Wekelo 8

Lɔsɛnɔ la Nkumbo Langɛnyangɛnya Nzambi

Dihole diakɔna diele l’omi l’atei a nkumbo? (1)

Woho akɔna wahomba omi monga la wadiɛnde? (2)

Ɛkɛndɛ akɔna wele la omi l’atei a nkumbo? (3)

Naa olimu a wadi l’atei a nkumbo? (4)

Kakɔna kalɔmba Jehowa ambutshi l’ana? (5)

Kakɔna kata Bible lo dikambo di’okakitwanelo ndo di’odiakelo wa diwala? (6, 7)

1. Bible mbutaka ɔnɛ omi mbele owandji wa nkumbo. (1 Koreto 11:3) Omi pombaka monga la wadi ɔtɔi oto. Vɔ pombaka tshukana woho wetawɔma l’ɛlɛmbɛ wa lɛɛta.​—1 Timote 3:2; Tito 3:1.

2. Omi pombaka nanga wadiɛnde oko wayalangande. Nde pombaka mbɔ̂sa oko wɔsa Yeso ambeki ande. (Efeso 5:25, 28, 29) Nde hahombe kɔmɔla wadiɛnde pondjo kana mbɔsɔkisha lo woho ɔmɔtshi. Koko, nde pombaka mbɔ̂sa la nɛmɔ ndo mbɔlɛnya.​—Kolosai 3:19; 1 Petero 3:7.

3. Ombutshi a pami pombaka kamba efula dia kokɛ nkumbo kande. Nde pombaka mbisha wadiɛnde l’anande mbo ya ndɛ, ahɔndɔ wa ndɔta, ndo luudu la ndala. Ombutshi a pami pombaka kotsha ndo ehomba wa lo nyuma wa nkumbo kande. (1 Timote 5:8) Nde mbahomba mbisha nkumbo kande ɛnyɛlɔ lo dikambo dia mbeka akambo wa Nzambi la asangwelo Ande.​—⁠Euhwelu k’Elembe 6:4-9; Efeso 6:4.

4. Wadi pombaka monga okimanyedi w’ɔlɔlɔ w’omɛnde. (Etatelu 2:18) Nde pombaka kimanyiya omɛnde lo mbetshaka anawɔ ndo lo mbangolaka. (Tukedi 1:⁠8) Jehowa nɔmbaka wadi dia nde kokɛ nkumbo kande la ngandji tshɛ. (Tukedi 31:10, 15, 26, 27; Tito 2:​, 5) Nde pombaka nɛmiya omɛnde efula.​—Efeso 5:22, 23, 33.

5. Nzambi nɔmbaka ana dia vɔ kitanyiya ambutshi awɔ. (Efeso 6:1-3) Nde nongamɛka di’ambutshi ndakanya ndo mingola anawɔ. Ambutshi pombaka mbidjasɛka l’anawɔ ndo mbekaka Bible kâmɛ lawɔ, kotsha ehomba awɔ wa lo nyuma ndo wa lo tokanyi. (Euhwelu k’Elembe 11:​18, 19; Tukedi 22:6, 15) Ambutshi hawohombe pondjo mingola anawɔ la djawudi y’efula kana la pɛnyɔ.​—Kolosai 3:21.

6. Naka wadi l’omi wekɔ l’ekakatanu dia mbokana, vɔ pombaka ntsha la wolo dia ndjela alako wa lo Bible. Bible tɔlɔmbaka dia sho mbokana ngandji ndo dimanyiyana. (Kolosai 3:12-14) Dui dia Nzambi hadiɔsɛ okakitwanelo oko yoho y’ɔlɔlɔ ya shidiya ekakatanu wa totshitshɛ. Koko wadi kokaka sɔna dia kakitɔna l’omɛnde naka (1) omɛnde halange kotsha ehomba wa nkumbo kande l’okonda tshɛ, (2) nde kɔmanaka efula ko demba kana lɔsɛnɔ lande laya lo wâle, kana (3) woho wawɔhɛnyahɛnyande efula hayowosha kânga yema ya diaaso dia nde tɛmɔla Jehowa.​—1 Koreto 7:12, 13.

7. Wadi l’omi pombaka monga la kɔlamelo lam’asawɔ. Sala loseka ekɔ pɛkato otsha le Nzambi ndo otsha le olonganyi ayɛ. (Heberu 13:4) Mbeyana l’onto laha omɛyɛ kana wadɛyɛ mbele tshɔi y’ɔkɔkɔ yetawɔ Afundelo dia diwala mvɔ k’onto monga la lotshungɔ la tshuka kana tshukama nto. (Mateu 19:6-9; Romo 7:2, 3) Jehowa petshaka shambu y’onto ndjaka diwala aha l’ɔkɔkɔ wetawɔ Afundelo ko ntshɔ dia totshuka kana totshukama l’onto okina.​—Malaki 2:14-16.

[Diombwɛlo di’osato wa lo lɛkɛ 16, 17]

Nzambi nongamɛka di’ambutshi ndakanyaka anawɔ ndo mbangolaka

[Diombwɛlo di’osato wa lo lɛkɛ 17]

Ombutshi wa pami wa ngandji kotshaka ehomba wa l’emunyi ndo wa lo nyuma wa nkumbo kande