayohekaka pâ kaki la nde l’okandji. Koko, la ntondo ka nde mvɔ, mbala efula nde akatɛka anto wakayaka dia ndjowenda ele l’asɔi lo washo ate: “Ɛnɔnyi wakamakambɛ Jehowa oko ombatshi mboka waki mɛtɛ ɛnɔnyi wakamaleke monga l’ɔngɛnɔngɛnɔ lo lɔsɛnɔ lami.”
[Osato wa lo lɛkɛ 13]
Sho kokaka ntondoya ekakatanu tshɛ wakoka toshimba dia nsambisha
[Osato wa lo lɛkɛ 15]
Jehowa ngɛnangɛnaka etena k’okambɛso l’anima aso tshɛ lo ndjela akoka aso