Wekelo 13

Ngande Wakokayɛ Mbishola Ɔtɛmwɛlɔ wa Mɛtɛ?

Onde ɛtɛmwɛlɔ tshɛ ngɛnyangɛnyaka Nzambi, kana paka ɔtɔi oto? (1)

Lande na kaya ɛtɛmwɛlɔ efula wayata ɔnɛ Kristo mbayelawɔ? (2)

Woho akɔna wakokayɛ mbeya Akristo wa mɛtɛ? (3-7)

1. Kristo akahɔhɔla ɔtɛmwɛlɔ ɔtɔi oto wa mɛtɛ w’Akristo. Omalɔkɔ, ɛlɔ kɛnɛ, etshumanelo ɔtɔi keto kɔlɔngɔswami, kana olui wâmɛ w’atɛmɔdi wa mɛtɛ waki Jehowa mbahomba ndjâla. (Joani 4:23, 24; Efeso 4:4, 5) Bible mbetshaka ɔnɛ paka anto yema tshitshɛ tsho mbele lo vioka ya tshitshɛ y’otsha lo lɔsɛnɔ.​—Mateu 7:13, 14.

2. Bible akewoya edja la ntondo ɔnɛ: l’ɔkɔngɔ wa nyɔi k’apɔstɔlɔ, wetshelo wa kashi ndo ditshelo di’apanganu diayoyɔsɔsɔmɛ yema yema l’atei w’etshumanelo k’Akristo. Anto amɔtshi wayoyokotola ambetawudi dia vɔ mbayela lo dihole dia vɔ ndjela Kristo. (Mateu 7:15, 21-23; Etsha 20:29, 30) Diɔ diakɔ diɛnaso ɛtɛmwɛlɔ efula wayata ɔnɛ Kristo mbayelawɔ. Ngande wakokaso mbeya Akristo wa mɛtɛ na?

3. Djembetelo ya woke efula yeyama Akristo wa mɛtɛ yɔ nyɛ: vɔ mbokanaka ngandji ka mɛtɛ lam’asawɔ. (Joani 13:34, 35) Vɔ hawetshama dia monga la tokanyi t’ɔnɛ vɔ ndeka anto wele la nkoho y’alemba yotshikitanyi la wɔ kana anto wa lo dibila dikina. Hawowaetsha dia mpetsha anto wa lo wedja ekina. (Etsha 10:34, 35) Omalɔkɔ, vɔ hawɔtɔ l’ata. Akristo wa mɛtɛ mbɔsanaka oko anto l’ɔnango.​—1 Joani 4:20, 21.

4. Djembetelo kina y’ɔtɛmwɛlɔ wa mɛtɛ yɔ nyɛ: anto awɔ mbɔsaka Bible la nɛmɔ di’efula. Vɔ kietawɔka oko Dui dia Nzambi ndo mbetawɔka kɛnɛ katatɔ. (Joani 17:17; 2 Timote 3:16, 17) Vɔ mbɔsaka Dui dia Nzambi la nɛmɔ di’efula oleki tokanyi la mbekelo y’anto. (Mateu 15:1-3, 7-9) Vɔ salaka la wolo tshɛ dia kitanyiyaka kɛnɛ kata Bible lo lɔsɛnɔ lawɔ la lushi la lushi. Omalɔkɔ, vɔ kema dungi pende pende, kɛnɛ kasambishawɔ mbasalawɔ.​—Tito 1:15, 16.

5. Ɔtɛmwɛlɔ wa mɛtɛ pombaka nɛmiya lokombo la Nzambi. (Mateu 6:9) Yeso akewɔnya lokombo la Nzambi, Jehowa, le anto akina. Akristo wa mɛtɛ pombaka sala woho akɔ wâmɛ. (Joani 17:6, 26; Romo 10:13, 14) Naa anto wa lo ngelo kanyu wewoya anto akina dikambo dia lokombo la Nzambi?

6. Akristo wa mɛtɛ pombaka sambisha awui w’endana la Diolelo diaki Nzambi. Yeso akasale ngasɔ. Nde akatatɛkɛtaka dikambo dia Diolelo nshi tshɛ. (Luka 8:1) Nde akadjangɛ ambeki ande dia vɔ sambisha losango lakɔ lâmɛ lo nkɛtɛ k’otondo. (Mateu 24:14; 28:19, 20) Akristo wa mɛtɛ mbetawɔka ɔnɛ paka Diolelo diaki Nzambi to mbayela wɔladi wa mɛtɛ la lotui tshitshi la nkɛtɛ kɛnɛ.​—Osambu 146:3-5.

7. Ambeki wa Yeso hawohombe ndjadja l’akambo wa l’andja wa kɔlɔ ɔnɛ. (Joani 17:16) Vɔ hawoyatambiya l’akambo wa pɔlitikɛ ya l’andja ɔnɛ ndo l’ɛlɔshanyelo w’atshunda w’anto. Vɔ mbewɔka lɔkɛwɔ la kɔlɔ, ditshelo, ndo mbekelo ya kɔlɔ yambodiangana l’andja ɔnɛ. (Jakoba 1:27; 4:4) Onde wɛ kokaka mbishola ɔtɛmwɛlɔ ɔmɔtshi wa lo ngelo kanyu wele la tolembetelo tɔsɔ ta Lokristo la mɛtɛ?

[Diombwɛlo di’osato wa lo lɛkɛ 26, 27]

Akristo wa mɛtɛ mbokanaka ngandji, mbɔsaka Bible la nɛmɔ, ndo sambishaka akambo wa Diolelo dia Nzambi