Kakɔna kayokomɛ ɛkɔkɔ la mbudi lo nshi yayaye na?
‘Nde ayokakitola anto, oko atokakitolaka olami ɛkɔkɔ la mbudi.’—MATEU 25:32.
1, 2. Lande na kahomba wɛɛla w’ɛkɔkɔ la mbudi kotola yambalo yaso?
MƐTƐ, Yeso Kristo aki ombetsha woleki embetsha tshɛ wa lanɛ la nkɛtɛ. (Joani 7:46) Yoho mɔtshi yakandetshaka aki oma l’ekimanyielo ka wɛɛla. (Mateu 13:34, 35) Wɛɛla akɔ kondjalaka wolo, koko vɔ waki la nkudu efula dia mbewoya anto pɔlɔfɛsi la mbaetsha akambo wa mɛtɛ wa lo nyuma wakoka mbasha lomba.
2 Lo wɛɛla w’ɛkɔkɔ la mbudi, Yeso akɛnyaka etena kayondokamba olimu l’akoka wa lânde: “Lam’ayuya On’a untu lu lutumbu landi, la . . . ” (Mateu 25:31) Wɛɛla ɔsɔ pombaka kotola yambalo yaso, nɛ dia lɔkɔ mbakadihiya Yeso okadimwelo ande wa lo dimbola diakawawoke ɔnɛ: “Ayuyala djimbitelu yakona ya [wôngelo ayɛ ndo ya tena di’ekomelo dia dikongɛ di’akambo nɛ, NW]?” (Mateu 24:3) Ko dikambo sɔ alembetshiyadiɔ le so na?
3. Ntondotondo lam’akandashaka dako diande, akambo akɔna wakate Yeso ɔnɛ wayosalema esadi eto l’ɔkɔngɔ wa fɔnu ka woke tatɛ?
3 Yeso akatatshi akambo wa mamba wayosalema ‘esadi eto l’ɔkɔngɔ’ wa fɔnu ka woke tatɛ, akambo akɔ asɔ mbakongɛso. Nde akate ɔnɛ “djimbitelu ya On’a untu” yayɛnama l’etena kɛsɔ. Dikambo sɔ diayoyala la shɛngiya ya woke le “[waoho, NW] tshe wa la kete,” wanɛ wayɛna “On’a untu ayayi lu wangi wa l’ulungu la wulu ndu la lutumbu la wuki.” Ona onto ayoya nde la “andjelo andi.” (Mateu 24:21, 29-31)a Kayotota lo dikambo dia wɛɛla w’ɛkɔkɔ la mbudi na? Bible ya nshi nyɛ mbidjaka wɛɛla ɔsɔ lo tshapita 25, koko wɛɛla ɔsɔ wekɔ etenyi kɛmɔtshi k’okadimwelo wakasha Yeso, etenyi kalembetshiya akambo akina w’endana l’oyelo ande lo lotombo ndo kakotola yambalo lo elombwelo ka “wedja tshe.”—Mateu 25:32.
Wanɛ Watawɔ lo Wɛɛla Akɔ
4. Lo mbɔtwɛlɔ ka wɛɛla w’ɛkɔkɔ la mbudi, kakɔna kakawate lo dikambo dia Yeso, ndo dikambo dia wa na watawɔ nto lo wɛɛla akɔ ɔsɔ?
4 Yeso akatatɛ wɛɛla akɔ ɔsɔ l’ɛtɛkɛta ɛnɛ: “Lam’ayuya On’a untu.” Ondo mɛtɛ wɛ mbeyaka ɔnɛ lelɛwɔ “On’a untu.” Mbala efula, afundji w’Evanjiliyɔ wakakambaka la tshɛkɛta shɔ lam’akawatɛkɛtaka dikambo dia Yeso. Kânga Yeso ndamɛ akakambaka la tshɛkɛta shɔ dia nde mbuta dikambo diande ndamɛ, aha la tamu, nde akeyaka ɛnɛlɔ kakɛnyi Danyɛlɛ “one lufanyi la on’a untu” ayasukana oya le Tango Andja dia ndjolongola “luwandji, lutumbu, la diulelu.” (Danyele 7:13, 14; Mateu 26:63, 64; Mako 14:61, 62) Kânga mbele Yeso onto loleki woke latɛkɛtama lo wɛɛla akɔ ɔsɔ, aha ndamɛ oto mbele lɔkɔ. Ntondotondo lam’akandashaka dako nɛ, oko wofundamidiɔ lo Mateu 24:30, 31, nde akate ɔnɛ lam’ayoya Ɔna onto ‘la wolo ndo la lotombo la woke,’ andjelo ande wayosala olimu w’ohomba efula. Woho akɔ wâmɛ mbele wɛɛla w’ɛkɔkɔ la mbudi mɛnyaka andjelo kâmɛ la Yeso l’etena ‘kodjashinde lo kiti kande ka diolelo ka lotombo’ dia nomboya anto. (Ɛdika la Mateu 16:27.) Ko lam’ele Shushi nde la andjelo ande wekɔ l’olongo, lâsɔ ndo anto watawɔ lo wɛɛla akɔ ɔsɔ mbele l’olongo?
5. Ngande wakokaso mbeya wanɛ wele ‘anango’ Kristo?
5 Naka sho mboka sso lo wɛɛla ɔsɔ, kete tayɛna elui esato wahombaso mbeya. Lâdiko di’ɛkɔkɔ la mbudi, Ɔna onto akayokotsha olui a sato ndo ekɔ ohomba sho mbeya olui akɔ ɔsɔ dia sho tshikitanya wanɛ wele ɛkɔkɔ la mbudi. Yeso mbelɛka olui ɔsɔ wa sato ɔnɛ anango wa lo nyuma. (Mateu 25:40, 45) Vɔ pombaka ndjâla atɛmɔdi wa mɛtɛ, nɛ dia Yeso akate ate: “Untu tshe latutshaka lulangu la Papa . . . , keli onalingu, ndu kadiemi, la nyomi.” (Mateu 12:50; Joani 20:17) Lo yoho yasungana efula, Paulo akafunde dikambo di’Akristo wele etenyi kɛmɔtshi ka “lɔtɔngɔ l’Abarahama” la ana wa Nzambi. Nde akawaelɛ ɔnɛ ‘anango’ Kristo ndo ‘wanɛ waketama kâmɛ lawɔ lo leeta la l’olongo.’—Heberu 2:9–3:1; Ngalatiya 3:26, 29, NW.
6. Wa na akɔna wele “wane wuleki tshitshe” l’atei w’anango Yeso?
6 Lande na kakatɛkɛta Yeso dikambo dia “wane wuleki tshitshe” l’atei w’anango? Ɛtɛkɛta ɛsɔ mboholaka kɛnɛ kakoke apɔstɔlɔ ntondotondo oma l’onyɔ ande. Lam’akandatɛkɛtaka dikambo diaki Joani Obatizanyi, ɔnɛ lakavu la ntondo ka Yeso ndo laki l’elongamelo ka la nkɛtɛ, lo mbotshikitanya la wanɛ wayokondja lɔsɛnɔ la l’olongo, Yeso akate ate: “Nduku untu luleki Joani Ubatizanyi wuki. Keli paka one luleki tshitshe lu diulelu dia l’ulungu, kûleki wuki.” (Mateu 11:11) Ondo anto amɔtshi, wanɛ waki l’elongamelo k’otsha l’olongo, waki l’ɛkɛndɛ a weke efula l’atei w’etshumanelo, ɛnyɛlɔ oko apɔstɔlɔ, ndo akina komonga l’ɛkɛndɛ efula, koko vɔ tshɛ wakikɔ anango Yeso wa lo nyuma. (Luka 16:10; 1 Koreto 15:9; Efeso 3:8; Heberu 8:11) Ɔnkɔnɛ, kânga mbaki amɔtshi kɔmbɔsamaka la nɛmɔ efula lanɛ la kɛtɛ, vɔ waki anango Kristo ndo wakahombaka mbɔsama lo yoho shɔ.
Wa Na Wele Ɛkɔkɔ la Mbudi?
7, 8. Kakɔna kakate Yeso lo dikambo di’ɛkɔkɔ, ko lâsɔ kakɔna kakokaso mbuta lo dikambo diawɔ?
7 Sho mbalaka ɔnkɔnɛ lo dikambo dia yɛdikɔ yakawɔ̂sɛ ɛkɔkɔ: “[Yeso] ayutela wane weli lu lunya landi la pami ati: Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja, ne dia dimi laki la ndjala, nyu nyakambisha mbu ya nde; dimi laki la pusa, nyakambisha dia no; dimi laki ongendangenda, nyu nyakambotshiya lu luudu. Dimi laki utakataka, nyu nyakandotsha; dimi laki la hemo, nyu nyakayumenda; dimi laki lu lukanu, nyu nyakayi le mi. Ku antu w’ololo wayuwumbula vati: Khumadiondjo, etena kakona kakatakenyi la ndjala, kakatakusha mbu ya nde? kana la pusa kakatakusha dia no? Etena kakona kakatakenyi ongendangenda, kakatakulungula? kana utakataka, kakatakolotsha? Etena kakona kakatakenyi la hemo, kana lu luudu la lukanu, kakatayi dia ndjukenda? Khum’ekanga ayâkaluya diui ati: Mete kanyutelami nti: Uku akanyatshela otoi omotshi a wane wuleki tshitshe l’atei w’analingu ane, dimi uku akanyatshela.”—Mateu 25:34-40.
8 Aha la tamu, ɛkɔkɔ wɔsami ɔnɛ vɔ kokaka monga lo lonya l’omi laki Yeso, lɛkɛ la nɛmɔ ndo la diɛsɛ, wekɔ didjidji di’olui ɔmɔtshi w’anto. (Efeso 1:20; Heberu 1:3) Kakɔna kakawasale ndo l’etena kakɔna? Yeso ekɔ lo mbuta ate: L’ɔlɔlɔ tshɛ, la dilɛmiɛlɔ tshɛ, ndo l’otema w’ɔlɔlɔ, vɔ wakawosha mbo ya ndɛ, ashi wa nɔ, ndo ahɔndɔ, wakawokimanyiya lam’akinde la hemɔ kana lo luudu la lokanu. Lam’ata ɛkɔkɔ ɔnɛ vɔ kosalɛ otondo wa Yeso akambo asɔ, nde ekɔ lo mɛnya ɔnɛ vɔ wakakimanyiya anango wa lo nyuma, atshikadi w’Akristo w’akitami, lo yoho shɔ mbakawokimanyiyaka.
9. Lande na kahakoke wɛɛla ɔsɔ kotshama l’edja ka Diolelo di’Ɛnɔnyi Kinunu?
9 Wɛɛla ɔsɔ hawotokotshama l’edja ka Diolelo di’Ɛnɔnyi Kinunu, nɛ dia l’etena kɛsɔ, akitami hawotoyala oko anto wɛna pâ la ndjala, la mposa k’ashi, la hemɔ, kana mbɔtɔ lokanu. Koko, efula ka l’atei awɔ, wakɛnyi akambo asɔ lo tena di’ekomelo dia dikongɛ di’akambo nɛ. Tatɛ oma lam’akakadjema Satana oya lanɛ la nkɛtɛ, kɛlɛ kande ndekaka mbudɔdɔ otsha le atshikadi, nde ekɔ lo mbaela lɔsɔkɔ, asui, ndo nyɔi.—Enyelo 12:17.
10, 11. (a) Lande na kele kema ɔlɔlɔ dia sho kanyiya ɔnɛ onto tshɛ lasalɛ anango Yeso dikambo di’ɔlɔlɔ ekɔ ɔkɔkɔ ɔmɔtshi? (b) Wa na wasungana ndjâla ɛkɔkɔ?
10 Onde Yeso ekɔ lo mbuta ɔnɛ onto tshɛ lasalɛ ɔnango ɔmɔtshi kiambokambo mɔtshi y’ɔlɔlɔ, ɛnyɛlɔ oko lo mbosha okama wa mma kana dikɔhɔ di’ashi, kokaka monga oko ɔkɔkɔ ɔmɔtshi a l’atei w’ɛkɔkɔ ɛsɔ? Eelo, sala akambo w’ɛlɔlɔ wa ngasɔ kɛnɛmɔlaka otema w’ɔlɔlɔ watoyalaka l’onto, koko lo mɛtɛ, mɛnamaka dia ɛkɔkɔ wa lo wɛɛla ɔsɔ pombaka sala akambo efula, aha komɛ paka lâsɔ ato. Oko ɛnyɛlɔ, Yeso kɔtɛkɛtaka kânga yema lo dikambo di’anto wahetawɔ ɔnɛ Nzambi ekɔ kana di’ewandji w’ɛtɛmwɛlɔ wa Lokristokristo, wanɛ wayokomaka lo salɛ ɔnango ɔmɔtshi dikambo dimɔtshi di’ɔlɔlɔ. Lo yoho yotshikitanyi, Yeso akelɛ ɛkɔkɔ ɛsɔ mbala hiende ɔnɛ: “Antu w’ololo.” (Mateu 25:37, 46) Ɔnkɔnɛ, ɛkɔkɔ pombaka monga wanɛ washa anango Kristo lonya l’edja k’etena kɛmɔtshi—wanɛ wâkimanyiya l’ohetoheto tshɛ—ndo wɛnya mbetawɔ kele lawɔ polo ndo lo yɛdikɔ yambowɔsama oko anto w’ɔlɔlɔ lo asho wa Nzambi.
11 L’edja ka deko efula, anto efula, ɛnyɛlɔ oko Abarahama, wakɔsamaka oko anto w’ɛlɔlɔ. (Jakoba 2:21-23) Nɔa, Abarahama, la anto akina wa kɔlamelo wekɔ l’atei w’“ekoko ekina” wayoyala la lɔsɛnɔ lo Paradiso, l’ɛse ka Diolelo diaki Nzambi. Nshi nyɛ, miliyɔ kina efula wambɔtɔ l’ɔtɛmwɛlɔ wa mɛtɛ oko ɛkɔkɔ ekina ndo wamboyala “ului otoi” kâmɛ l’akitami. (Joani 10:16; Enyelo 7:9) Anto asɔ wele l’elongamelo ka lanɛ la nkɛtɛ mbɔsaka anango Yeso oko akɛndji wa Diolelo diakɔ sɔ, ɔnkɔnɛ, vɔ mbakimanyiyaka—oyadi l’emunyi kana lo nyuma. Akambo wasalɛ ɛkɔkɔ ekina anango Yeso lanɛ la nkɛtɛ, Yeso mbaɔsaka ɔnɛ nde mbasalɛwɔ. Anto wa ngaso wayoyala la lɔsɛnɔ lam’ayondoya dia ndjolomboya wedja wayɔsama oko ɛkɔkɔ.
12. Lande na kakoka ɛkɔkɔ mumbola dia mbeya woho wakawasalɛ Yeso ɔlɔlɔ?
12 Ko naka ɛkɔkɔ ekina wekɔ lo sambisha lokumu l’ɔlɔlɔ nshi nyɛ vɔ l’akitami ndo wekɔ lo mbakimanyiya, lande na kayowombola ɔnɛ: “Khumadiondjo, etena kakona kakatakenyi la ndjala, kakatakusha mbu ya nde? kana la pusa kakatakusha dia no?” (Mateu 25:37) Akambo efula mbeyaka monga. Ɔsɔ ekɔ wɛɛla. Oma lo tshimbo ya wɛɛla ɔsɔ, Yeso ekɔ lo mɛnya woho wayakiyanyande efula lo dikambo di’anango wa lo nyuma; asolo ande wekɔ oko wakiwɔ, nde ekɔ lo sowa kâmɛ lawɔ. Yeso akate ntondo ate: “One lanyulungula, ambunungula; ku lanungula ambulungula one lakantumi.” (Mateu 10:40) Lo wɛɛla ɔsɔ, Yeso akakambe la dako sɔ lo yɛdikɔ ya woke, lo mɛnya ɔnɛ dikambo (di’ɔlɔlɔ kana dia kɔlɔ) diasalɛwɔ anango komaka polo ndo l’olongo; wate kana oko nde mbasalɛwɔ l’olongo. Ndo nto, lanɛ Yeso ekɔ lo mbika epole ɔsɛkɛ lo ɛnyɛlɔ k’elombwelo kaki Jehowa, nde ekɔ lo mɛnya ɔnɛ elombwelo ka Nzambi, oyadi ka nyindja onto kana mbânya, kekɔ elombwelo kasungana ndo ka losembwe. Wa mbudi hawokoke nyanga dia ndjayindja lo mbuta ɔnɛ: ‘Otondoyala takakɛnyi la asho aso shwamɛ, tshike dimɛna.’
13. Lande na kakoka wanɛ wafɔna la wa mbudi mbelɛ Yeso ɔnɛ: “Khumadiondjo”?
13 Naka tamboshila la shihodia etena kayosalema elombwelo kɛnyami lo wɛɛla ɔnɛ, kete tayeya wanɛ wele wa mbudi. Wɛɛla ɔsɔ wayokotshama l’etena ‘kayɛnama djembetelo y’Ɔna onto l’olongo, ko l’etena kakɔ, waoho tshɛ wa la nkɛtɛ wayoyatshatsha la lonyangu, ndo vɔ wayɛna Ɔna onto ayaye . . . la wolo ndo la lotombo la woke.’ (Mateu 24:29, 30) Koko, l’etena kɛsɔ, ehandɔ wa fɔnu ka woke kayokomɛ Babilɔna ka Woke wanɛ wahɛnyɔla anango Nkumekanga, wayɔsɛngasɛnga Shushi, la kanyi ya shimbɛ nsɛnɔ yawɔ, wawelɛ ɔnɛ: “Nkumadiondjo.”—Mateu 7:22, 23; ɛdika la Enyelo 6:15-17.
14. Yeso ayosambwɛ ɛkɔkɔ la mbudi lo ndjela akambo akɔna?
14 Lam’ayɔsa Yeso yɛdikɔ, nde hatodja yimba lo ɛsɛngɔsɛngɔ wa wanɛ wakatshɔkaka lo mvudu ya Nzambi, wanɛ waki kombetawɔka ɔnɛ Nzambi ekɔ, kana anto akina. (2 Tesalonika 1:8) Koko, shushi ayenda otema la ditshelo diakasalaka anto otsha le “otoi omotshi wuleki tshitshe l’atei [w’anango].” Aha la tamu, lofulo l’Akristo w’akitami wambotshikala lanɛ la nkɛtɛ lekɔ lo takitakita. Koko, l’edja tshɛ kele akitami, wanɛ wakenga “ɔhɔmbɔ wa kɔlamelo ndo wa kɛsɔ,” wâkatetemala mbisha anto mbo ya ndɛ la ɛlɔmbwɛlɔ ka lo nyuma, wanɛ wakombola ndjâla ɛkɔkɔ wekɔ la diaaso dia salɛ olui w’ɔhɔmbɔ akambo w’ɔlɔlɔ, oko wasala ‘olui a woke woye oma lo wedja tshɛ, oma lo waoho tshɛ ndo oma lo weoho w’anto tshɛ.’—Enyelo 7:9, 14.
15. (a) Ngande wayaɛnya anto efula vwamɛ ɔnɛ vɔ wekɔ oko wa mbudi? (b) Lande na kahombaso mbewɔ dia mbutaka ɔnɛ kapanda ekɔ ɔkɔkɔ kana shishadjɛndɛ ekɔ mbudi?
15 Akambo akɔna wasalɛ anto anango Kristo la miliyɔ y’ɛkɔkɔ ekina wele kâmɛ lawɔ oko olui ɔtɔi na? Mbeyaka monga ko amɔtshi hawɔhɛnyahɛnya akɛndji wa Kristo, koko vɔ hawâsalɛ ɔlɔlɔ. Oko walekawɔ ngɛnangɛna andja ɔnɛ wa kɔlɔ, wanɛ wafɔna la wa mbudi mbikashaka losango la Diolelo, oyadi kânga lam’aliokawɔ l’atui awɔ vwamɛ kana oma lo tshimbo mɔtshi. (1 Joani 2:15-17) Mɛtɛ, l’ekomelo, Yeso mbele ɔnɛ lakasɔnama dia pembola akambo. Aha sho mbahomba sambola ɔnɛ wanɛ mbele ɛkɔkɔ ko wanɛ mbele wa mbudi.—Mako 2:8; Luka 5:22; Joani 2:24, 25; Romo 14:10-12; 1 Koreto 4:5.
Olui l’Olui Ekɔ l’Elongamelo Kakɔna?
16, 17. Elongamelo kakɔna kele l’ɛkɔkɔ?
16 Yeso akasambwɛ ɛkɔkɔ ate: “Nyuyi, nyu etshokwami wa Papa, nyukiti diulelu diakawanyolongoswela umaka etatelu k’andja.” Ande leeta loludi la ngandji lee—l’ɔnɛ “Nyuyi”! Oya lende na? Oya lo lɔsɛnɔ la pondjo, oko wɛnyamidiɔ l’ɛtɛkɛta wa ndjihelo ɔnɛ: “Antu w’ololo [wayɔtɔ] lu lumu la pundju.”—Mateu 25:34, 46.
17 Lo wɛɛla wa talata, Yeso akɛnya kɛnɛ kalɔmbama le wanɛ wayolɛ kâmɛ lande l’olongo, koko lo wɛɛla ɔnɛ, nde ekɔ lo mɛnya kɛnɛ kalɔmbama le ambolami wa Diolelo. (Mateu 25:14-23) Lam’ele ɛkɔkɔ wekɔ lo sukɛ anango Kristo l’otema ɔtɔi, vɔ sunganaka mɛtɛ kondja dihole lanɛ la nkɛtɛ, l’ɛse ka Diolelo diande. Vɔ wayɔngɛnangɛna la lɔsɛnɔ lo paradiso ka lanɛ la nkɛtɛ—elongamelo kakâlɔngɔswɛla Nzambi “uma l’etatelu k’andja” w’anto wakoka tshungwama.—Luka 11:50, 51.
18, 19. (a) Yeso ayɔsɛ wa mbudi yɛdikɔ yakɔna? (b) Woho akɔna wakokaso ndjashikikɛ ɔnɛ wa mbudi hawotokondja sui dia pondjo?
18 Yɛdikɔ yakawɔ̂sɛ wa mbudi tshikitana woho w’anyanya! “Ku ndi ayutela wane wa lu lunya landi la lomoso ati: Nyumanganeli, nyu ambidjami mananu! Nyutshu lu dja ya pundju, yakawahetshiya uhimbanyi la andjelo andi, ne dia dimi laki la ndjala, nyu kumbishami mbu ya nde; dimi laki la pusa, nyu kumbishami dia no. Dimi laki ongendangenda, nyu kunungulami; dimi laki utakataka, nyu kondotshami; dimi laki la hemo ndu lu lukanu, nyu kundja dia ndjumenda. Ku ndu vo wayuwumbula vati: Khumadiondjo, etena kakona kakatakenyi la ndjala kana la pusa, kana ongendangenda, kana utakataka, kana la hemo, kana lu lukanu, kakisu kunkukimanyia? Ku ndi ayâkaluya diui ati: Mete kanyutelami nti: Ne dia uku akinyu kuntshela otoi omotshi wuleki tshitshe l’atei a wane, dimi uku akinyu kuntshela.”—Mateu 25:41-45.
19 Ambeki wa Bible mbeyaka ɔnɛ dikambo sɔ hadiɛnya ɔnɛ anima wahavu waki wanɛ wafɔna la wa mbudi wayosowa lo dja ya pondjo. Kema, nɛ dia anto mbele anima; vɔ kema la anima wahavu. (Etatelu 2:7; Undaki 9:5, 10; Ezekiyele 18:4) Lam’akandate ɔnɛ wa mbudi wayolongola dilanya dia ntshɔ otsha lo “dja ya pundju,” Shushi akalange mbuta ɔnɛ vɔ wayotshɔ otsha l’elanyelo ka pondjo kele ndoko l’elongamelo ka lɔsɛnɔ lo nshi yayaye, elanyelo kakɔ mɛnyaka nto ekomelo ka pondjo le Satana nde l’ɛdiɛngɛ ande. (Enyelo 20:10, 14) Ɔnkɔnɛ, Shushi yakasɔnɔla Jehowa akɔshi tɛdikɔ totshikitanyi. Nde akatɛ ɛkɔkɔ ate: “Nyuyi”; ko wa mbudi, nde akawatɛ ate: “Nyumanganeli.” Ɛkɔkɔ wayokondja “lumu la pundju.” Wa mbudi wayokondja “elanyelo ka pondjo.”—Mateu 25:46, NW.b
20, 21. (a) Olimu akɔna w’ohomba wahomba Akristo sala? (b) Okakitwanelo akɔna wasalema nshi nyɛ? (c) Ngande wayoyala anto lam’ayotatɛ wɛɛla w’ɛkɔkɔ la mbudi kotshama?
20 Apɔstɔlɔ anɛi wakoke okadimwelo waki Yeso lo kɛnɛ k’endana la djembetelo ya wôngelo ande ndo ya tena di’ekomelo dia dikongɛ di’akambo nɛ waki l’akambo efula wa vɔ kana lawɔ yimba. Takawahombe ndala djɔ ndo vɔ wakahombaka ndjalama ɔlɔlɔ. (Mateu 24:42) Ndo nto, vɔ wakahombe sala olimu w’esambishelo wofundami lo Mako 13:10. Ɛlɔ kɛnɛ, Ɛmɛnyi wa Jehowa wekɔ lo sala olimu ɔsɔ l’ohetoheto tshɛ.
21 Ko lâsɔ, oshihodielo ɔsɔ w’oyoyo wa wɛɛla w’ɛkɔkɔ la mbudi alembetshiyawɔ le so na? Mɛtɛ, anto wekɔ lo mbɛkama wedi ɔmɔtshi kana okina. Amɔtshi wekɔ lo ‘mboka k’enanɔnanɔ katɔla otsha l’elanyelo,’ akina wekɔ lo ndjatshutshuya dia tshikala lo ‘mboka ka mpika katɔla otsha lo lɔsɛnɔ.’ (Mateu 7:13, 14) Koko, lo nshi yayaye kayonga etena kayewoya Yeso yɛdikɔ ya komelo yambondɔsɛ ɛkɔkɔ la mbudi oko wɛnyamidiɔ lo wɛɛla ɔsɔ. Lam’ayoya Ɔna onto oko Shushi, nde ayosambola ɔnɛ efula k’Akristo wa mɛtɛ—wanɛ wele mɛtɛ “ului a wuki” w’ɛkɔkɔ wamboyakimɔ le Nzambi—wayosungana tenyanya etenyi ka komelo ka “[fɔnu ka woke, NW]” dia mbɔtɔ l’andja w’oyoyo. Elongamelo kɛsɔ pombaka monga kiɔkɔ y’ɔngɛnɔngɛnɔ nshi nyɛ. (Enyelo 7:9, 14) Lo wedi okina, lemba la woke l’oma lo “wedja tshe” wayotayaɛnyisha ɔnɛ vɔ wekɔ oko mbudi ya mpokotui. Vɔ ‘wayotshɔ l’elanyelo ka pondjo.’ Ande esambelo le nkɛtɛ lee!
22, 23. Lam’ele ekotshamelo ka wɛɛla ɔsɔ kayosalema lo nshi yayaye, lande na kele olimu w’esambishelo ohomba efula ɛlɔ kɛnɛ?
22 Kânga mbayosalema elombwelo katawɔ lo wɛɛla ɔsɔ lo nshi yayaye, dikambo dimɔtshi di’ohomba efula diekɔ lo salema nshi nyɛ. Sho Akristo tekɔ lo sala olimu washimbɛ nsɛnɔ y’anto lam’asambishaso losango latakakitola anto. (Mateu 10:32-39) Paulo akafunde ate: “Untu tshe [latɛndɛ, NW] lukumbu la [Jehowa], ayushimbamela. Keli, ukundi ayuweya [tɛndɛ, NW] one lahawatetawo? Ukundi eyawo mbêtawo, lam’ahawatuki lukumu landi? Ukundi eyawo mbuka, lam’ahawo la usambisha?” (Romo 10:13, 14) Olimu aso wa lo sɛkɛ w’esambishelo ka lokombo la Nzambi la losango lande la panda wambokoma le anto wa lo wedja ndekana 230. Anango Kristo, wanɛ wele akitami, wâkatetemala nɔmbɔla olimu akɔ ɔsɔ. Nshi nyɛ, suke la miliyɔ tshanu y’ɛkɔkɔ ekina wekɔ lo mbɔtɔ l’ɔnɔngɔ awɔ. Ndo anto wa l’andja w’otondo wekɔ lo mbetawɔ losango lasambisha anango Yeso.
23 Anto efula wekɔ lo mboka losango laso lam’atatasambisha lo luudu la luudu kana lo tshakitudi. Akina mbeyaka akambo waki Ɛmɛnyi wa Jehowa ndo olimu aso, aha la sho mbeya woho weyawɔ akambo asɔ. Lam’ayokoka etena k’elombwelo, lo yɛdikɔ yakɔna yayɔsa Yeso onongo w’olui w’anto la nɛmɔ dia nkumbo? Sho hatokoke mbuta, ndo kema ohomba dia tafɔnyaka ɔfɔnyafɔnya. (Ɛdika la 1 Koreto 7:14.) Ɛlɔ kɛnɛ, anto efula ndjihaka atui l’okonda, mɔnyɔlaka, ndo mbɔtɔka l’ɔnɔngɔ w’anto akina dia pɛnyahɛnya anto wa Nzambi. Ɔnkɔnɛ, ɔnɛ ekɔ etena k’ohomba efula; anto wa ngasɔ kokaka mbɔtɔ l’atei a wanɛ wayɔsama oma le Yeso oko wa mbudi.—Mateu 10:22; Joani 15:20; 16:2, 3, Romo 2:5, 6.
24. (a) Lande na kele ekɔ ohomba di’anto mbetawɔ esambishelo kaso? (b) Wekelo ɔnɛ wambokokimanyiya wɛmɛmɛ dia monga la dionga diakɔna otsha l’olimu w’esambishelo?
24 Diɛsɛ ko, efula wekɔ lo kadimola etema lo yoho y’ɔlɔlɔ, wekɔ lo mbeka Dui dia Nzambi, ndo wekɔ lo ndjâla Ɛmɛnyi wa Jehowa. Amɔtshi wɛnama nshi nyɛ oko wa mbudi kokaka kadimola etema ko ndjoyala oko ɛkɔkɔ. Nyango dikambo diɔ nɛ: wanɛ wakadimola etema ndo wasukɛ atshikadi w’anango Kristo l’ohetoheto tshɛ wekɔ lo mbisha djembetelo yayoyala ɔkɔkɔ wa woke le wɔ dia vɔ kitshama lo lonya l’omi la Yeso lam’ayondodjasɛ, kem’edja nto, lo kiti kande ka diolelo ka lotombo dia nomboya anto. Anto asɔ wekɔ lo kondja ɛtshɔkɔ ndo wayotetemala tshɔkwama. Ɔnkɔnɛ, wɛɛla ɔsɔ pombaka tokeketsha dia sho nyomoleka monga l’ohetoheto l’olimu w’Okristo. Di’aha ndjota ɔnɛ hayeyama, sho nangaka sala kɛnɛ tshɛ kakokaso sala dia sambisha lokumu l’ɔlɔlɔ la Diolelo, ndo lo yoho shɔ mbashaso anto akina diaaso dia vɔ kadimola etema. Oma lâsɔ, etena kayokoka ka Yeso pembola akambo, manya anto kana mbayindja.—Mateu 25:46.
[Footnotes]
a Enda lo Tshoto y’Etangelo ya Yâta Afusa 15, 1994 (lo Falase), lɛkɛ 16-21.
b Dibuku dielɛwɔ ɔnɛ El Evangelio de Mateo mbutaka ɔnɛ: “Lɔsɛnɔ la pondjo kɛdikɛdi lɔsɛnɔ lahakomɛki; otshikitanu alɔ ele dilanya dia pondjo. Otshindedi (adjectif) wa lo Grɛkɛ aionios hɛnya ntondotondo edja k’etena kɛmɔtshi, koko mɛnyaka eongelo. Dilanya dia pondjo kɛdikɛdi nyɔi ka pondjo.”—Juan Mateos, ombetsha wambolongolaka pasiɔ (Pontifical Biblical Institute, Rome) la ombetsha Fernando Camacho (Theological Center Seville), Madrid, Espagne, 1981.
Onde Wɛ Mbohɔka?
◻ Akambo akɔna wafɔna l’asa Mateu 24:29-31 la Mateu 25:31-33 wɛnya ɔnɛ wɛɛla w’ɛkɔkɔ la mbudi wayokotshama lo nshi yayaye, ndo l’etena kakɔna?
◻ Wa na wele “wane wuleki tshitshe” l’atei w’anango Yeso?
◻ Ngande wakimanyiyamaso oma lo woho wakakambe Yeso la tshɛkɛta “antu w’ololo” dia sho mbeya wa na wewɔ ndo wa na wewɔ bu?
◻ Kânga mbayokotshama wɛɛla ɔsɔ lo nshi yayaye, lande na kele olimu w’esambishelo wasalaso nshi nyɛ ohomba efula ndo sho pombaka mbosala esadi esadi?
[Caption on page 16]
[Box on page 16 (See printed copy for proper layout]
ENDA AKAMBO WAFƆNA L’ASA
Mateu 24:29-31 Mateu 25:31-33
L’ɔkɔngɔ wa fɔnu ka woke tatɛ, Ɔna onto ambokoma Ɔna onto amboya
Amboya la lotombo la woke Ambokoma lo lotombo ndo ambodjasɛ
lo kiti kande ka diolelo ka lotombo
Andjelo wekɔ kâmɛ lande Andjelo wambokoma kâmɛ lande
Waoho tshɛ wa la nkɛtɛ wambowɛna Wedja tshɛ wambotshumanyema; wa mbudi wambolomboyama
l’ekomelo (fɔnu ka woke kambokomɛ)
Alembetshiyawɔ le So?